தமிழ்நாடு அரசியல் களம், விஜய்யின் தமிழக வெற்றிக் கழகம் என்ற கட்சி தொடங்கிய பிறகு, புதியதொரு திருப்பத்தை எட்டியுள்ளது. 2026 சட்டமன்ற தேர்தலை இலக்காக கொண்டு களமிறங்கும் விஜய், ஆரம்பத்தில் தனித்துப் போட்டி என்ற தீவிர நிலைப்பாட்டை எடுப்பார் என எதிர்பார்க்கப்பட்டது. ஆனால், அண்மைய அரசியல் நகர்வுகளும், ஆலோசனைகளும், அவர் தனது நிலைப்பாட்டில் இருந்து விலகி, யதார்த்தத்தை உணர்ந்து, ஒரு முக்கியமான கூட்டணி வியூகத்தை நோக்கி நகரலாம் என்ற கேள்வியை எழுப்பியுள்ளன.
‘தனித்துப் போட்டி’ ஏன் நடைமுறைக்கு சாத்தியமில்லை?
ஒரு புதிய கட்சி, அதன் முதல் தேர்தலிலேயே தமிழ்நாட்டின் ஆழமான வேரூன்றிய திராவிட கட்சிகள் மற்றும் வலுவான தேசிய கட்சிகளின் கூட்டணியை எதிர்த்து தனித்து போட்டியிட்டு ஆட்சியைப் பிடிப்பது என்பது நடைமுறையில் மிகவும் கடினமான ஒரு சவாலாகும்.
திமுக மற்றும் பாஜகவை ஒரே நேரத்தில் எதிர்ப்பது:
த.வெ.க.வின் ஆரம்ப இலக்கு, தமிழ்நாட்டின் தற்போதைய அதிகார மையமான திமுக மற்றும் தேசிய அளவில் வலுப்பெற்று வரும் பாஜக ஆகிய இரு துருவங்களையும் ஒரே நேரத்தில் எதிர்ப்பதாக கூறப்படுகிறது.
ஆனால் திமுகவின் கட்டமைப்பும், ஆளும் பலமும், நீண்டகால அனுபவமும் எளிதில் அசைக்க முடியாதவை. அதேபோல் பாஜக தலைமையிலான தேசிய ஜனநாயகக் கூட்டணியில் உள்ள அதிமுக கணிசமான வாக்கு வங்கி மற்றும் பாஜகவின் தேசிய அரசியலின் பலம், நிதி ஆதாரம் மற்றும் ஊடக பலம் ஆகியவற்றை கொண்டுள்ளது.
இந்த இரு மாபெரும் சக்திகளையும் ஒரே நேரத்தில் தனித்து எதிர்கொண்டால், புதிய கட்சியான த.வெ.க.வின் வாக்குகள் பிரியவும், இரண்டாம் நிலை அல்லது மூன்றாம் நிலைக்கே தள்ளப்படவும் வாய்ப்புள்ளது. இது 2031 இலக்கை சிதைக்கும்.
234 தொகுதிகளிலும் தனித்து போட்டியிடுவதென்பது ஒரு புதிய கட்சிக்கு, குறிப்பாக, சினிமா துறையில் இருந்து வரும் தலைவருக்கு, நிதி சுமையை சமாளிப்பது, தேர்தல் விதிகள் மற்றும் கண்காணிப்புகளுக்கு மத்தியில் கடினமாகும். விஜய்யின் அடையாளத்தை அரசியலில் பதிவு செய்வதற்கும், அடையாளத்தை நிலைநாட்டுவதற்கும் ‘தனித்து’ போட்டியிடுவது ஒரு வழியாக இருக்கலாம். ஆனால், ‘ஆட்சியைப் பிடிப்பது’ என்ற இலக்குக்கு அது உதவாது.
இதனால் தான் விஜய் அவசரமாக ஆட்சியை பிடிப்பதை விட, தனது முதல் தேர்தலில் ஒரு சமமான மற்றும் நிலையான அரசியல் அடித்தளத்தை உருவாக்குவதையே முக்கியமாக கருதலாம்.
முதல் தேர்தலில் ஒரு வலுவான கூட்டணியில் அங்கம் வகிப்பதன் மூலம், தனது கட்சியின் நிஜமான வாக்கு வங்கி எவ்வளவு, களத்தில் உள்ள நிர்வாகிகள் பலம் என்ன என்பதை கணிக்க முடியும். கூட்டணியில் அங்கம் வகித்து வெற்றி பெற்றால், ஆட்சியின் ஒரு பகுதியாக செயல்பட முடியும். இது அரசின் செயல்பாடுகளில் அனுபவம் பெறவும், களத்தில் மக்களுக்கு நேரடியாக உதவவும், 2031ஆம் ஆண்டுக்கு தேவையான அரசியல் அதிகாரத்தை கற்றுக்கொள்ளவும் உதவும்.
