தமிழக வெற்றிக் கழகம் தலைவர் விஜய்யின் அரசியல் நகர்வுகள் தமிழக அரசியல் அரங்கில் நாளுக்கு நாள் பரபரப்பை ஏற்படுத்தி வருகின்றன. சமீபத்தில் கரூரில் நடைபெற்ற கூட்டத்தில் நிகழ்ந்த துரதிர்ஷ்டவசமான சம்பவங்களால், த.வெ.க. தற்போது ஒரு ‘இக்கட்டான நிலையில்’ இருப்பதாகவும், எதிர்வரும் தேர்தலில் வலுவான அடித்தளத்தை பெற ஒரு பெரிய கட்சியின் ஆதரவு கண்டிப்பாக தேவை என்ற முடிவுக்கு விஜய் வந்துள்ளதாகவும் அரசியல் வட்டாரங்கள் தெரிவிக்கின்றன.
இந்த சூழலில்தான், த.வெக-வின் முக்கிய நிர்வாகிகளில் ஒருவரான ஆதவ் அர்ஜுனா டெல்லியில் முகாமிட்டு, காங்கிரஸ் கட்சியின் முக்கிய தலைவர்களுடன் ரகசிய பேச்சுவார்த்தை நடத்தியிருப்பது, தி.மு.க. தலைமையிலான ஆளும் கூட்டணிக்குள் ஒருவித அசைவை ஏற்படுத்தியுள்ளது.
ஆதவ் அர்ஜுனா டெல்லியில் முகாமிட்டு, காங்கிரஸ் கட்சியின் மூத்த நிர்வாகிகளுடனும், முக்கியமாக ராகுல் காந்திக்கு மிகவும் நெருக்கமான ஓய்வுபெற்ற ஒரு ஐ.ஏ.எஸ். அதிகாரியுடனும் மூன்று மணி நேரம் ரகசிய பேச்சுவார்த்தை நடத்தியுள்ளதாக கூறப்படுகிறது. இந்த ஐ.ஏ.எஸ். அதிகாரி, காங்கிரஸ் கட்சியின் தேர்தல் வியூகம் மற்றும் கூட்டணிகளை தீர்மானிப்பதில் முக்கியப் பங்கு வகிப்பவர் என கூறப்படுகிறது.
இந்த சந்திப்பின் மைய கருத்தாக, வரவிருக்கும் தமிழகத் தேர்தலில் த.வெ.க.-காங்கிரஸ் கூட்டணி அமைப்பது, இடப் பங்கீடு மற்றும் விஜய்யின் அரசியல் எதிர்காலம் குறித்து விவாதிக்கப்பட்டதாக தகவல்கள் கசிந்துள்ளன.
ஆதவ் அர்ஜுனா, ராகுல் காந்தியுடனும் சந்திப்பு நடத்தியுள்ளார். இந்த சந்திப்பு, பேச்சுவார்த்தைகளை அடுத்த கட்டத்திற்குக் கொண்டு சென்றுள்ளதாக கருதப்படுகிறது. தேசிய அளவில் பா.ஜ.க.வை எதிர்ப்பதற்கான பொதுவான தளம் இரு கட்சிகளுக்கும் இருப்பதால், தமிழகத்தில் இந்த கூட்டணி அமைவது தேசிய அரசியலில் தாக்கத்தை ஏற்படுத்தக்கூடும்.
ராகுல் காந்தியுடனான பேச்சுவார்த்தையில்,விஜய்யை முன்னிறுத்துவதன் மூலம் ஏற்படக்கூடிய அரசியல் லாபங்கள் மற்றும் கூட்டணிக்கான கொள்கை ரீதியான இணக்கங்கள் குறித்து விவாதிக்கப்பட்டிருக்கலாம் என நம்பப்படுகிறது.
அ.தி.மு.க.-பா.ஜ.க. கூட்டணிக்குச் செல்லாமல், காங்கிரஸ் கூட்டணியை விஜய் விரும்புவதற்கு பின்னால் உள்ள வியூகங்கள் தெளிவானதாக இருப்பதாக அரசியல் பார்வையாளர்கள் கூறுகின்றனர்:
அ.தி.மு.க. – பா.ஜ.க. கூட்டணியில் த.வெ.க. இணைந்தால், விஜய்க்கு முதலமைச்சர் பதவிக்கான வாய்ப்பு கிடைப்பது கடினம் என விஜய் கருதுகிறார். ஆனால், காங்கிரஸ் போன்ற ஒரு தேசிய கட்சியுடன் கூட்டணி அமைத்து, தி.மு.க.வுக்கு எதிரான வாக்குகளை பிரிப்பதன் மூலம், த.வெ.க. அதிக இடங்களை பிடித்து, முதலமைச்சர் பதவிக்கான வாய்ப்பை உருவாக்கலாம் என்று விஜய் கணக்கு போடுகிறார்.
த.வெ.க. தனது ஆரம்ப கொள்கையாகவே பா.ஜ.க.வை எதிர்ப்போம் என்பதை அறிவித்தது. காங்கிரஸ் கூட்டணியில் இணைவது, விஜய்யின் இந்த கொள்கை நிலைப்பாட்டை தொடர அனுமதிக்கும்.
காங்கிரஸ் கட்சி சிறுபான்மையினர் மத்தியில் வலுவான ஆதரவை கொண்டுள்ளது. அந்த கூட்டணியில் இணைவதன் மூலம், சிறுபான்மையினரின் வாக்குகளும் த.வெ.க.வுக்கு கிடைக்கும் என்று விஜய் நம்புவதாக கூறப்படுகிறது.
தி.மு.க. கூட்டணியில் இருந்து விலகி இருக்கும் காங்கிரஸ், த.வெ.க.வுடன் இணைவதன் மூலம், தி.மு.க.வை விரும்பாத, அதே சமயம் அ.தி.மு.க.-பா.ஜ.க. கூட்டணியை ஏற்காத நடுநிலை வாக்குகளை தன்பக்கம் இழுக்க முடியும்.
இந்த ரகசிய பேச்சுவார்த்தைகள் மற்றும் கூட்டணி குறித்த ஊகங்கள், தமிழ்நாட்டில் ஆளும் தி.மு.க. கூட்டணிக்குள் ஒருவித அதிர்வை ஏற்படுத்தியுள்ளன. காங்கிரஸை மீண்டும் கூட்டணியில் இணைப்பதற்கான கதவுகளை தி.மு.க. திறந்து வைத்திருந்தாலும், இப்போது காங்கிரஸ் தனது வலிமையை உணர்த்தும் விதமாக த.வெ.க. பக்கம் சாய்வது, தி.மு.க.வின் தேர்தல் வியூகங்களுக்கு ஒரு பெரிய சவாலை உருவாக்கியுள்ளது.
ஆதவ் அர்ஜுனாவின் டெல்லி பயணம், வெறும் மரியாதை நிமித்தமான சந்திப்பை கடந்து, தமிழகத்தின் தேர்தல் ஆட்டத்தை தொடங்கிவிட்டதற்கான சமிக்ஞையாகவே அரசியல் நோக்கர்களால் பார்க்கப்படுகிறது. விஜய்யின் அரசியல் முடிவை பொறுத்து, எதிர்வரும் தமிழக சட்டமன்ற தேர்தல் கூட்டணி சமன்பாடுகள் முற்றிலுமாக மாற வாய்ப்புள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
