மத்திய உள்துறை அமைச்சர் அமித்ஷா அவர்கள், இந்தியாவின் அரசியல் ராஜதந்திரியாகவும், தேர்தல் வியூகங்களை வகுப்பதில் நிகரற்றவராகவும் கருதப்படுகிறார். அவர் எந்த மாநிலத்தின் மீது தன் கவனத்தை குவித்தாலும், அங்கு பா.ஜ.க.வோ அல்லது அதன் கூட்டணியோ குறிப்பிடத்தக்க வெற்றியை பெற்றிருக்கிறது என்பதே வரலாறு. இந்த நிலையில், அமித்ஷா தற்போது தமிழக சட்டமன்றத் தேர்தலை இலக்கு வைத்து, வியூகத்தை வகுத்து வருவதாக அரசியல் வட்டாரங்கள் தெரிவிக்கின்றன.
பீகாரில் பா.ஜ.க. தலைமையிலான தேசிய ஜனநாயகக் கூட்டணி பெற்ற வெற்றியை தொடர்ந்து, அந்த ஃபார்முலாவின் ஒரு பகுதியை மட்டும் தமிழகத்தில் பயன்படுத்தவும், மீதமுள்ள பகுதிகளுக்கு தமிழ் மண்ணுக்கேற்றவாறு புதிய ஃபார்முலாக்களை உருவாக்கவும் அமித்ஷா திட்டமிட்டுள்ளார்.
பீகார் ஃபார்முலாவின் மிக முக்கியமான அம்சம், “கூடி வாழ்ந்தால் கோடி நன்மை” என்ற கோட்பாடே ஆகும். பலமான எதிர்க்கட்சியை எதிர்கொள்ள, சிதறியிருக்கும் வாக்குகளை ஒருங்கிணைப்பதே முதன்மையான உத்தி. பீகாரில் சிராக் பாஸ்வான், ஜிதன் ராம் மஞ்சி போன்ற சிறிய தலைவர்களையும், மாநில கட்சிகளையும் அரவணைத்து சென்றது போலவே, தமிழகத்திலும் கூட்டணிக்கு இன்னும் வலிமை சேர்க்க அமித்ஷா வியூகம் வகுத்துள்ளார். அ.தி.மு.க. மற்றும் பா.ஜ.க. ஆகியவை பிரதான பலமாக இருந்தாலும், த.மா.கா., புதிய தமிழகம் , இந்திய ஜனநாயக கட்சி, புதிய தமிழகம், ஜான் பாண்டியன் போன்ற சிறிய மற்றும் ஓரளவு செல்வாக்குள்ள தேமுக, பாமக போன்ற கட்சிகளை விடாமல் இணைத்து, ஒட்டுமொத்த வாக்கு பலத்தை சிதறாமல் பாதுகாக்க வேண்டும் என்பதே அமித்ஷாவின் முதல் இலக்கு.
சாதி அடிப்படையிலான வாக்குகளை சிதறவிடாமல், மாநில தலைவர்கள் மூலம் அந்த வாக்குகளைத் தங்கள் கூட்டணிக்கு திருப்பும் பணியை அமித்ஷா தீவிரப்படுத்தியுள்ளார். இது பீகாரில் வெற்றியை உறுதிசெய்த முக்கிய காரணமாகும்.
அமித்ஷாவின் அரசியல் வியூகங்களின் வெற்றி விகிதம் மிக அதிகம். எனவே, அவர் கை வைத்தால் அது தவறாக போனதில்லை என்ற நம்பிக்கை பா.ஜ.க. தொண்டர்கள் மத்தியில் ஆழமாக வேரூன்றியுள்ளது.
ஆனால் அதே நேரத்தில் தமிழகத்தின் அரசியல் சூழல், வட மாநிலங்களை போல் மத அல்லது இந்துத்துவ சித்தாந்தத்தை உடனடியாக ஏற்றுக்கொள்வதில்லை. எனவே, பீகார் ஃபார்முலாவின் மற்ற பகுதிகளை தமிழகத்திற்கு ஏற்ப மாற்றியமைக்க அமித்ஷா திட்டமிட்டுள்ளார்.
தமிழகத்தில் பா.ஜ.க.வை வளர்க்க முற்போக்கான முயற்சிகள் நடந்தாலும், பிரதான தேர்தல் முழக்கம் இந்துத்துவமாக இருக்காது என்று முடிவெடுக்கப்பட்டுள்ளது. மாறாக, தமிழர்கள் நாட்டின் மீது மிகுந்த பற்று கொண்டவர்கள் என்பதால் தேசிய நீரோட்டத்தின் பக்கம் கவனத்தை செலுத்த வேண்டியது அவசியம். மேலும் மத்திய அரசின் வளர்ச்சி திட்டங்கள் , தமிழகத்தின் அடிப்படை கட்டமைப்புத் தேவைகள் மற்றும் ஊழலற்ற நிர்வாகம் போன்ற விஷயங்களே முன்னிறுத்தப்படும்.
