விஜய்யின் ‘தமிழக வெற்றிக் கழகம்’ தொடங்கியுள்ள அரசியல் பிரவேசம், தமிழகத்தில் உள்ள திராவிட கட்சிகள் மட்டுமின்றி, தேசியக் கட்சிகளான பாஜக மற்றும் காங்கிரஸுக்கும் புதிய அரசியல் வாய்ப்புக்கான மைய புள்ளியாக மாறியுள்ளது. மத்தியில் ஆளும் பாஜக மற்றும் மாநிலத்தில் ஆளும் திமுகவின் முக்கிய கூட்டணி கட்சியான காங்கிரஸ் ஆகிய இரு வேறு துருவங்களும் தற்போது விஜய்யை தங்கள் பக்கம் ஈர்க்க போட்டி போடுகின்றன. இதன் விளைவாக, விஜய் எந்தப் பக்கம் சென்றாலும், ஆளுங்கட்சியான திமுகவுக்கு பெரும் சிக்கல் தான் என்பது தமிழக அரசியல் களத்தில் உறுதியாகியுள்ளது.
விஜய்யின் எழுச்சிக்கு மத்தியில், தமிழக அரசியலில் பெரும் திருப்பத்தை ஏற்படுத்தியுள்ள சமீபத்திய நிகழ்வு, கரூர் சம்பவம் ஆகும். இந்த சட்டம்-ஒழுங்குப் பிரச்சனை, மத்திய உள்துறை அமைச்சர் அமித்ஷா தலைமையிலான பாஜகவுக்கு அரசியல் செய்ய ஒரு பெரிய வாய்ப்பாக மாறியுள்ளது.
அமித் ஷா ஏற்கனவே திமுக ஆட்சியை வீழ்த்துவதாக சூளுரைத்துள்ள நிலையில், கரூர் விவகாரம் அதை சாத்தியப்படுத்துவதற்கான ஒரு ஆயுதமாக மாற்ற முயற்சிக்க வாய்ப்பு உண்டு. அதனால் அவருடைய அறிவுறுத்தலால் மத்திய நிதி அமைச்சர் நிர்மலா சீதாராமன் நேரடியாக சென்று பாதிக்கப்பட்டவர்களை சந்தித்தது, அதன் தொடர்ச்சியாக NDA கூட்டணியின் எம்பிக்கள் அடங்கிய குழு தமிழகத்தில் முகாமிட்டிருப்பது ஆகியவை, டெல்லி இந்த விவகாரத்தை ஒரு மாநில பிரச்சனையாகக் கருதாமல், தேசிய பாதுகாப்பு மற்றும் சட்ட ஒழுங்கு பிரச்சனையாக அணுகுவதை காட்டுகிறது.
நிர்மலா சீதாராமன் தமிழர் மற்றும் தமிழ் தெரிந்தவர் என்பதால் தான் அமித்ஷா அவரை தேர்ந்தெடுத்துள்ளார் என்றும், அதேபோல் ஹேமாமாலினி பிறந்த ஊர் திருச்சி என்பதால் அவருடைய தலைமையில் ஒரு குழுவை அமித்ஷா அமைத்துள்ளார் என்றும் கூறப்பட்டு வருகிறது.
ஹேமாமாலினி தலைமையிலானகுழு சமர்ப்பிக்கும் அறிக்கை, வரவிருக்கும் நாடாளுமன்ற கூட்டத்தொடரில் திமுகவை பாஜக எம்பிக்கள் கடுமையாக விமர்சனம் செய்ய பயன்படுத்தப்பட வாய்ப்பு உள்ளது. தமிழகத்தில் சட்டம்-ஒழுங்கின் சீர்குலைவு மற்றும் ஊழல் ஆகிய குற்றச்சாட்டுகளை வலுவாக முன்வைத்து, திமுகவின் அரசு மீது நம்பிக்கையின்மையை தூண்டவே பாஜக வியூகம் வகுக்கிறது என்று அமித் ஷாவின் பார்வையில், கரூர் சம்பவம் திமுகவை பலவீனப்படுத்த ஒரு வாய்ப்பாக கருதுவதாகவும் டெல்லி வட்டாரங்கள் கூறுகின்றன.
பாஜகவைப் பொறுத்தவரை, தமிழகத்தில் வெற்றிபெற ஒரு வலிமையான பிராந்திய கூட்டணியோ அல்லது ஒரு மக்கள் செல்வாக்குள்ள முகமோ அவசியம். அதிமுக பிளவுபட்டுள்ள நிலையில், விஜய்யை தங்கள் பக்கம் இழுக்க பாஜக தீவிரமாக முயற்சி செய்கிறது. விஜய்யின் மிகப்பெரிய பலம், திராவிட கட்சிகள் மீது வெறுப்பு கொண்டுள்ள லட்சக்கணக்கான இளைஞர்களின் வாக்குகள் ஆகும். இந்த இளைஞர் கூட்டம் பாஜகவின் தேசியவாத சித்தாந்தத்தை நோக்கி ஒரு மாற்று சக்தியை தேட வாய்ப்புள்ளது.
