கரூரில் நடந்த துயர சம்பவம், தமிழகத்தின் ஒட்டுமொத்த கவனத்தையும் ஈர்த்துள்ளது. இந்த விபத்து, தமிழக அரசியல் களத்தில் விஜய்யின் எதிர்காலத்தை கேள்விக்குள்ளாக்கியுள்ளதாக ஒருபுறம் விமர்சனங்கள் எழுந்தாலும், மறுபுறம், ஒரு அரசியல் தலைவராக அவர் எழுந்து நிற்க வேண்டிய தருணம் இதுதான் என்று அவரது ஆதரவாளர்கள் மற்றும் நடுநிலையான அரசியல் பார்வையாளர்கள் கருதுகின்றனர். இந்த விவகாரத்தில் தவெக-வின் தலைவர் விஜய் அமைதி காப்பது ஏன், மக்கள் அவருக்கு ஆதரவாக இருப்பதன் காரணம் என்ன, மற்றும் இனி அவரது அடுத்த நகர்வு எப்படி இருக்க வேண்டும் என்பது குறித்து விரிவாக பார்க்கலாம்.
கரூர் சம்பவத்தை விசாரணை செய்ய தமிழக அரசின் சார்பாக ஒரு தனிநபர் ஆணையம் அமைக்கப்பட்டுள்ளது. இந்த ஆணையம் உயிரிழந்தவர்களின் குடும்பத்தினர் மற்றும் பாதிக்கப்பட்டவர்களிடம் விசாரணை செய்து வருகிறது. இந்த ஆணையத்தின் விசாரணையின் போது, பல குடும்பத்தினரிடம் வாக்குமூலங்கள் பெறப்பட்டுள்ளன. ஆச்சரியப்படும் விதமாக, இந்த விசாரணையின் போது, உயிரிழந்தவர்களின் உறவினர்கள் ஒருவர்கூட விஜய்யின் மீது குறை சொல்லவில்லை. மாறாக, அவர்களில் பலர், “விஜய்யின் நிகழ்ச்சியில் நடந்த இந்த துயரத்திற்கு நாங்கள் வருந்துகிறோம். ஆனால், இதற்கான காரணம் நிர்வாக குறைபாடுதான்” என்று தெரிவித்துள்ளனர்.
மிகவும் மனதை உருக்கும் விதமாக, உயிரிழந்த ஒரு குழந்தையின் தாயே, விஜய்க்கு ஆதரவாக பேசியுள்ளார். “என் குழந்தையை நான் பறிகொடுத்துவிட்டேன். ஆனால், இந்த துயரத்திற்கு விஜய் காரணம் கிடையாது. அவர் எங்களை சந்திக்க வந்திருந்தால் எங்களுக்கு இன்னும் ஆறுதலாக இருந்திருக்கும் என்று மட்டுமே கூறியுள்ளார்.
மக்களின் இத்தகைய மகத்தான ஆதரவு இருந்தும், விஜய் ஏன் அமைதியாக இருக்கிறார்? இது ஒரு அரசியல் உத்தியா அல்லது ஒருவித தயக்கமா என்ற கேள்வி எழுகிறது. ஒருபுறம், இந்த சூழ்நிலையில் உணர்ச்சிவசப்பட்டு பேசினால், அது மேலும் பிரச்சனைகளை உருவாக்கிவிடும் என்று அவர் காத்திருக்கலாம். மறுபுறம், திமுக போன்ற ஒரு பெரும் அரசியல் சக்தியை எதிர்ப்பது அவ்வளவு எளிதல்ல என்ற எண்ணம் அவருக்கு இந்த சம்பவத்திற்கு பிறகு தோன்றி இருக்கலாம்.
“தோல்வி நிலை என நினைத்தால், மனிதன் வாழ்வை நினைக்கலாமா” என்ற பாடல் வரிகள் இங்கு பொருந்தும். ஒரு அரசியல் தலைவன், இக்கட்டான சூழ்நிலையில் பின்வாங்கக் கூடாது. விஜய் வீட்டிற்குள்ளேயே முடங்கியிருப்பது, அவரது தொண்டர்கள் மற்றும் ஆதரவாளர்கள் மத்தியில் சோர்வை ஏற்படுத்தலாம். ஒரு கட்சிக்கு நெருக்கடி வரும்போது, அதன் தலைவர் தைரியமாக வெளிவந்து நிற்க வேண்டும்.
நேரடித் தொடர்பு: விஜய் பாதிக்கப்பட்டவர்களை நேரில் சந்தித்து ஆறுதல் அளிக்கலாம். நீதிமன்றம் அனுமதி மறுத்தால், சட்டப் போராட்டத்தைத் தொடரலாம். வெறும் அறிக்கைகள் மட்டும் போதாது. களத்தில் இறங்கி, பாதிக்கப்பட்டவர்களுக்கு தேவையான உதவிகளை உடனடியாக செய்ய வேண்டும். புஸ்ஸி ஆனந்த், ஆதவ் அர்ஜூனா போன்ற இரண்டாம் நிலை தலைவர்கள் உடனடியாக களத்தில் இறங்கி, பாதிக்கப்பட்ட மக்களுக்கு தேவையான ஆதரவை வழங்க வேண்டும்.
இந்த சம்பவத்தில் விஜய் மீதும் தவெக மீதும் பழி போட சிலர் முயற்சிக்கலாம். அவர்களுக்கு பின் சக்தி வாய்ந்தவர்கள் இருக்கலாம். ஆனால் அந்த மாதிரி நபர்களுக்கு விஜய் நேரடியாக சவால் விட வேண்டும். “எதுவாக இருந்தாலும் பார்த்துக்கொள்ளலாம்” என்ற மன உறுதி அவருக்குத் தேவை.
கரூர் சம்பவம் விஜய்க்கு ஒரு சோதனையான நேரம் என்பதில் சந்தேகமில்லை. ஆனால், இதுவே அவர் ஒரு முழுமையான அரசியல் தலைவராக உருவெடுக்க ஒரு நல்ல வாய்ப்பு. இந்த சோதனையில் இருந்து அவர் மீண்டுவிட்டால் அவர் ஆட்சி அமைப்பது உறுதி. மக்கள் அவர் மீது குற்றம் சாட்டவில்லை. மாறாக, உண்மையில் என்ன நடந்தது என்பது எங்களுக்கு தெரிய வேண்டும் என்றுதான் கேள்வி கேட்கிறார்கள். இந்த சூழ்நிலையில், மக்களின் ஆதரவை புரிந்துகொண்டு, பயமின்றி தைரியமாக விஜய் வெளிவர வேண்டும். அப்போதுதான், அவருடைய அரசியல் பயணம் சரியான பாதையில் தொடரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
