தமிழக அரசியல் களத்தில் தற்போது வீசும் பலத்த காற்று, ஆளுங்கட்சியான திமுகவின் கோட்டையையே சற்றே அதிர வைத்துள்ளதாக அரசியல் விமர்சகர்கள் கருதுகின்றனர். குறிப்பாக, நடிகர் விஜய் தொடங்கியுள்ள தமிழக வெற்றி கழகம் மிகக்குறுகிய காலத்தில் பெற்றுள்ள மக்கள் செல்வாக்கு, திராவிட கட்சிகளின் ஐம்பது ஆண்டுகால ஆதிக்கத்திற்கு ஒரு சவாலாக உருவெடுத்துள்ளது.
சமீபத்தில் அறிவாலய தரப்பிலிருந்து எடுக்கப்பட்டதாக கூறப்படும் ரகசிய கருத்துக்கணிப்பு முடிவுகளில், இளைஞர்கள் மற்றும் முதல்முறை வாக்காளர்களின் ஆதரவு விஜய்க்கு சாதகமாக இருப்பது கண்டறியப்பட்டதாகவும், இது திமுக தலைமைக்கு பெரும் அதிர்ச்சியை ஏற்படுத்தியுள்ளதாகவும் தகவல்கள் கசிகின்றன.
பொதுவாக ஒரு புதிய கட்சி ஆரம்பிக்கும்போது அதை விமர்சிக்காமல் கடந்து செல்வதே அரசியல் தந்திரம். ஆனால், ஆரம்பத்திலிருந்தே விஜய்யின் ஒவ்வொரு நகர்வையும் திமுகவின் இரண்டாம் கட்ட தலைவர்கள் கடுமையாக விமர்சித்ததும், அவரது மாநாட்டிற்கு முட்டுக்கட்டை போட முயன்றதும் அவருக்கு தேவையில்லாத விளம்பரத்தை தேடித்தந்துவிட்டது.
விஜய்யை ஒரு சாதாரண நடிகராக மட்டும் பார்த்து, அவரை அரசியல் ரீதியாக கண்டுகொள்ளாமல் விட்டிருந்தால் அவர் இந்த அளவிற்கு விஸ்வரூபம் எடுத்திருக்க மாட்டார் என்பதுதான் கள யதார்த்தம். அவரை அடக்க நினைக்க நினைக்க, மக்கள் மத்தியில் அவர் மீதான அனுதாபமும் ஆதரவும் அதிகரித்துக்கொண்டே செல்கிறது.
ஒருவரை வளர விடாமல் தடுக்கிறார்கள் என்ற பிம்பம் உருவானாலே, தமிழக மக்கள் இயல்பாகவே அந்த நபரின் பக்கம் சாய்ந்துவிடுவார்கள் என்பது வரலாறு. எம்.ஜி.ஆர் முதல் ஜெயலலிதா வரை பல தலைவர்களின் எழுச்சி இத்தகைய அடக்குமுறைகளிலிருந்தே தொடங்கியுள்ளது. தற்போது விஜய்யின் விஷயத்திலும் அதே வரலாறு திரும்புமோ என்ற அச்சம் அறிவாலய வட்டாரத்தில் நிலவுகிறது. குறிப்பாக, சமூக வலைதளங்களில் விஜய்க்கு இருக்கும் அபரிமிதமான செல்வாக்கு, திமுகவின் ஐடி விங்கிற்கு பெரும் சவாலாக மாறியுள்ளது.
தவெகவின் வெற்றியை தடுக்க திமுக பல்வேறு வியூகங்களை வகுத்தாலும், களத்தில் நிலவும் ஆளுங்கட்சி எதிர்ப்பு அலை விஜய்க்கு சாதகமான சூழலை உருவாக்கியுள்ளது. மதுவிலக்கு, ஊழல் எதிர்ப்பு மற்றும் வாரிசு அரசியல் போன்ற விஜய்யின் முழக்கங்கள் சாமானிய மக்களை சென்றடைந்துள்ளன. திராவிட கட்சிகளுக்கு மாற்றாக ஒரு வலுவான சக்தியை தேடிக்கொண்டிருந்த நடுநிலை வாக்காளர்களுக்கு விஜய் ஒரு நம்பிக்கையாக தெரிகிறார்.
இனிவரும் காலங்களில் விஜய்யை விமர்சிப்பதை குறைத்துக்கொண்டு, தங்கள் அரசின் சாதனைகளை முன்னிறுத்த திமுக முயன்றாலும், ஏற்கனவே உருவான “விஜய் Vs திமுக” என்ற நேர்க்கோடு அவரை ஒரு முதன்மை போட்டியாளராக மாற்றிவிட்டது. எனவே, வரும் தேர்தல்களில் தவெகவின் வெற்றியை தடுப்பது என்பது வெறும் தேர்தல் வியூகங்களால் மட்டுமே சாத்தியப்படாது; அது மக்களின் மனநிலையை பொறுத்தே அமையும் என்பதால் தமிழக அரசியல் களம் ஒரு பெரும் மாற்றத்தை எதிர்நோக்கி காத்திருக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
