தமிழக அரசியல் களம் கடந்த 50 ஆண்டுகளுக்கும் மேலாக ‘அறிக்கைப் போர்’ மற்றும் ‘ஆர்ப்பாட்ட அரசியல்’ ஆகியவற்றால் நிரம்பியுள்ளது. தினசரி ஒரு பிரச்சனை, அதற்கு ஒரு கண்டன அறிக்கை, பிறகு ஒரு சாலை மறியல் என சுழலும் இந்த வழக்கமான அரசியல் வட்டத்திற்குள் நுழைய நடிகர் விஜய் விரும்பவில்லை என்பது அவரது அண்மைக்கால நகர்வுகள் மூலம் தெளிவாகிறது. ஒவ்வொரு சிறு விஷயத்திற்கும் கருத்து சொல்லி மக்களை குழப்பக்கூடாது என்பதில் அவர் உறுதியாக இருக்கிறார். மற்ற கட்சிகள் ஒரு விவகாரத்தை பிடித்துக்கொண்டு வாரக்கணக்கில் விவாதம் செய்து கொண்டிருக்கும்போது, விஜய் மௌனம் காப்பது பலரால் விமர்சிக்கப்பட்டாலும், அது தேவையற்ற குழப்பங்களை தவிர்க்கும் ஒரு யுக்தியாகவே அவரது ஆதரவாளர்களால் பார்க்கப்படுகிறது. அரசியல் என்பது வெறும் பேச்சல்ல, அது ஒரு செயல்முறை என்பதை அவர் தனது மௌனத்தின் மூலம் உணர்த்துகிறார்.
போராட்டங்கள் மற்றும் ஆர்ப்பாட்டங்கள் என்ற பெயரில் பொதுமக்களின் இயல்பு வாழ்க்கையையும், போக்குவரத்தையும் பாதிக்கும் செயல்களை விஜய் முற்றிலுமாக தவிர்க்க நினைக்கிறார். ஒரு கோரிக்கையை வலியுறுத்த சாலையை மறிப்பதோ அல்லது பொதுமக்களுக்கு இடைஞ்சல் தருவதோ முறையான அரசியல் அல்ல என்பது அவரது தர்க்கம். “மக்களுக்காக தான் அரசியல், ஆனால் மக்களுக்கே தொந்தரவு கொடுத்து அரசியல் செய்வது முரண்பாடு” என்பதே விஜய்யின் நிலைப்பாடு. இந்த மாற்று சிந்தனை, தினசரி போக்குவரத்து நெரிசலில் சிக்கி தவிக்கும் நடுத்தர வர்க்க மக்களிடையே ஒருவித ஈர்ப்பை ஏற்படுத்தியுள்ளது. ஆர்ப்பாட்டம் செய்யாமல் எப்படி தீர்வுகாண முடியும் என்ற கேள்விக்கு, ஆர்ப்பாட்டம் செய்தால் மட்டும் தீர்வு கிடைத்துவிடுகிறதா? என்ற கேள்வியும் கூடவே எழுகிறது. ஆர்ப்பாட்டத்திற்கு பதிலாக முறையான திட்டமிடல் மற்றும் அதிகாரத்தின் மூலமே மாற்றத்தை கொண்டுவர முடியும் என அவர் நம்புகிறார்.
எல்லா பிரச்சனைக்கும் அறிக்கை வெளியிட்டு நாடகமாடும் போக்கை தவெக தவிர்க்கிறது. தமிழக அரசியலில் ஒரு பிரச்சனை எழுந்தால், உடனே ஒரு நீண்ட அறிக்கை வெளியிடுவது ஒரு சடங்காகவே மாறிவிட்டது. ஆனால், அந்த அறிக்கைகளால் இதுவரை எத்தனை பிரச்சனைகள் தீர்க்கப்பட்டுள்ளன என்ற கேள்வியை விஜய் தரப்பினர் முன்வைக்கிறார்கள். வெறும் காகிதங்களில் தீர்வுகள் இல்லை, அவை களத்தில் செயல்படுத்தப்பட வேண்டியவை. பிரதமருக்கும் மத்திய அமைச்சர்களுக்கும் கடிதம் எழுதி காலத்தை வீணாக்குவதை விட, மாநில உரிமைகளை சட்டப்பூர்வமாக நிலைநாட்டவும், அதிகாரத்தை பயன்படுத்தி நேரடியாக தீர்வுகாணவும் அவர் முன்னுரிமை அளிக்கிறார். இது ஒரு ‘நிர்வாக ரீதியான அரசியல்’ அணுகுமுறையாக கருதப்படுகிறது.
