1996ஆம் ஆண்டு தமிழக அரசியலில் ஏற்பட்ட மிகப்பெரிய மாற்றமும், சூப்பர் ஸ்டார் ரஜினிகாந்த் அப்போது எடுத்த முடிவும் இன்றும் ஒரு பாடமாகவே பார்க்கப்படுகிறது. அந்த தேர்தலில் அப்போதைய ஆளுங்கட்சியான அதிமுக மீது மக்கள் கடும் கோபத்தில் இருந்தனர். அந்த சமயத்தில் ரஜினிகாந்த் ,மூப்பனார் துணையுடன் அரசியலுக்கு வந்திருந்தால், அவர் எளிதாக முதலமைச்சர் நாற்காலியை அடைந்திருப்பார் என்பது அரசியல் நோக்கர்களின் ஒருமித்த கருத்து. ஆனால், அவர் நேரடியாக அரசியலில் இறங்காமல், “ஜெயலலிதா மீண்டும் ஆட்சிக்கு வந்தால் தமிழகத்தை ஆண்டவனாலும் காப்பாற்ற முடியாது” என்ற ஒரு வாய்ஸ் மூலம் திமுக-தமாகா கூட்டணிக்கு ஆதரவு அளித்தார். அந்த ஒரு குரல் மக்களின் கோபத்தை வாக்குகளாக மாற்றியது, திமுக அமோக வெற்றி பெற்றது. ரஜினி அன்று செய்த அந்த அரசியல் தியாகம் அல்லது தயக்கம், ஒரு பெரிய வெற்றிடத்தை அப்படியே விட்டு சென்றது.
தற்போது 2026ஆம் ஆண்டு தமிழக சட்டமன்ற தேர்தலை நோக்கிய அரசியல் களம், கிட்டத்தட்ட 1996 காலக்கட்டத்தை பிரதிபலிப்பதாக பல விமர்சகர்கள் கருதுகின்றனர். தற்போதைய திமுக ஆட்சியின் மீது ஒரு தரப்பு மக்களுக்கு அதிருப்தி நிலவுவதும், மாற்றத்தை விரும்பும் இளைஞர்களின் எண்ணிக்கை அதிகரிப்பதும் களத்தில் தெரிகிறது. 1996ல் ரஜினிக்கு இருந்த அதே மக்கள் செல்வாக்கும், எதிர்பார்ப்பும் இன்று நடிகர் விஜய்க்கு இருப்பதாக கருதப்படுகிறது. ஆனால், ரஜினி செய்த அந்த ‘மிஸ்ஸிங்’ வாய்ப்பை விஜய் செய்ய தயாராக இல்லை என்பதை அவர் ‘தமிழக வெற்றிக் கழகம்’ என்ற கட்சியை தொடங்கியதன் மூலம் உறுதிப்படுத்தியுள்ளார். ரஜினி அன்று அரசியலுக்கு வராமல் விட்ட இடத்தை தான் நிரப்ப போவதாக விஜய் சூசகமாக உணர்த்தியுள்ளார்.
தமிழக அரசியலில் நீண்டகாலமாக திமுக மற்றும் அதிமுக ஆகிய இரு துருவங்களே ஆதிக்கம் செலுத்தி வருகின்றன. ஒரு கட்சி மீது அதிருப்தி ஏற்படும்போது மக்கள் இயல்பாகவே மற்றொரு கட்சிக்கு வாக்களிப்பது வழக்கம். ஆனால், 2026 தேர்தலில் இந்த வழக்கமான நடைமுறை மாறுவதற்கான வாய்ப்புகள் அதிகம் உள்ளன. தற்போதைய ஆளுங்கட்சியின் மீது கோபத்தில் இருப்பவர்கள் அல்லது மாற்றத்தை விரும்புபவர்கள், தங்களது வாக்குகளை பிரதான எதிர்க்கட்சியான அதிமுகவுக்கு போடுவார்களா என்ற கேள்வி எழுந்துள்ளது. விஜய்யின் வருகை, இந்த அதிருப்தி வாக்குகளை தன் பக்கம் ஈர்க்கும் ஒரு காந்தமாக அமையும் என்று அரசியல் விமர்சகர்கள் கணிக்கின்றனர். குறிப்பாக, பாரம்பரிய அரசியல் கட்சிகளால் சலிப்படைந்த நடுநிலை வாக்காளர்கள் விஜய்யை தங்களது மாற்றாக பார்க்க தொடங்கியுள்ளனர்.
