தமிழக அரசியல் களம் 2026 சட்டமன்ற தேர்தலை நோக்கி நகர்ந்துகொண்டிருக்கும் நிலையில், எதிர்பாராத ஒரு கூட்டணி குறித்த பேச்சுவார்த்தைகள் அரசியல் வட்டாரத்தில் சூடுபிடித்துள்ளன. தி.மு.க. மற்றும் திராவிடக் கட்சிகளுக்கு மாற்றாக ‘தனித்துப் போட்டி’ என்று முழக்கமிட்ட தமிழக வெற்றிக் கழகம் தலைவர் விஜய், தற்போது தி.மு.க.வை வீழ்த்தும் ஒற்றை இலக்குடன், அ.தி.மு.க.வுடன் ஒரு மெகா கூட்டணி அமைக்க ரகசிய பேச்சுவார்த்தை நடத்துவதாகத் திடீர் தகவல் வெளியாகியுள்ளது.
இந்தக் கூட்டணி குறித்த பேச்சுவார்த்தைகள் இறுதி வடிவம் பெற்றால், அது தமிழக அரசியல் வரலாற்றில் ஒரு திருப்புமுனையாக அமையும். இதுகுறித்த தகவல்களும், நிபந்தனைகளும் பரபரப்பின் உச்சத்தில் உள்ளன.
த.வெ.க. தலைவர் விஜய்யின் நிலைப்பாடு மிகவும் தெளிவாக உள்ளது. அ.தி.மு.க.வுடன் கூட்டணி வைக்க அவர் சம்மதித்தாலும், அந்த கூட்டணியில் பாஜகவுக்கு இடமளிக்கக் கூடாது என்பதே பிரதான நிபந்தனையாக வைக்கப்பட்டுள்ளதாக தெரிகிறது.
பாஜக கூட்டணியில் இருந்தால், சிறுபான்மையினர் வாக்குகள் முழுமையாக தி.மு.க. பக்கம் திருப்பும் என்ற கவலை விஜய்க்கு நிலவுகிறது. தேசிய அளவில் பாஜகவுக்கு மாற்று என்ற பிம்பத்தை உருவாக்கவே விஜய் அரசியலுக்கு வந்த நிலையில், மீண்டும் அதே கூட்டணியில் இணைவது அவருடைய இலட்சியத்திற்கு முரணாக இருக்கும் என்று அவர் கருதுகிறார்.
தி.மு.க.வை அதிகாரத்தில் இருந்து அப்புறப்படுத்த வேண்டும் என்பதில் தீவிரமாக இருக்கும் அ.தி.மு.க. பொதுச் செயலாளர் எடப்பாடி பழனிசாமி, விஜய்யின் இந்த நிபந்தனையை ஏற்றுக்கொண்டு பாஜகவை விலக்க தயாராக இருக்கலாம் என்றும் கூறப்படுகிறது. ‘தி.மு.க. தோற்றால் போதும்’ என்ற ஒற்றை இலக்குக்காக, பாஜகவும் கூட்டணியில் இருந்து வெளியே வரவும் வாய்ப்பு உள்ளதாக கூறப்படுகிறது.
தொகுதி பங்கீடு பொருத்தவரை தமிழகத்தில் மொத்தமுள்ள 234 சட்டமன்ற தொகுதிகளில், அ.தி.மு.க. 117 தொகுதிகளிலும், த.வெ.க. 117 தொகுதிகளிலும் போட்டியிட வேண்டும் என்று விஜய் தரப்பு கோருவதாக தகவல் வெளியாகியுள்ளது.
புதிதாக அரசியல் கட்சி தொடங்கிய ஒரு தலைமை, 2011 முதல் 2021 வரை 10 வருடங்கள் தொடர்ச்சியாக ஆட்சி செய்த கட்சிக்கு இணையாக தொகுதிகளை கோருவது, தமிழக அரசியலில் இதுவரையில்லாத ஒரு துணிச்சலான நடவடிக்கையாகும். இது, விஜய்யின் இலக்கை அடையும் வேகத்தையும், அவர் தனது கட்சிக்கு அளிக்கும் முக்கியத்துவத்தையும் வெளிப்படுத்துகிறது.
கூட்டணியில் அதிக விவாதத்தை ஏற்படுத்தியிருக்கும் அம்சம், முதலமைச்சர் வேட்பாளர் யார்? என்பதுதான். தேர்தலுக்கு முன்னதாக முதல்வர் வேட்பாளர் அறிவிக்கப்படக் கூடாது. தேர்தலுக்கு பிறகு, கூட்டணியில் பெரும்பான்மை பெறும் அணியின் தலைவரே முதலமைச்சர் வேட்பாளராக அறிவிக்கப்பட வேண்டும் என்று விஜய் தரப்பு வலியுறுத்துவதாக கூறப்படுகிறது.
ஏற்கனவே தன்னை முதல்வர் வேட்பாளராக முன்னிறுத்தி கொண்டிருக்கும் ஈபிஎஸ்-க்கு, விஜய்யின் இந்த நிபந்தனை பெரும் நெருக்கடியை அளிக்கும். எனினும், தி.மு.க.வை ஆட்சியில் இருந்து அகற்ற வேறு வழி இல்லை என்ற நிலை ஏற்படும்போது, இந்த நிபந்தனைக்கு அவர் சம்மதம் தெரிவிக்கவும் வாய்ப்புள்ளது.
அ.தி.மு.க. மற்றும் த.வெ.க. ஆகிய இருபெரும் சக்திகள், பாஜகவின் பலம் இல்லாவிட்டாலும், இணைவது என்பது ஆளும் தி.மு.க.வுக்கு மிக பெரிய சவாலாக அமையும். விஜய்யின் புதிய அரசியல் வருகை தி.மு.க-வின் இளைஞர்கள் மற்றும் நடுத்தர வயதினர் வாக்குகளை கணிசமாக கவரும் என எதிர்பார்க்கப்படுகிறது.
ஏற்கனவே அ.தி.மு.க-வுக்கு உள்ள பாரம்பரிய வாக்குகளுடன், இரட்டை சிலை சின்னத்திற்காகவே இருக்கும் வாக்குகளும், விஜய்யின் பிரபலமும் இணைந்தால், தி.மு.க.வுக்கு எதிரான வாக்குகள் சிதறாமல், ஒற்றை அணியாக ஒருங்கிணைவது தி.மு.க.வின் வெற்றி வாய்ப்பைக் கேள்விக்குறியாக்கும்.
அரசியல் களத்தில் இந்த ரகசிய பேச்சுவார்த்தைகள் உறுதிப்படுத்தப்படாவிட்டாலும், தி.மு.க-வின் ஆட்சியை முடிவுக்கு கொண்டுவர, இரண்டு பெரிய சக்திகள் ஒன்றுசேரும் இந்த சாத்தியம், தமிழக அரசியல் எதிர்காலத்தை முற்றிலும் மாற்றியமைக்கக் கூடிய ஆற்றல் கொண்டது என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