“பவர் கைக்கு வந்தா எல்லா பிரச்சனைக்கும் தீர்வு காண்போம்” என்பது விஜய்யின் அரசியலில் ஒரு முக்கியமான மற்றும் துணிச்சலான முழக்கம். தற்போது எதிர்க்கட்சியாக இருந்து கொண்டு எதையும் மாற்ற முடியாது என்ற எதார்த்தத்தை அவர் உணர்ந்திருக்கிறார். எனவே, ஆக்கப்பூர்வமான விமர்சனங்களை செய்வதை விட, அதிகாரத்தை கைப்பற்றி மக்களின் அடிப்படை தேவைகளான கல்வி, மருத்துவம் மற்றும் குடிநீர் வசதிகளை பூர்த்தி செய்வதே தனது முதல் பணி என்று அவர் உறுதிபட கூறுகிறார். வெற்று வாக்குறுதிகளை விட, அதிகாரத்தின் மூலம் நிகழ்த்தப்படும் மாற்றமே நிலையானது என்பது அவரது வாதம். இது அவரது அரசியலை வித்தியாசமாக காட்டுகிறது.
மக்களின் அடிப்படை தேவைகளை பூர்த்தி செய்வதே உண்மையான சமூக நீதி என்று விஜய் கருதுகிறார். இலவசங்கள் என்ற பெயரில் மக்களை கையேந்த வைக்காமல், தரமான அரசு பள்ளிகள், தரம் உயர்த்தப்பட்ட அரசு மருத்துவமனைகள் மற்றும் வேலைவாய்ப்புகளை உருவாக்குவதன் மூலம் ஒரு நிரந்தர தீர்வை தர அவர் திட்டமிடுகிறார். இது திராவிட மாடலுக்கும், மற்ற கட்சிகளின் இலவச அரசியலுக்கும் ஒரு மிகப்பெரிய மாற்றாக அமையும். “விஜய்யின் இயற்கையான அரசியல்” என்பது யதார்த்தத்தை அடிப்படையாக கொண்டது; இதில் கவர்ச்சிகரமான போராட்டங்களோ அல்லது வீராவேச பேச்சுகளோ இருக்காது, மாறாக அமைதியான மற்றும் உறுதியான செயல்பாடுகள் மட்டுமே இருக்கும்.
இறுதியாக, இந்த புதிய வகை அரசியல் தமிழகத்திற்கு வேணுமா? வேண்டாமா? என்பதை மக்கள் தான் முடிவு செய்ய வேண்டும். காலம் காலமாக போராட்டங்களையும் அறிக்கைகளையும் பார்த்து பழகிய மக்களுக்கு, விஜய்யின் இந்த ‘நேரடித் தீர்வு’ அரசியல் ஒரு புதுமையாக இருக்கலாம். ஆனால், இந்த அணுகுமுறை அதிகாரத்தை நோக்கி மட்டுமே பயணிக்கிறது என்ற விமர்சனமும் ஒருபுறம் எழாமல் இல்லை. எது எப்படியிருந்தாலும், 2026 தேர்தல் களம் என்பது வெறும் சின்னங்களுக்கு இடையிலான போட்டியல்ல, அது பழைய காலத்து அரசியலுக்கும் விஜய்யின் இந்த ‘இயற்கையான’ நவீன அரசியலுக்கும் இடையிலான ஒரு வாழ்வா சாவா போராட்டமாகும். மக்கள் எதை ஏற்றுக்கொள்கிறார்கள் என்பதே தமிழகத்தின் எதிர்காலத்தை தீர்மானிக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