ஒரு வலுவான கூட்டணி கட்சியுடன் இணைந்து தேர்தலை சந்தித்தால், மக்கள் மத்தியில் த.வெ.க.வின் பிம்பம் எளிதில் சேதமடையாமல், அனைவரையும் ஒன்றிணைக்கும் மாற்று சக்தி என்ற அடையாளத்தை நிலைநிறுத்த முடியும். ஐந்து ஆண்டு ஆட்சியில் மக்களிடம் நல்ல பெயர் வாங்கினால், 2031ஆம் ஆண்டில் தனித்து ஆட்சி அமைப்பதற்கு ஒரு வாய்ப்பாக அமையும்.
விஜய் தனித்து போட்டியிடும் முடிவில் இருந்து விலகி, ஒரு பிரதான கட்சியுடன் கூட்டணி வைப்பது என்ற யதார்த்தமான முடிவுக்கு வந்தால், அவருக்கு முன் உள்ள பிரதான வாய்ப்புகள் இரண்டு மட்டுமே. ஒன்று அதிமுக – பாஜகவுடன் கூட்டணி வைப்பது. இந்த கூட்டணியில் இணைந்தால் தேசிய அளவில் ஆட்சியில் இருக்கும் பாஜக ஆதரவு மற்றும் மாநில அளவில் கட்டமைப்பில் வலுவாக இருக்கும் அதிமுகவின் ஆதரவு கிடைக்கும். முக்கியமாக பூத் கமிட்டி ஆதரவு சிறப்பாக கிடைக்கும்.
ஆனால் அதே நேரத்தில் பாஜகவுடன் கூட்டணி வைத்தால், தமிழ்நாட்டில் உள்ள கணிசமான சிறுபான்மையினர் வாக்குகள் மற்றும் திராவிட ஆதரவாளர்களின் வாக்குகள் முழுமையாக த.வெ.க.வை விட்டு விலக வாய்ப்புள்ளது. இது விஜய்க்கு ஒரு பாதிப்பு என்பதையும் மறுக்க முடியாது. அதேபோல் முதல்வர் பதவி கிடைக்காவிட்டால் கூட்டணியில் விஜய் ஒரு இரண்டாம் கட்ட தலைவராகிவிடவும் வாய்ப்பு உண்டு.
ஒருவேளை விஜய், காங்கிரஸ் கட்சியுடன் இணைந்தால், த.வெ.க.வின் மதச்சார்பற்ற பிம்பம் வலுப்பெறும். இது சிறுபான்மையினர் வாக்குகளை பெறுவதற்கு சாதகமாக இருக்கும். திமுகவுக்கு எதிரான தவெக- காங்கிரஸின் கூட்டணி, திராவிட களத்தில் ஒரு மாற்று சக்தியாக நிலைநிறுத்த உதவும்.
தேசிய அளவில் பலவீனமாக இருக்கும் காங்கிரஸுடன் கூட்டணி அமைத்தால், மாநில அளவில் அந்தக் கூட்டணிக்குத் தலைமை ஏற்கும் வாய்ப்பு விஜய்க்கு தான் கிடைக்கும். முதல்வர் வேட்பாளராகவும் விஜய்யை அறிவிக்கலாம். தவெக – காங்கிரஸ் கூட்டணி அமைந்தால் விஜய்யின் இளைஞர்கள் பட்டாளம், சிறுபான்மையர் மற்றும் திராவிட கட்சிகளின் எதிர்ப்பு ஓட்டுக்களை மொத்தமாக அள்ளி ஆட்சி அமைக்கவும் வாய்ப்பு உண்டு.
ஆட்சி உறுதி இல்லாமை: காங்கிரஸ் தலைமையிலான கூட்டணி (அதிமுக இல்லாத பட்சத்தில்) என்பது, திமுகவின் பலத்தை முறியடித்து ஆட்சியைப் பிடிக்கும் அளவுக்கு வலுவாக இருக்குமா என்பது சந்தேகம்.
எனவே, விஜய் எடுக்க போகும் இறுதி முடிவு, எந்த கூட்டணியில் இணைந்தால், அவர் எளிதாகவும், வேகமாகவும் ஆட்சியின் அங்கமாக மாற முடியும் என்பதை பொறுத்தே அமையும். எந்த கூட்டணியை விஜய் முடிவு செய்தாலும் ஆட்சி நிச்சயம், ஆனால் தனித்து போட்டியிடுவது என்பது ரொம்ப ரிஸ்க். தனித்து போட்டியிட்டு ஒருவேளை திமுக ஆட்சிக்கு வந்துவிட்டால் அடுத்த ஐந்து வருடங்கள் அரசியல் செய்வது விஜய்க்கு மிகப்பெரிய சவாலாக இருக்கும்.
விஜய் இந்த யதார்த்தத்தை புரிந்து கொண்டு என்ன முடிவெடுப்பார் என்பதை பொறுத்திருந்து பார்ப்போம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
