நடிகர் விஜய்யின் ‘தமிழக வெற்றிக் கழகம்’ 2026 சட்டமன்ற தேர்தலை தனித்து போட்டியிடும் முடிவை எடுத்திருப்பது தமிழ்நாட்டின் அரசியல் களத்தில் புதிய திருப்பத்தை ஏற்படுத்தியுள்ளது. அதிமுக, காங்கிரஸ், பாமக, தேமுதிக போன்ற கட்சிகளுடன் கூட்டணி அமைக்கும் எண்ணம் இல்லை என்று விஜய் திட்டவட்டமாக அறிவித்துள்ளதாக அரசியல் வட்டாரங்கள் தெரிவிக்கின்றன. இதன் மூலம், தமிழக அரசியல் வரலாற்றில் ஒரு மாற்று அரசியல் சக்தியாக அவர் தன்னை நிலைநிறுத்திக்கொள்ள முயல்கிறார்.
விஜய்யின் இந்த முடிவுக்கு பின்னால் தெளிவான உத்தி இருப்பதாகவே அரசியல் நோக்கர்கள் கருதுகின்றனர். அவர் பிரதான திராவிட கட்சிகள் மற்றும் பிற கட்சிகளுடன் கைகோர்க்க விரும்பவில்லை. மாறாக, சில மாற்று சிந்தனை கொண்ட, மக்கள் மத்தியில் செல்வாக்கு பெற்ற தலைவர்கள் மட்டும் கட்சியில் இணைய வந்தால் அவர்களை வரவேற்போம் என்று அவர் தெரிவிப்பது, தமிழக அரசியலின் கூட்டணிக் கலாசாரத்தை உடைத்து ஒரு புதிய தலைமைத்துவத்தை உருவாக்க அவர் விரும்புவதை காட்டுகிறது.
இதன் மூலம், ஊழல் அரசியலுக்கு மாற்று நான் தான் என்ற பிம்பத்தை மக்களிடம் ஆழமாக பதிய வைக்க முடியும் என்று விஜய் நம்புவதாக தெரிகிறது. பிரதான கட்சிகளுடன் கூட்டணி அமைப்பது, அவர்கள் மீது உள்ள அதிருப்தி வாக்குகளை பிரிக்கும்; மாறாக, தனித்து நிற்பதன் மூலம் அதிருப்தி வாக்குகளையும், புதிய வாக்காளர்களையும் ஒட்டுமொத்தமாக தன் பக்கம் இழுக்க முடியும் என்று த.வெ.க. திட்டமிடுகிறது.
விஜய் 2026 தேர்தலுக்கு இரண்டு முக்கிய இலக்குகளை நிர்ணயித்துள்ளதாக கூறப்படுகிறது: ஒன்று, இளம் தலைமுறை மற்றும் மாற்றத்தை விரும்பும் மக்கள் ஆதரவுடன் பெரும்பான்மை பெற்று ஆட்சியை பிடிப்பது. மற்றொன்று, முழுமையான வெற்றி கிடைக்காவிட்டாலும், எந்த கட்சிக்கும் தனிப்பெரும்பான்மை கிடைக்காமல், த.வெ.க கணிசமான எம்.எல்.ஏக்களை பெற்று, ஒரு ‘கிங்மேக்கர்’ சக்தியாக உருவெடுப்பது. தொங்கு சட்டசபை ஏற்பட்டால், த.வெ.க-வின் ஆதரவின்றி எந்த அரசும் அமைய முடியாத சூழல் உருவாகும். இது, விஜய்யின் அரசியல் செல்வாக்கை ஒரே இரவில் பல மடங்கு உயர்த்தும்.
விஜய் தனது இலக்குகளில் வெற்றி பெற்றால், அது தமிழ்நாட்டில் அரை நூற்றாண்டுக்கும் மேலாக ஆதிக்கம் செலுத்தி வரும் திராவிட அரசியலின் வீழ்ச்சிக்கு ஆரம்ப புள்ளியாக அமையும் என்று பல அரசியல் விமர்சகர்கள் கூறுகின்றனர். திமுக மற்றும் அதிமுகவின் தொடர்ச்சியான ஊழல், வாரிசு அரசியல், மற்றும் மக்கள் மீதுள்ள அதிருப்தி ஆகியவை புதிய மாற்று சக்திக்கு ஒரு வெற்றிடத்தை ஏற்படுத்தியுள்ளன. அந்த வெற்றிடத்தை நிரப்ப விஜய் முயன்றால், திராவிட கட்சிகளின் வாக்கு வங்கி பெரிய அளவில் சிதைக்கப்படும்.
ஒரு தொங்கு சட்டசபையோ அல்லது ஆட்சியை பிடிக்கும் சூழலோ ஏற்பட்டால், அது திமுக மற்றும் அதிமுகவை மையப்படுத்திய இருமுனை அரசியல் பிளவை முடிவுக்கு கொண்டு வந்து, தமிழக அரசியலில் புதிய மூன்றாவது சக்தியாக நிலைநிறுத்தும். எனவே, விஜய் தனித்து போட்டியிட்டு கணிசமான வெற்றியை பெற்றால், அது திராவிட கட்சிகளை ஆட்சியில் இருந்து முழுமையாக நீக்காது என்றாலும், அவர்களின் அசைக்க முடியாத ஆதிக்கத்தை உறுதியாக ஆட்டம் காண செய்யும். அது தமிழ்நாட்டின் அரசியல் பாதையில் ஒரு முக்கியமான திருப்புமுனையாகவும், திராவிட சித்தாந்தங்களின் வீழ்ச்சியின் முதல் கட்டமாகவும் வரலாற்றில் இடம்பெற வாய்ப்புள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
