தமிழக அரசியலில் 2026 சட்டமன்ற தேர்தலை முன்னிட்டு கூட்டணி கணக்குகள் உச்சக்கட்டத்தை எட்டியுள்ளன. பிரதமர் நரேந்திர மோடியின் சமீபத்திய மதுரை வருகை, தேசிய ஜனநாயகக் கூட்டணியில் சலசலப்பை ஏற்படுத்தியுள்ளது. குறிப்பாக, அதிமுக பொதுச்செயலாளர் எடப்பாடி பழனிசாமிக்கும் பாஜக மேலிடத்திற்கும் இடையே தொகுதிப் பங்கீட்டில் கடும் இழுபறி நீடிக்கிறது. மதுரையில் நடைபெற்ற ஆலோசனை கூட்டத்தில், மத்திய அமைச்சர் பியூஷ் கோயல் வழங்கிய தொகுதிகள் பட்டியலை கண்டு எடப்பாடி பழனிசாமி அதிருப்தி அடைந்ததாக கூறப்படுகிறது. பாஜக தரப்பில் முன்வைக்கப்படும் ‘பேக்கேஜ்’ முறையிலான தொகுதி பங்கீட்டை அதிமுக ஏற்க மறுப்பதால், கூட்டணியில் விரிசல் விழுமோ என்ற அச்சம் தொண்டர்களிடையே எழுந்துள்ளது.
பாஜக இந்த முறை தமிழகத்தில் தனது பிடியை வலுவாக்க துடிக்கிறது. கடந்த 2024 நாடாளுமன்ற தேர்தலில் 11.7 சதவீத வாக்குகளை பெற்றதை சுட்டிக்காட்டி, சுமார் 35 தொகுதிகளை தங்களுக்கு ஒதுக்க வேண்டும் என்று டிமாண்ட் வைக்கிறது. மேலும், தங்களை நம்பி வந்துள்ள டி.டி.வி.தினகரனின் அமமுக, ஜி.கே.வாசனின் தமாகா உள்ளிட்ட கட்சிகளுக்கு தாங்களே தொகுதிகளை பிரித்து வழங்குவதாகவும், அதற்கு மொத்தமாக 70 இடங்களை அதிமுக ஒதுக்கிவிட வேண்டும் என்றும் பாஜக கோருகிறது. ஆனால், 170 தொகுதிகளுக்கு குறையாமல் போட்டியிட விரும்பும் எடப்பாடி பழனிசாமி, பாஜகவிற்கு 25 இடங்களுக்கு மேல் தர முடியாது என்பதில் பிடிவாதமாக உள்ளார்.
கூட்டணிக்குள் மற்ற கட்சிகளும் தங்கள் பங்கிற்கு போர்க்கொடி தூக்கியுள்ளன. பாமக ஏற்கனவே அதிமுகவுடன் ஒப்பந்தம் செய்திருந்தாலும், திமுக கூட்டணிக்கு தேமுதிக சென்றதை தொடர்ந்து தங்களுக்குக் கூடுதல் இடங்கள் வேண்டும் என்று நெருக்கடி கொடுக்கிறது. குறிப்பாக வட தமிழகத்தில் தங்களின் பலத்தை நிரூபிக்க 18 இடங்களுக்கு மேல் எதிர்பார்ப்பதாக அன்புமணி ராமதாஸ் தரப்பு தெரிவிக்கிறது.
அதேபோல், அமமுக பொதுச்செயலாளர் டி.டி.வி.தினகரன், கடந்த தேர்தலில் அதிமுகவின் தோல்விக்கு தங்களே காரணமாக இருந்ததை சுட்டிக்காட்டி, கௌரவமான எண்ணிக்கையில் இடங்களை கேட்கிறார். சிறிய கட்சிகளான புதிய தமிழகம் மற்றும் ஜான் பாண்டியன் தரப்பும் தங்கள் கோரிக்கைகளை வலுவாக முன்வைக்கின்றன.
டெல்லியில் அமித்ஷாவை சந்தித்த எடப்பாடி பழனிசாமிக்கு சில முக்கிய அறிவுறுத்தல்கள் வழங்கப்பட்டுள்ளன. திமுக அரசுக்கு எதிரான மனநிலையை சரியாக பயன்படுத்திக்கொள்ள அதிமுக தவறிவிட்டதாக மத்திய உளவுத்துறை அறிக்கை அளித்துள்ளதை அமித்ஷா சுட்டிக்காட்டியுள்ளார். மேலும், “கூட்டணிக்கு நீங்களே தலைமை தாங்குவதால், தேர்தலுக்கான செலவு பொறுப்பையும் அதிமுகவே ஏற்க வேண்டும்” என்று டெல்லி கறாராக சொல்லிவிட்டதாக தெரிகிறது. இது எடப்பாடி பழனிசாமிக்கு கூடுதல் சுமையை ஏற்படுத்தியுள்ளது. ஒருபுறம் தொகுதி பங்கீடு, மறுபுறம் தேர்தல் செலவு என இருமுனை தாக்குதலை அவர் எதிர்கொண்டு வருகிறார்.
இந்த குழப்பங்களுக்கு மத்தியில், மார்ச் 11-ம் தேதி பிரதமர் மோடி மீண்டும் திருச்சிக்கு வருகை தரவுள்ளார். அதற்குள்ளாக கூட்டணி பிரச்சனைகளை முடிவுக்கு கொண்டுவர பாஜக மேலிடம் முனைகிறது. மார்ச் 6-ம் தேதி சுபமுகூர்த்த நாளில் தொகுதி பங்கீடு ஒப்பந்தங்கள் கையெழுத்தாக வாய்ப்புள்ளதாக கூறப்படுகிறது. அதிமுக தனது பிடிவாதத்தை குறைத்துக்கொண்டு இறங்கி வருமா அல்லது கூட்டணி கட்சிகள் அதிமுகவின் நிபந்தனைகளுக்கு கட்டுப்படுமா என்பது இன்னும் சில தினங்களில் தெரிந்துவிடும். திருச்சியில் மோடி பங்கேற்கும் மேடையில் புதிய கட்சிகள் இணையும் என்று எதிர்பார்க்கப்படுவதால், தமிழக அரசியல் களம் அனல் பறக்கிறது.
திமுக தலைமையிலான கூட்டணி வலுவாக இருக்கும் நிலையில், எதிர்க்கட்சி கூட்டணியில் நிலவும் இந்த இழுபறி ஆளுங்கட்சிக்கு சாதகமாக அமையக்கூடும் என அரசியல் விமர்சகர்கள் கருதுகின்றனர். எடப்பாடி பழனிசாமி தனது செல்வாக்கை தக்கவைக்கப் போராடும் அதே வேளையில், தமிழகத்தில் காலூன்ற துடிக்கும் பாஜகவின் வியூகங்களும் மோதிக்கொள்கின்றன. இந்த தேர்தல் போரில் யார் வெற்றி பெறுவார்கள் என்பது தொகுதிப் பங்கீடு முடிவாகும் போதே தெரிந்துவிடும். 2026 தேர்தல் என்பது தமிழகத்தின் எதிர்காலத்தைத் தீர்மானிக்கும் ஒரு முக்கியப் புள்ளியாக இருக்கும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