விஜய்யின் அரசியல் பிரவேசம் என்பது வெறும் திரை நட்சத்திரத்தின் வருகையாக மட்டும் பார்க்கப்படாமல், ஒரு திட்டமிட்ட அரசியல் நகர்வாகவே பார்க்கப்படுகிறது. 1996ல் ரஜினிகாந்த் தயங்கியது போலன்றி, விஜய் தனது திரைப்பயணத்தின் உச்சத்தில் இருக்கும்போதே அதை துறந்துவிட்டு முழுநேர அரசியலில் இறங்கியிருப்பது அவரது தீவிரத்தன்மையை காட்டுகிறது. ஆட்சி மீது அதிருப்தி உள்ளவர்கள் மற்றும் புதிய தலைமுறை வாக்காளர்கள், அதிமுகவை பழைய பாணி அரசியலாக கருதி, விஜய்யின் புதிய அணுகுமுறையை ஆதரிக்க வாய்ப்புள்ளது. இந்த சூழல் அதிமுகவுக்கு பெரும் சவாலாக அமையும் என்பதில் சந்தேகமில்லை. எதிர்க்கட்சி வாக்குகளை விஜய் பிரிப்பார் என்பது ஒருபுறம் இருந்தாலும், ஆட்சிக்கு எதிரான வாக்குகளின் ஒட்டுமொத்த குவியலாக அவர் மாறக்கூடும் என்பதே தற்போதைய கணிப்பு.
அரசியல் களத்தில் ‘டைமிங்’ என்பது மிக முக்கியமானது. ரஜினிகாந்த் தனது அரசியல் வருகையைத் தள்ளிப்போட்டுக் கொண்டே இருந்தது அவரது செல்வாக்கைச் சிதைத்தது. ஆனால் விஜய், 2026 தேர்தலுக்குப் போதிய கால அவகாசம் இருக்கும்போதே களமிறங்கி, கட்டமைப்புகளை உருவாக்கி வருகிறார். மக்களின் கோபம் எப்போதுமே ஒரு வடிகாலைத் தேடும். அந்த வடிகாலாக 1996ல் ரஜினியின் ‘வாய்ஸ்’ இருந்தது, 2026ல் விஜய்யின் ‘நேரடி அரசியல்’ இருக்கப் போகிறது. மக்கள் மாற்றத்தை விரும்பும்போது, அந்த மாற்றம் நம்பகமானதாகவும் புத்துணர்ச்சி மிக்கதாகவும் இருந்தால் அதை ஏற்றுக்கொள்வார்கள். அந்த வகையில், ஆளுங்கட்சியின் மீதான அதிருப்தி வாக்குகளை பெறுவதில் விஜய்க்கும் அதிமுகவுக்கும் இடையே மிகப்பெரிய போட்டி நிலவும்.
முடிவாக, 2026 தேர்தல் என்பது தமிழக அரசியலில் ஒரு திருப்புமுனையாக அமையப்போகிறது. 1996ல் ரஜினிகாந்த் விட்ட வாய்ப்பு, முப்பதாண்டுகள் கழித்து விஜய்யின் கைகளுக்கு வந்துள்ளது. ரஜினியை போல வாய்ஸ் கொடுத்துவிட்டு ஒதுங்காமல், நேரடியாக போர்க்களத்தில் இறங்கியிருப்பது விஜய்க்கு ஒரு சாதகமான அம்சமாகும். ஆட்சி மீது அதிருப்தி கொண்ட மக்கள், மீண்டும் பழைய கட்சிகளுக்கே வாக்களிக்க விரும்புவார்களா அல்லது ஒரு புதிய பாதையை தேர்ந்தெடுப்பார்களா என்பதுதான் 2026ன் மில்லியன் டாலர் கேள்வி. அரசியல் விமர்சகர்களின் கணிப்புப்படி, கோபத்தில் இருக்கும் வாக்காளர்கள் விஜய்யை தங்களது பிரதிநிதியாக தேர்வு செய்தால், அது தமிழக அரசியலில் ஒரு புதிய சகாப்தத்திற்கு வழிவகுக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
