தமிழ்நாட்டில் சினிமா நட்சத்திரங்களின் அரசியல் பிரவேசமும், அதன் தோல்விகளும் புதியதல்ல. மூத்த நடிகர்களான எம்.ஜி.ஆர். மற்றும் ஜெயலலிதா ஆகியோர் திராவிட இயக்கங்களின் கருத்தியல் அடித்தளத்தை வலுவாக பயன்படுத்தியே மாபெரும் அரசியல் வெற்றிகளை அடைந்தனர். ஆனால், கடந்த சில ஆண்டுகளாக, திராவிட கட்சிகளுக்கு ஒரு வலுவான மாற்றை உருவாக்க முயன்ற எந்தவொரு பிரபலத்தின் முயற்சியும் வெற்றி பெறவில்லை. சமீபத்தில் நடிகர் விஜய் அரசியலுக்கு வந்திருப்பது குறித்து, அரசியல் விமர்சகர்கள் மற்றும் பார்வையாளர்கள் மத்தியில் எழும் கேள்விகளையும், அதன் பின்னணியில் உள்ள ஆழமான அரசியல் உண்மைகளையும் விரிவாக அலசி வருகின்றனர்.
நடிகர் விஜய்யின் வரவு பலருக்கு உற்சாகம் அளித்திருந்தாலும், இது குறித்துப் பேசும் மூத்த அரசியல் விமர்சகர்கள், அவரது முயற்சி வீணாகப் போகலாம் என்ற கருத்தை முன்வைக்கின்றனர். இதற்கு காரணம், தமிழ்நாட்டின் ஆழமாக வேரூன்றிய “திராவிடப் பிம்பம்.”
இதற்கு மிகச்சிறந்த உதாரணங்கள், விஜயகாந்தும் கமல்ஹாசனும்தான். விஜயகாந்த், தொடக்கத்தில் எழுச்சியோடு செயல்பட்டாலும், திராவிட கட்சிகளின் கட்டமைப்பையும் அடித்தளத்தையும் மீறி ஒரு மாற்று சக்தியாக தனித்து நிற்க முடியவில்லை. கமல்ஹாசன், “மக்கள் நீதி மய்யம்” மூலம் களமிறங்கிய போதும், திராவிட அரசியல் கருத்தியல் மற்றும் சமூக நீதி கொள்கைகளின் ஆழமான பிடியிலிருந்து மக்களை வெளியே கொண்டு வர திணறினார்.
அரசியல் கட்சி ஆரம்பித்து தமிழகத்தில் ஒரு மாற்றத்தை கொண்டு வர வேண்டும் என்ற எண்ணம் இருந்தாலும் இந்த உண்மையைத் தெளிவாக உணர்ந்த காரணத்தினாலேயே, நடிகர் ரஜினிகாந்த் அரசியலுக்கு வரவிருந்த நேரத்தில் தனது முடிவை மாற்றிக்கொண்டார். திராவிட இயக்கங்களுக்கு எதிரான கருத்தியல் போரை ஒரு சினிமா பிரபலம் தனி ஒருவராகவோ, அல்லது குறுகிய காலத்திலோ, ஒரே ஒரு தேர்தலிலோ நடத்த முடியாது என்று ரஜினி உணர்ந்ததால்தான் அவர் பின்வாங்கினார்.
தமிழ்நாட்டை பொறுத்தவரை, திராவிடத்தின் சமூக நீதி, மாநில உரிமைகள், தமிழ் அடையாளம் ஆகிய மூன்று தூண்களை வீழ்த்துவது என்பது ஒரே இரவில் அல்லது ஒரே தேர்தல் களத்தில் நடக்கக்கூடியதல்ல. திராவிட கட்சிகள், குறிப்பாக தி.மு.க.வும் அ.தி.மு.க.வும், அரை நூற்றாண்டை கடந்து ஆட்சியில் நீடிப்பதன் பின்னால் ஒரு வலுவான அரசியல் அடித்தளம் உள்ளது. கிராமங்கள் மற்றும் சமூக ரீதியான உறவுகளில் அவர்களின் கிளைக் கழகங்கள் மிகவும் ஆழமாக ஊடுருவி உள்ளன.
