தமிழ்நாடு அரசியல் களம் தற்போது நடிகர் விஜய்யின் தமிழக வெற்றி கழகத்தின் வரவால் பெரும் விவாதத்தில் உள்ளது. அவரது அரசியல் அணுகுமுறை, மாநிலத்தில் நீண்ட காலமாக நிலைநிறுத்தப்பட்டுள்ள திராவிட கட்சிகளின் பாரம்பரிய அரசியல் பாதையிலிருந்து முற்றிலும் மாறுபட்டதாக உள்ளது. இதுவே, அவரது அரசியல் பயணத்தின் ஒரு தனித்துவமான அம்சமாக பார்க்கப்படுகிறது.
அரசியல் விமர்சகர்கள் மற்றும் விஜய்யின் ஆதரவாளர்கள் மத்தியில் எழுப்பப்படும் ஒரு கூற்று என்னவென்றால், விஜய்யின் அரசியல் நிலைப்பாடு என்பது, தேர்தல் தோல்வியை சந்தித்த பின் திராவிட கட்சிகளின் கூட்டணியை நாடிய கட்சிகளின் பாதையில் செல்லாது என்பதே. கடந்த காலங்களில் பாமக, மதிமுக, தேமுதிக, ம.நீ.ம. போன்ற கட்சிகள், முதல் தேர்தலில் தனித்து நின்று தோல்வியை சந்தித்த பிறகு, திமுக அல்லது அதிமுக ஆகிய இரு பெரிய திராவிட கட்சிகளின் கூட்டணிக்குள் சென்று ‘ஃபார்மாலிட்டி அரசியல்’ செய்யும் நிலைக்கு தள்ளப்பட்டன.
தமிழ்நாட்டில் கடந்த சில ஆண்டுகளாக திமுக அல்லது அதிமுக ஆகிய இரு பெரும் திராவிட கட்சிகளின் கூட்டணியில் இல்லாமல் எந்த ஒரு புதிய கட்சியும் கணிசமான வெற்றியை பெற முடியவில்லை என்பதே வரலாறு. பாமக, மதிமுக போன்ற கட்சிகள் ஒரு காலகட்டத்தில் தங்களை தனித்து இயங்கும் மாற்று சக்தியாக நிலைநிறுத்த முயற்சித்தன. ஆனால், அவர்களின் அரசியல் இருப்பும், அங்கீகாரமும் காலப்போக்கில் திராவிட கூட்டணிகளை சார்ந்தே ஆனது.
ஆனால், விஜய்யின் அரசியல் உத்தி இந்த சுழற்சியை உடைப்பதாக தெரிகிறது. த.வெ.க.வின் நிலைப்பாடு குறித்து ஊடகங்களில் முன்வைக்கப்படும் முக்கியமான பார்வை இதுவே: “விஜய் ஒரு தேர்தலை சந்திப்பார். வெற்றி பெற்றால் முதல்வர்; தோல்வி அடைந்தால் ‘ஜனநாயகன் 2’ என போய்விடுவார். திராவிட கூட்டணிக்கு சென்று ஃபார்மாலிட்டி அரசியல் செய்ய மாட்டார்.” இதன் மூலம், த.வெ.க. தனது ஆரம்ப காலத்திலேயே திராவிட கட்சிகளின் கூட்டணியில் இடம்பெறாமல், ஒரு மாற்று அரசியல் சக்தியாக தனித்து இயங்கும் உறுதியை காட்டுகிறது.
அதாவது, ஒருவேளை முதல் தேர்தலில் தோல்வி ஏற்பட்டாலும், அரசியலில் நீடிப்பதற்காக அவர் பிற கட்சிகளுடன் கட்டாயமாக கைகோர்த்து, தனது கட்சியின் அடையாளத்தை தொலைத்துவிட மாட்டார். அதற்கு பதிலாக, அவர் தனது கட்சியின் நோக்கத்தை மறுபரிசீலனை செய்து, மீண்டும் திரைப்படங்களில் கவனம் செலுத்துவார். அவர் எப்போது மீண்டும் நடிக்க வந்தாலும் அவருக்கு 200 கோடி ரூபாய் சம்பளம் தர தயாரிப்பாளர்கள் தயாராக உள்ளனர்.
எனவே மாற்றம் வேண்டும் என நினைப்பவர்கள் “விஜய் அரசியலுக்கு வேணுமா? வேண்டாமா? என்று முடிவெடுக்கட்டும்!” என்று அவரது ஆதரவாளர்கள் கூறுகின்றனர்,. திராவிட கட்சிகளின் பிடியில் இருந்து தமிழ்நாட்டின் அரசியலை விடுவிப்பதற்கு, இதுவே ஒரு கடைசி வாய்ப்பு என்றும், மக்கள் விரும்பும் ஒரு மாற்று சக்தியைக் கட்டியெழுப்பும் இறுதி சந்தர்ப்பம் இது என்றும் தவெகவினர் கருதுகின்றனர். விஜய்யின் இந்த தனித்த உத்தி திராவிட அரசியலின் பிடியை உடைக்குமா என்பதை மக்கள் அளிக்கும் வாக்குகள் மட்டுமே தீர்மானிக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
