தமிழக அரசியலில் 2026 சட்டமன்ற தேர்தல் களம் இப்போதே சூடுபிடிக்க தொடங்கியுள்ள நிலையில், நடிகர் விஜய்யின் தமிழக வெற்றி கழகத்தை நோக்கி அதிமுக பொதுச்செயலாளர் எடப்பாடி பழனிசாமி ஒரு அதிரடி தூது அனுப்பியுள்ளதாக அரசியல் வட்டாரங்களில் பலத்த பேச்சு எழுந்துள்ளது. விஜய்க்கு சுமார் 50 தொகுதிகள் வரை ஒதுக்குவதோடு, ஆட்சி அமைந்தால் அவருக்கு துணை முதல்வர் பதவியையும் வழங்க அதிமுக முன்வந்துள்ளதாக தகவல்கள் கசிகின்றன. திமுக மற்றும் அதிமுக ஆகிய இரு பெரும் துருவங்களை தாண்டி தனித்து நின்று ஆட்சியை கைப்பற்றுவது என்பது நடைமுறையில் சாத்தியமற்ற காரியம் என்பதை உணர்ந்துள்ள விஜய், இப்போதைக்கு ஒரு பலமான கூட்டணியை அமைப்பதே புத்திசாலித்தனம் என்று அவரது ஆலோசகர்கள் தரப்பில் கூறப்பட்டு வருகிறது.
திமுக மற்றும் காங்கிரஸ் ஆகிய கட்சிகளை பழிவாங்க விஜய்க்கு இது ஒரு சரியான வாய்ப்பாக அமையக்கூடும் என்று அரசியல் விமர்சகர்கள் கருதுகின்றனர். குறிப்பாக, விஜய்யின் திரைப்பட வெளியீடுகளுக்கு ஆளுங்கட்சி தரப்பிலிருந்து கொடுக்கப்பட்ட நெருக்கடிகள் மற்றும் அவரது அரசியல் வருகையை விமர்சித்த விதம் ஆகியவை விஜய்க்கு ஒருவிதமான ஆக்ரோஷத்தை ஏற்படுத்தியுள்ளது. தற்போதைய திமுக ஆட்சியை அதிகாரத்தில் இருந்து இறக்குவதே விஜய்யின் பாதி வெற்றியாக கருதப்படும் நிலையில், அதற்கு அதிமுக போன்ற ஒரு பலமான வாக்கு வங்கியை தன்னகத்தே கொண்ட கட்சியுடன் இணைவது அவருக்கு பெரிய பலத்தை தரும்.
எடப்பாடி பழனிசாமியை பொறுத்தவரை, திமுகவின் பலமான கூட்டணியை உடைக்க வேண்டுமானால் விஜய்யின் இளம் தலைமுறை வாக்குகள் தனக்கு தேவை என்பதைத் தெளிவாக உணர்ந்துள்ளார். இதற்காகத்தான் அவர் 50 தொகுதிகள் மற்றும் துணை முதல்வர் பதவி என்கிற கவர்ச்சிகரமான வாக்குறுதியை முன்வைத்துள்ளதாக தெரிகிறது. அதிமுகவின் அனுபவமும் விஜய்யின் கவர்ச்சியும் இணைந்தால் அது ஒரு வெற்றி கூட்டணியாக மாற வாய்ப்புள்ளது. ஆனால், திராவிட அரசியலுக்கு மாற்றாக தன்னைக் காட்டிக்கொள்ள விரும்பும் விஜய், மீண்டும் ஒரு திராவிட கட்சியுடன் கூட்டணி வைத்தால் அது அவரது தனித்துவத்தை பாதிக்குமா என்கிற தயக்கமும் அவரிடம் உள்ளது.
மறுபுறம், ரஜினிகாந்த் போன்ற நடிகர்கள் அரசியலில் இருந்து ஒதுங்கியதற்கு நிலவிய அதே போன்ற நெருக்கடிகள் இப்போதும் விஜய்க்கு எதிராக முடுக்கிவிடப்பட்டுள்ளன. ஆனால், ரஜினியை போல பின்வாங்காமல் களத்தில் நிற்பதுதான் விஜய்யின் தற்போதைய திட்டம். தனித்து நின்று வெற்றி பெறுவது கடினம் என்பதால், அதிமுகவின் இந்த தூது விஜய்க்கு ஒரு வரப்பிரசாதமாக தெரியலாம். ஆளுங்கட்சியை தோற்கடிக்க வேண்டும் என்கிற ஒற்றை இலக்கை அடைய வேண்டுமானால், சில விட்டுக்கொடுத்தல்களை செய்துதான் ஆகவேண்டும் என்கிற யதார்த்தத்தை விஜய் இப்போது உணர தொடங்கியுள்ளார்.
விஜய்யின் மனைவி சங்கீதா தொடர்பான தனிப்பட்ட வதந்திகள் மற்றும் திரைப்பட தயாரிப்பாளர்களின் நெருக்கடி என பல்வேறு திசைகளில் இருந்து அவருக்கு அழுத்தம் கொடுக்கப்பட்டு வருகிறது. இத்தகைய இக்கட்டான சூழலில், ஒரு பலமான அரசியல் கூட்டணியின் பாதுகாப்பு விஜய்க்கு தேவைப்படுகிறது. அதிமுகவுடனான கூட்டணி அமைந்தால், தேர்தல் செலவுகள் முதல் களப்பணிகள் வரை விஜய்க்கு ஒரு பெரும் சுமை குறையும். அதே நேரத்தில், தொகுதிகளின் எண்ணிக்கை மற்றும் அதிகார பகிர்வு குறித்து தொடர்ந்து ரகசிய பேச்சுவார்த்தைகள் நடந்து வருவதாகக் கூறப்படுகிறது.
இறுதியில் விஜய் என்ன முடிவெடுப்பார் என்பதுதான் ஒட்டுமொத்த தமிழகத்தின் எதிர்பார்ப்பாக இருக்கிறது. அதிமுகவின் 50 தொகுதிகள் மற்றும் துணை முதல்வர் பதவியை ஏற்றுக்கொண்டு அவர் கூட்டணியில் இணைவாரா அல்லது “யாரோடும் கூட்டணி இல்லை” என்று கூறி தனது பலத்தை சோதித்து பார்ப்பாரா என்பது இன்னும் சில மாதங்களில் தெரிந்துவிடும். எது எப்படியோ, திமுகவை ஆட்சி கட்டிலில் இருந்து இறக்குவதே தனது முதல் பணி என்று அவர் முடிவு செய்தால், எடப்பாடி பழனிசாமி நீட்டியுள்ள அந்த நட்புக்கரம் விஜய்க்கு ஒரு முக்கியமான ஏணியாக அமையும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
