தமிழக அரசியல் களத்தில் சமூக வலைத்தளங்கள் ஒரு சக்திவாய்ந்த பிம்பத்தை உருவாக்கினாலும், அந்த பிம்பம் தேர்தல் முடிவுகளில் எதிரொலிக்குமா என்பது மிகப்பெரிய கேள்விக்குறியே. ஃபேஸ்புக், எக்ஸ் மற்றும் இன்ஸ்டாகிராம் போன்ற தளங்களில் அரசியல் குறித்து அனல் பறக்க பேசுபவர்கள், பெரும்பாலும் ‘வாக்குப்பதிவு’ என்று வரும்போது மௌனமாகிவிடுகின்றனர். இணையத்தில் ஒரு கட்சிக்கு கிடைக்கும் பெரும் ஆதரவு என்பது பெரும்பாலும் உணர்ச்சிவசப்பட்ட கருத்துக்களாகவே இருக்கின்றன. இந்த “டிஜிட்டல் போராளிகள்” தேர்தல் நாளன்று வாக்குச்சாவடிக்கு சென்று வரிசையில் நின்று தங்கள் ஜனநாயக கடமையை ஆற்றுவார்களா என்பதை உறுதி செய்வது எந்தவொரு புதிய கட்சிக்கும் பெரும் சவாலாகவே உள்ளது.
தமிழக தேர்தல் வரலாற்றை பொறுத்தவரை, 40 வயதிற்கு மேற்பட்டவர்களே மிகவும் தீவிரமான மற்றும் ‘சின்சியர்’ வாக்காளர்களாக பார்க்கப்படுகின்றனர். பாரம்பரிய கட்சிகளின் மீது பற்று கொண்டவர்கள், குடும்ப பின்னணி காரணமாக வாக்களிப்பவர்கள் என இந்த நடுத்தர மற்றும் முதிய வயது வாக்காளர்களே வாக்குப்பதிவு சதவீதத்தை தீர்மானிக்கின்றனர். இவர்கள் மழையோ, வெயிலோ எதையும் பொருட்படுத்தாமல் வாக்குச்சாவடிக்கு செல்வதை ஒரு கடமையாக கருதுகின்றனர். இவர்களின் வாக்குகளை பெறுவதற்கு அடிமட்ட அளவிலான கிளைக் கழக கட்டமைப்பு மிக அவசியம். அத்தகைய கட்டமைப்பு பல ஆண்டுகளாக இயங்கி வரும் திராவிடக் கட்சிகளிடம் மட்டுமே தற்போது வலுவாக உள்ளது.
தேர்தல் ஆணையம் வாக்குப்பதிவு சதவீதத்தை உயர்த்த பல்வேறு முயற்சிகளை எடுத்தாலும், நீண்ட விடுமுறை என்றாலே நகர்ப்புற இளைஞர்களின் கவனம் சுற்றுலாவை நோக்கியே திரும்புகிறது. தேர்தல் நாளை ஒட்டி இரண்டு அல்லது மூன்று நாட்கள் விடுமுறை கிடைத்தால், பலர் வாக்களிப்பதை தவிர்த்துவிட்டு ஊட்டி, கொடைக்கானல் போன்ற கோடை வாஸ்தலங்களுக்குப் பயணம் செய்ய திட்டமிடுகின்றனர். சமூக வலைத்தளங்களில் மாற்றத்தை பற்றிப் பேசும் அதே நபர்கள், களத்தில் தங்களின் பங்களிப்பை வழங்க தவறுவது ஒரு முரண்பாடான உண்மையாகவே நீடிக்கிறது. இந்த மனப்போக்கை மாற்றி, அவர்களை ஜனநாயக கடமை ஆற்ற வைப்பது ஒரு பெரும் போராட்டமாகும்.
நடிகர் விஜய்யின் ‘தமிழக வெற்றிக் கழகம்’ கட்சியின் முதன்மை பலமே இளைஞர்களும், மாணவர்களும்தான். ஆனால், இந்த இளைஞர் பட்டாளம் வெறும் ‘கைதட்டல்’ மற்றும் ‘கமெண்ட்’களுடன் நின்றுவிடாமல், அவர்களை வாக்குச்சாவடிக்கு அழைத்து வருவதுதான் விஜய்க்கு இருக்கும் மிகப்பெரிய சவால். அவரது ரசிகர் மன்றங்கள் அரசியல் கட்சியாக மாறியிருந்தாலும், அவை பூத் வாரியாக மக்களை ஒருங்கிணைக்கும் திறனை பெற்றுள்ளனவா என்பது தேர்தல் நாளன்றுதான் தெரியும். உணர்ச்சிவசப்படும் ரசிகர்களை பொறுப்புள்ள வாக்காளர்களாக மாற்றுவதிலேயே அவரது அரசியல் எதிர்காலம் அடங்கியுள்ளது.
ஒருவேளை, சமூக வலைத்தளங்களில் காட்டும் அதே வேகத்தை வாக்குச்சாவடிகளிலும் இளைஞர்கள் காட்டினால், அது தமிழக அரசியலில் ஒரு மிகப்பெரிய சுனாமியை உருவாக்கும். இளைஞர்களை திரட்டி, விடுமுறை மனப்பான்மையை விடுத்து அவர்களை வாக்களிக்க வைப்பதில் விஜய் வெற்றி பெற்றுவிட்டால், அவர் தமிழகத்தின் அடுத்த முதல்வர் என்ற இலக்கை எளிதில் எட்டிவிடுவார். மற்ற கட்சிகள் பாரம்பரிய முறைகளை பின்பற்றும் போது, விஜய் தனது ‘இமேஜ்’ மற்றும் செல்வாக்கை பயன்படுத்தி இளைஞர்களை ஜனநாயகத்தின் பக்கம் திருப்பினால், அது ஒரு புதிய அரசியல் மாற்றத்திற்கான தொடக்கமாக அமையும்.
முடிவாக, தமிழக அரசியல் மாற்றம் என்பது வெறும் திரையிலோ அல்லது டிஜிட்டல் திரையிலோ இல்லை; அது வாக்குப்பதிவு இயந்திரத்தில்தான் உள்ளது. 40 வயதிற்கு மேற்பட்டவர்களின் வாக்குகளை தக்கவைக்கத் திராவிடக் கட்சிகள் போராடும் வேளையில், எதற்கும் துணியாத இளைஞர்களின் வாக்குகளை ஒருங்கிணைக்க விஜய் திட்டமிடுகிறார். இந்த போட்டியில், யார் வாக்காளர்களை சாவடிக்குக் கொண்டு வருகிறார்களோ அவர்களுக்கே வெற்றி வாய்ப்பு அதிகம். இந்த ‘வாக்குப்பதிவு மேலாண்மை’ என்ற சவாலை விஜய் எப்படி எதிர்கொள்ளப் போகிறார் என்பதே 2026ன் எதிர்பார்ப்பாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