பா.ஜ.க.வின் மாநில தலைவர்கள் தங்கள் சித்தாந்தத்தை கட்டாயம் முன்னெடுத்தாலும், தேர்தல் மேடைகளில் திராவிட கட்சிகளுக்கு எதிரான மென்மையான அணுகுமுறையை எடுக்க அமித்ஷா உத்தரவிட்டிருப்பதாகக் கூறப்படுகிறது. காரணம், கூட்டணியின் பிரதான தலைமையான அ.தி.மு.க.வின் வாக்குகள் திராவிட உணர்வு கொண்டவை.
தி.மு.க. ஆட்சியில் உள்ள குறைபாடுகளை துல்லியமாக கண்டறிந்து, அதை மட்டுமே மக்கள் மத்தியில் கொண்டு செல்ல அமித்ஷா அறிவுறுத்தியுள்ளார். மாநிலத்தின் நிதி நெருக்கடி, கடன் சுமை, மற்றும் மத்திய அரசின் திட்டங்களை மாநில அரசு சரியாக செயல்படுத்தாதது போன்ற நிர்வாக சீர்கேடுகளை மட்டுமே பிரதான பேசுபொருளாக மாற்ற வேண்டும். அதேபோல் சட்டம்-ஒழுங்கு விவகாரங்கள் மற்றும் அரசு நிர்வாகத்தில் உள்ள தொய்வுகளை தொடர்ந்து ஆணித்தரமாக எழுப்பி, ஆட்சி குறைபாடுகளுக்கு முக்கியத்துவம் அளிப்பது பா.ஜ.க.வின் வியூகமாக இருக்கும்.
தி.மு.க.வின் பிரதான பலமாக பார்க்கப்படும் வாரிசு அரசியலை ஒரு பெரிய பலவீனமாக கையில் எடுக்க அமித்ஷா திட்டமிட்டுள்ளார். தமிழ்நாட்டில் ஆழமாக வேரூன்றியுள்ள குடும்ப மற்றும் வாரிசு அரசியலுக்கு எதிராக பிரசாரம் செய்வது, இளைஞர்கள் மற்றும் நடுநிலையான வாக்காளர்களை கவரும் என்று நம்பப்படுகிறது. அடுத்த தலைமுறைக்கு தலைமை பொறுப்பை ஒப்படைக்காதது” மற்றும் அதிகாரத்தை குடும்ப உறுப்பினர்களுக்குள் சுழலவிடுவது” போன்ற குற்றச்சாட்டுகளை தீவிரமாக முன்னெடுத்து செல்வது பா.ஜ.க.வுக்குச் சாதகமான அலையை உருவாக்கக்கூடும் என்றும் பாஜக தலைமை கணித்துள்ளதாக கூறப்படுகிறது.
தமிழகத்தை இலக்கு வைத்திருக்கும் அமித்ஷா, வரும் மாதங்களில் தமிழகத்தின் மூத்த அரசியல் தலைவர்கள் மற்றும் கூட்டணி கட்சித் தலைவர்களுடன் பல சுற்று பேச்சுவார்த்தையை நடத்தவுள்ளார். கூட்டணிக்குள் ஒரு வலுவான ஒருங்கிணைப்பு மற்றும் அ.தி.மு.க.வுடன் இணக்கமான சீட் பங்கீட்டை உறுதி செய்வது அவரது உடனடி பணியாகும். பா.ஜ.க.வின் வளர்ச்சிக்கு தேவையான இடங்களை உறுதி செய்வதில் சமரசம் இருக்காது என்றும், அதே சமயம் கூட்டணிக்குள் விரிசல் வராமல் கையாளப்பட வேண்டும் என்றும் எதிர்பார்க்கப்படுகிறது.
தேர்தல் தேதி நெருங்கும் வரை தமிழகத்தின் அரசியல் போக்கை தொடர்ந்து கண்காணித்து, தேவைப்படும் இடங்களில் நேரடியாக தலையிட்டு வியூகங்களை மாற்றியமைக்க அமித்ஷா தயாராகி வருகிறார்.
மொத்தத்தில், அமித்ஷாவின் கள இறக்கம் என்பது, தமிழக அரசியல் இனி வெறும் உள்ளூர் தலைவர்களின் கையில் மட்டுமில்லை, டெல்லியின் நேரடி கட்டுப்பாட்டில், மிகுந்த ராஜதந்திரத்துடன் கையாளப்படும் ஒரு தேர்தலாக இருக்கும் என்பதை குறிக்கிறது. அவர் வகுக்கும் புதிய ஃபார்முலா, திராவிட மண்ணில் பா.ஜ.க.வின் வரலாற்றை மாற்றி எழுதுமா என்பதை பொறுத்திருந்துதான் பார்க்க வேண்டும்
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
