சினிமாவில் இருந்து அரசியலுக்கு அடியெடுத்து வைத்துள்ள தமிழக வெற்றி கழகத்தின் தலைவர் தளபதி விஜய், ஈரோட்டில் ஆற்றிய பொதுக்கூட்ட உரை, அவரது அரசியல் பயணத்தில் ஒரு திருப்புமுனையாக பார்க்கப்படுகிறது. கரூரில் நிகழ்ந்த துயர சம்பவத்திற்குப் பிறகு, 80 நாட்களுக்கும் மேலாக அரசியல் களத்தில் இருந்து விலகி இருந்த விஜய், இந்த உரை மூலம் தன்னுடைய அரசியல் நிலைப்பாட்டை மேலும் கூர்மைப்படுத்தியிருக்கிறார். இதுகுறித்து மூத்த பத்திரிகையாளர் மணி சமீபத்தில் அளித்த பேட்டியில் சில கருத்துக்களை தெரிவித்துள்ளார்.
விஜய்யின் உரை குறித்து பேசிய மணி, “இதுவரை அவர் ஆற்றிய உரைகளிலேயே இதுதான் மிகச் சிறந்த உரை” என்று பாராட்டினார். இந்த உரை மூலம் விஜய், தான் தான் திமுகவுக்கு மாற்று சக்தி என்று திட்டவட்டமாக தன்னை நிலைநிறுத்தி கொள்கிறார். திமுகவை அவர் “தீய சக்தி” என்று திரும்ப திரும்ப வர்ணிப்பதன் மூலம், ஆளுங்கட்சிக்கு எதிரான தனது தாக்குதலை மேலும் கூர்மைப்படுத்துகிறார். மேலும், ஈரோட்டில் மஞ்சள் விலை கிடைக்காதது போன்ற உள்ளூர் பிரச்சினைகளுக்கு முக்கியத்துவம் கொடுத்தது, பின்னர் மாநில பிரச்சினைகளுக்கு சென்றது ஒரு சரியான அரசியல் வியூகமாக உள்ளது.
அதிமுக-வின் மூத்த நிர்வாகியான செங்கோட்டையன் போன்ற அனுபவம் வாய்ந்தவர்கள் தங்கள் கட்சியில் இணையும் போது, அவர்களுக்கு உரிய மரியாதை அளிக்கப்படும் என்று விஜய் அறிவித்தது, அதிமுகவில் எடப்பாடி பழனிசாமியை விட்டு விலகி நிற்க நினைப்பவர்களுக்கு அவர் இட்ட ஒரு தூண்டில் என்றும் மணி குறிப்பிட்டார்.
அதே சமயம், பாஜக-வை அவர் கொள்கை எதிரி என்று மட்டும் கூறிவிட்டு, களத்தில் அவர்களை எதிர்க்க மறுப்பது, மென்மையான பாஜக நிலைப்பாட்டை அவர் எடுப்பதாக விமர்சனங்களை எதிர்கொள்ள நேரிடும். இருப்பினும், தமிழ்நாட்டில் இல்லாதவர்களை பற்றி நான் ஏன் பேச வேண்டும்?” என்ற விஜய்யின் பதில், பாஜக-வுக்கு எதிரான தனது அரசியல் சக்தியை வீணாக்க விரும்பவில்லை என்பதை காட்டுகிறது.
திமுகவின் குடும்ப அரசியலையும் வாரிசு அரசியலையும் கடுமையாக விமர்சித்த விஜய், சமூக நீதியை பற்றிப் பேசும் இவர்கள், வாரிசு அரசியல் மூலம் தலித்துகளுக்கு எதிரான அரசியலை தொடர்வதாகவும் சாடினார். இது, திராவிட கட்சிகளின் குடும்ப அரசியலால் வெறுப்படைந்த வாக்காளர்களைத் தன்பக்கம் ஈர்க்கும் ஒரு முக்கிய காரணமாகும். குறிப்பாக, மாநிலத்தில் 207 ஆரம்பப் பள்ளிகள் மூடப்பட்டதற்கும், 18 மாநில பல்கலைக்கழகங்கள் சம்பளம் கொடுக்க முடியாமல் திவாலாகி வருவதற்கும் திமுக அரசு பதிலளிக்க வேண்டும் என்று விஜய் கேள்வி எழுப்பியுள்ளார்.
“நாங்கள் ஒரு பொருட்டே இல்லை என்றால், ஏன் 24 மணி நேரமும் எங்களை பற்றி பேச வேண்டும்?” என்று விஜய் எழுப்பிய கேள்வி 100% நியாயமானது என மணி ஒப்புக்கொண்டார். திமுக மற்றும் அதன் தொங்கு சதைகள் என கூறப்படும் குழுக்கள் மூலம் கோடிக் கணக்கில் செலவு செய்து விஜய்யை தாக்குவது, திமுகவுக்குள் இருக்கும் அச்சத்தையும் கலக்கத்தையும் காட்டுகிறது. இழப்பதற்கு எதுவுமே இல்லாத விஜய், ஆளும் திமுகவின் சாம்ராஜ்யத்திற்கு தொல்லை தருபவராக உருவெடுத்துள்ளார். அவர் ஆட்சிக்கு வர முடியாவிட்டாலும், திமுக மற்றும் அதிமுகவின் வெற்றிக்கு கடும் சேதாரத்தை ஏற்படுத்துவார் என்பது நிச்சயம்.
இருப்பினும், இந்த அரசியல் உரைக்கு பின்னால், வரும் காலங்களில் பணம், கூட்டணி மற்றும் தேர்தல் நாள் மேலாண்மை போன்ற பல சிக்கல்கள் காத்திருக்கின்றன. ஆளுங்கட்சிக்கு இருக்கும் அதிகார பலத்தையும் பணபலத்தையும் விஜய் எப்படி எதிர்கொள்ள போகிறார் என்பதுதான் மில்லியன் டாலர் கேள்வி. திரண்டிருக்கும் மக்கள் பலம் ஒருபுறம் இருந்தாலும், அரித்மெட்டிக் என்ற தேர்தல் கணக்கு திமுகவுக்கு சாதகமாகவே உள்ளது. எனவே, முதல் தேர்தலிலேயே அவர் வெற்றியை ஈட்டுவது கடினம் என்ற போதிலும், தமிழ்நாட்டு அரசியலில் ஒரு புதிய சக்தி உருவாகிவிட்டது என்பதை இந்த ஈரோடு எழுச்சி உறுதி செய்துள்ளது. இவ்வாறு பத்திரிகையாளர் மணி கூறியுள்ளார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