பெரியாரியம், அண்ணா வழியிலான சமூக நீதி கொள்கைகள் மற்றும் தமிழ் தேசிய உணர்வு ஆகியவை பொதுமக்களின் ஆழ் மனதில் நீங்காத இடத்தைப் பிடித்துள்ளன. பல ஆண்டுகளாக வழங்கப்பட்டு வரும் நலத்திட்ட உதவிகள், மக்களை உணர்வுப்பூர்வமாக திராவிட கட்சிகளுடன் பிணைத்துள்ளன.
நடிகர் விஜய், இந்த பிம்பத்தை உடைத்து மக்களை தம் பக்கம் திருப்ப வேண்டுமென்றால், வெறும் சினிமா கவர்ச்சி அல்லது மக்கள் இயக்கம் மட்டும் போதாது. அவருக்கு ஒரு புதிய, நம்பகமான மற்றும் ஆழமான அரசியல் தத்துவம் தேவை. தமிழ்நாட்டில் திராவிட கட்சிகளுக்கு மாற்றாக ஒரு தேசிய நீரோட்ட அரசியலை நிறுவ வேண்டுமானால், அதற்கு நீண்ட கால திட்டமிடல், கருத்தியல் அடித்தளம் மற்றும் இடையறாத உழைப்பு அவசியம்.
பாரதிய ஜனதா கட்சியின் முன்னாள் மாநில தலைவர் அண்ணாமலை அந்த முயற்சியை தான் அரசியலுக்கு வந்தவுடன் செய்தார். திராவிடம் என்பது வீழ்த்த முடியாதது அல்ல, ஆனால் அதற்கு சரியான அடித்தளம் வேண்டும். குறைந்தது பத்து வருடங்கள் ஆகும் என்ற முடிவுடன் அவர் எடுத்த முயற்சிகள், ஒரு நீண்டகால பயணத்தின் தொடக்கமாக பார்க்கப்படுகின்றன. அவர் திராவிட கட்சிகளின் ஊழல் மற்றும் நிர்வாக சீர்கேடுகளை மட்டுமே விமர்சிக்காமல், அவர்களின் அடிப்படை கருத்தியலை விமர்சனத்துக்கு உட்படுத்துகிறார்.
இந்த அணுகுமுறை வெற்றி பெற வேண்டுமானால், அதற்கு மிக நீண்ட காலம் தேவைப்படும். ஒரே தேர்தலில், திராவிடத்தை வீழ்த்தி முழுமையான மாற்றத்தை கொண்டுவர முடியாது.
அரசியல் விமர்சகர்களின் கூற்றுப்படி, அண்ணாமலை மற்றும் பா.ஜ.க.வின் முயற்சியானது, அடுத்த 10 வருடங்கள் வரை தொடர்ந்தால் மட்டுமே, தமிழ்நாட்டு அரசியலில் ஒரு குறிப்பிடத்தக்க மாற்றத்தை ஏற்படுத்த முடியும். அந்த மாற்றம் படிப்படியாக திராவிடத்தின் பிடியை தளர்த்தி, மக்கள் புதிய மாற்று அரசியலை ஏற்க வழிவகுக்கும்.
இந்தச் சூழலில், நடிகர் விஜய்யின் அரசியல் நகர்வு, வலுவான கருத்தியல் பின்புலம் இல்லாமல் வெறும் சினிமா பிரபல்யத்தின் அடிப்படையில் முன்னெடுக்கப்பட்டால், அது விஜயகாந்த் மற்றும் கமல்ஹாசனை போல, அரசியல் அலைகளை உருவாக்க தவறியவர்களின் பட்டியலில் சேரவே அதிக வாய்ப்புள்ளது. அவர் முதலில் திராவிடத்தின் ஆழமான பிடியை அங்கீகரித்து, அதை எதிர்கொள்ள ஒரு பலமான தத்துவார்த்த ஆயுதத்தை கையில் எடுத்தால் மட்டுமே, அரசியல் களத்தில் நிற்க முடியும். இல்லையேல், ரஜினிகாந்த் பின்வாங்கியது போல, திராவிட பிம்பத்தை வீழ்த்துவது ஒரு சினிமா ஹீரோவால் அல்ல, ஒரு ஆழ்ந்த அரசியல் அடித்தளத்தாலேயே சாத்தியம் என்ற உண்மை மீண்டும் நிரூபிக்கப்படும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
