தமிழக அரசியல் களத்தில் 2026 சட்டமன்ற தேர்தலுக்கான கூட்டணி கணக்குகள் தற்போதே அனல் பறக்க தொடங்கியுள்ளன. குறிப்பாக, நடிகர் விஜய்யின் தமிழக வெற்றிக் கழகம் நடத்திய ரகசிய சர்வே முடிவுகள் டெல்லி வரை எதிரொலித்துள்ளதாக தகவல்கள் கசிந்துள்ளன. இந்த சர்வேயின்படி, தவெகவிற்கு தற்போதே 30% வாக்கு வங்கி உறுதி செய்யப்பட்டுள்ளதாக கூறப்படுகிறது. இந்த அதிரடி தகவல் ராகுல் காந்தியின் கவனத்திற்கு சென்றிருப்பதாகவும், தமிழகத்தில் நிலவும் ஆளுங்கட்சிக்கு எதிரான அதிருப்தியை பயன்படுத்திப் புதியதொரு பலமான கூட்டணியை அமைக்க அவர் திட்டமிட்டு வருவதாகவும் அரசியல் வட்டாரங்கள் தெரிவிக்கின்றன.
காங்கிரஸ் கட்சி தற்போது திமுக கூட்டணியில் இருந்தாலும், தொகுதி பங்கீடு மற்றும் ஆட்சிப்பகிர்வு விவகாரத்தில் பெரும் இழுபறி நீடிக்கிறது. திமுக 25 இடங்களுக்கு மேல் தர மறுப்பதாலும், துணை முதல்வர் பதவி போன்ற கோரிக்கைகளை நிராகரிப்பதாலும் ராகுல் காந்தி அதிருப்தியில் இருப்பதாக தெரிகிறது. இந்த சூழலில், தவெகவின் 30% வாக்கு வங்கியுடன் காங்கிரஸின் பாரம்பர்ய வாக்குகள் மற்றும் விசிகவின் தலித் மற்றும் சிறுபான்மையினர் வாக்குகள் இணைந்தால், அந்த கூட்டணியின் பலம் 45% ஆக உயரும் என ராகுல் காந்திக்கு அளிக்கப்பட்ட ரகசிய அறிக்கையில் சுட்டிக்காட்டப்பட்டுள்ளது. இது நிகழ்ந்தால், சிறுபான்மையினரின் ஒட்டுமொத்த ஆதரவும் இந்த கூட்டணியை நோக்கியே திரும்பும் என்பது டெல்லியின் கணக்காக உள்ளது.
திமுக கூட்டணியில் இருந்து கொண்டு வெறும் ‘சிறு கட்சியாக’ இருக்க விரும்புவதை விட, விஜய்யுடன் கைகோர்த்து தமிழகத்தில் ஒரு புதிய அரசியல் மாற்றத்தை உருவாக்குவதே சிறந்தது என ராகுல் காந்தி கருதுவதாக கூறப்படுகிறது. “வண்டியை பனையூர் பக்கம் விடுங்க” என்று அவர் தனது நெருக்கமானவர்களிடம் ராகுல் காந்தி கூறியதாக உலவும் தகவல்கள், தமிழக அரசியலில் நிலநடுக்கத்தை ஏற்படுத்தியுள்ளன. பனையூர் என்பது தவெகவின் தலைமை அலுவலகம் அமைந்துள்ள இடம் என்பதால், இது ஒரு திரைமறைவு பேச்சுவார்த்தையின் தொடக்கமாகவே பார்க்கப்படுகிறது. இந்த அதிரடி முடிவின் மூலம் திமுக – காங்கிரஸ் இடையிலான நீண்ட கால பந்தம் முடிவுக்கு வரும் சூழல் உருவாகியுள்ளது.
ஒருவேளை தவெக, காங்கிரஸ் மற்றும் விசிக ஆகிய மூன்று கட்சிகளும் ஓரணியில் திரண்டால், அது தமிழகத்தின் ‘மெகா கூட்டணி’யாக உருவெடுக்கும். விசிக தலைவர் திருமாவளவனும் ஆட்சி அதிகாரத்தில் பங்கு என்ற கோரிக்கையை தொடர்ந்து வலியுறுத்தி வருவதால், விஜய்யின் “ஆட்சியில் பங்கு” என்ற அறிவிப்பு அவரை ஈர்க்கக்கூடும். இந்த முக்கோண கூட்டணி அமையும் பட்சத்தில், அது திமுக மற்றும் அதிமுக ஆகிய இரு திராவிட கட்சிகளுக்கும் மிகப்பெரிய சவாலாக அமையும். குறிப்பாக, ஆளுங்கட்சியான திமுக மூன்றாவது இடத்திற்கு தள்ளப்படும் அபாயம் உள்ளதாக அரசியல் ஆய்வாளர்கள் எச்சரிக்கின்றனர்.
சமூக வலைதளங்களில் இந்த புதிய கூட்டணி குறித்த விவாதங்கள் காட்டுத்தீயாக பரவி வருகின்றன. ஒருவேளை காங்கிரஸ் வெளியேறினால், அது திமுகவின் பலத்தை வெகுவாக குறைக்கும் என்பதோடு, சிறுபான்மையினர் வாக்குகளும் சிதற வாய்ப்புள்ளது. இதனால், திமுக தனது தேர்தல் வியூகத்தை மாற்ற வேண்டிய கட்டாயத்திற்கு தள்ளப்பட்டுள்ளது.
தமிழக அரசியல் வரலாற்றில் 2026 தேர்தல் ஒரு திருப்புமுனையாக அமையும் என்பதற்கு இத்தகைய கூட்டணி குழப்பங்களே சாட்சியாக உள்ளன. ராகுல் காந்தியின் ஒப்புதல் மற்றும் விஜய்யின் அரசியல் நகர்வுகள் இணைந்தால், அது வெறும் ஆட்சி மாற்றமாக மட்டுமின்றி, பல தசாப்த கால திராவிட அரசியலின் போக்கையே மாற்றியமைக்கும் சக்தியாக மாறும். எது எப்படியிருப்பினும், அதிகாரப்பூர்வ அறிவிப்புகள் வெளியாகும் வரை பனையூர் நோக்கிய பார்வையும், டெல்லியின் ரகசிய நகர்வுகளும் தமிழக அரசியலை பரபரப்பின் உச்சத்திலேயே வைத்திருக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