விஜய், மத்தியில் ஆளும் பாஜகவை விமர்சித்தாலும், அவரின் பிரதான அரசியல் இலக்கு திமுக மற்றும் அதிமுக ஆகிய இரு திராவிட கட்சிகளும்தான். இந்த இலக்கை பகிர்ந்துகொள்வதன் மூலம், திமுக எதிர்ப்பு வாக்குகளை ஒருங்கிணைக்க விஜய்யுடன் கூட்டணி அமைப்பது பாஜகவுக்கு சாதகமான அம்சமாக அமையும்.
கரூர் விவகாரத்தில், பாஜகவின் கவனம் திமுகவை நோக்கி மட்டுமே இருக்கிறதே தவிர, விஜய்யை நோக்கி இல்லை. இது, விஜய்யுடன் இணக்கமான ஒரு அரசியலை உருவாக்க பாஜக விரும்புவதைக்குறிக்கிறது. அமித்ஷாவுடன் விஜய் சந்திப்பு நடந்தால், அது தமிழக அரசியலின் போக்கை முழுமையாக மாற்றிவிட வாய்ப்பு உண்டு.
பாஜக ஒருபுறம் நெருக்கடி கொடுக்க, திமுகவின் கூட்டணியில் அங்கம் வகிக்கும் காங்கிரஸ் கட்சி, விஜய்யை அணுகுவதுதான் திமுகவுக்கு மிகப்பெரிய திருப்பமாக பார்க்கப்படுகிறது. ராகுல் காந்தி தொலைபேசி மூலம் விஜய்யுடன் பேசியதாக வரும் தகவல்கள், திமுகவுக்கு பெரும் அதிர்ச்சியை கொடுத்துள்ளது. காங்கிரஸ், தேசிய அளவில் இந்திய கூட்டணியின் ஒரு பகுதியாக இருந்தாலும், தமிழகத்தில் திமுகவின் ஆதிக்கம் தங்களுக்கு சாதகமாக இல்லை என்று கருதினால், விஜய்யை ஒரு மாற்று சக்தியாகப் பயன்படுத்த முயற்சிக்கலாம்.
ராகுல் காந்தி இப்படி ஒரு நகர்வை எடுப்பது, ஒன்று விஜய்யுடன் கூட்டணி அமைக்க முயற்சிக்கலாம், அல்லது 2026 சட்டமன்ற தேர்தலில் திமுகவிடம் இருந்து அதிக சட்டமன்ற தொகுதிகளை பெறுவதற்காக, விஜய்யை பயன்படுத்தலாம் என்றும் கூறப்பட்டு வருகிறது.
இரு தேசிய கட்சிகளும் விஜய்யை நெருங்கி வரும் நிலையில் விஜய் என்ன முடிவெடுப்பார் என்பது தான் தற்போது மில்லியன் டாலர் கேள்வி. ஒருவேளை விஜய் அதிமுக – பாஜக கூட்டணியில் இணைந்தால் திமுக ஒரு வலிமையான எதிரணியை எதிர்கொள்ள நேரிடும். இது திமுகவுக்கு மிகப்பெரிய சவாலாக அமையும்.
இன்னொன்று விஜய், காங்கிரஸ் உடன் கூட்டணி வைத்தால், அது கூட்டணிக்கு கூடுதல் பலத்தை கொடுக்கும். ஒட்டுமொத்த சிறுபான்மையர் ஓட்டு இந்த கூட்டணிக்கு போக வாய்ப்பு. காங்கிரஸ் வெளியேறினால் விசிகவும் வெளியேற வாய்ப்பு அதிகம் என்றே அரசியல் விமர்சகர்கள் கருத்து தெரிவித்து வருகின்றனர்.
ஒருவேளை பாஜக, காங்கிரஸ் ஆகிய இரண்டு கட்சிகளுடனும் சேராமல் விஜய் தனித்து போட்டியிட்டால் எந்த கட்சிக்கும் மெஜாரிட்டி கிடைக்காமல் தொங்கு சட்டசபை ஏற்பட வாய்ப்பு. தேர்தலுக்கு பின் ஆட்சியமைக்க விஜய் ஒரு கூட்டணியை உருவாக்கலாம், அல்லது மீண்டும் தேர்தல் நடத்தப்படலாம்.
மொத்தத்தில் கரூர் சம்பவத்திற்கு பின் தமிழக அரசியலில் விஜய் ஒரு மாற்று சக்தி அல்ல, அவர் ஒரு முக்கியமான மையப்புள்ளி ஆக மாறிவிட்டார். அவரது முடிவு, தமிழகத்தின் எதிர்கால அரசியலை தலைகீழாக மாற்றும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
