தமிழக அரசியலில் 2026 சட்டமன்ற தேர்தல் களம் சூடுபிடிக்க தொடங்கியுள்ள நிலையில், காங்கிரஸ் கட்சியின் தற்போதைய நிலைப்பாடு அத்தமிழக அரசியல் வரலாற்றில் அக்கட்சி சந்தித்து வரும் ஒரு நீண்டகால தேக்கநிலையை அப்பட்டமாக தோலுரித்துக் காட்டுகிறது. “யாரோடு கூட்டணி?” என்ற ஒற்றை கேள்வியிலேயே காங்கிரஸ் கட்சி இத்தனை குழப்பங்களுக்கு ஆளாகியிருப்பது அதன் அரசியல் முதிர்ச்சியின்மையை வெளிப்படுத்துகிறது. திராவிட முன்னேற்ற கழகத்தின் நிழலில் இத்தனை காலம் ஒதுங்கியிருந்த காங்கிரஸ், தற்போது தனக்கான அதிகாரப் பங்கீட்டை வலியுறுத்த தொடங்கியிருக்கிறது. ஆனால், திமுகவோ “கூட்டாட்சி மத்தியில், தனித்தாட்சி மாநிலத்தில்” என்ற தனது கொள்கையில் உறுதியாக இருப்பதால், காங்கிரஸ் இப்போது ‘கழுத்தறுபட்ட நிலையில்’ திசைதெரியாமல் தள்ளாடி கொண்டிருக்கிறது.
காங்கிரஸ் கட்சியின் ஒரு தரப்பினர் நடிகர் விஜய்யின் தமிழக வெற்றி கழகத்துடன் கூட்டணி வைக்கலாம் என்று மேலிடத்திற்கு தூது அனுப்பி வருவதாக பரவலாக பேசப்படுகிறது. ஆனால், விஜய்யோ தனது அரசியல் பயணத்தை தொடங்கும்போதே மிக தெளிவாக “தனது தனித்துவத்தை நிரூபிப்பதே நோக்கம்” என்று கோடிட்டு காட்டியுள்ளார். ஒருவேளை தவெக தனது கதவுகளை காங்கிரஸிற்காக அடைத்துவிட்டால், அந்த கட்சியின் நிலைமை அந்தோ பரிதாபம் தான். இதுவரை திமுகவிடம் கெஞ்சி கூத்தாடி வாங்கிய தொகுதிகளை கூட, இந்த முறை காங்கிரஸ் இழக்க நேரிடும். ஒரு தேசிய கட்சியால் மாநில அளவில் ஒரு பலமான முடிவை எடுக்க முடியவில்லை என்பது, அக்கட்சி மக்கள் மத்தியில் இழந்த செல்வாக்கை மீட்டெடுக்க தவறியதையே காட்டுகிறது.
தமிழகத்தில் கடந்த 50 ஆண்டுகளாக காங்கிரஸ் ஏன் ஆட்சியில் இல்லை என்பதற்கான விடை இப்போது தெளிவாக தெரிகிறது. 1967-ல் ஆட்சியை இழந்த பிறகு, மீண்டும் ஒருமுறை கூட தமிழகத்தின் அரியணையில் ஏற முடியாததற்கு காரணம், அந்தக் கட்சியின் பாணிதான். சுயமாக கட்சியை வளர்க்காமல், எப்போதும் ஒரு திராவிட கட்சியின் தயவை எதிர்பார்த்துக்கொண்டே இருந்ததால், தொண்டர் பலம் என்பது சிதைந்துபோய்விட்டது. ஒரு தேர்தலுக்கு கூட்டணி முடிவெடுப்பதற்கே பல வாரங்கள் டெல்லி மேலிடத்தின் அனுமதிக்கு காத்திருக்கும் ஒரு கட்சியால், தமிழக மக்களின் அன்றாட பிரச்சினைகளுக்கு எப்படி உடனுக்குடன் தீர்வு காண முடியும்? முடிவெடுக்கும் ஆற்றல் இல்லாத தலைமை எப்போதுமே தோல்வியையே சந்திக்கும் என்பதற்கு தமிழக காங்கிரஸே ஒரு சிறந்த உதாரணம்.
ராகுல் காந்தி ஏன் இன்னும் ஒரு நாடாளுமன்ற உறுப்பினராகவே இருக்கிறார், பிரதமராகவோ அல்லது நாட்டை வழிநடத்தும் ஒரு வலிமையான தலைவராகவோ ஏன் உயரவில்லை என்பதற்கு அவரது தலைமையின் கீழ் உள்ள கட்சிகளின் இந்த தடுமாற்றமே சாட்சி. தமிழகத்தை போன்ற ஒரு முக்கியமான மாநிலத்தில், தனது கட்சியை கட்டமைப்பு ரீதியாக வலுப்படுத்தாமல், வெறும் கூட்டணி பேச்சுவார்த்தைகளுடன் காலத்தை கடத்துவது அவரது அரசியல் தோல்வியை காட்டுகிறது. ராகுல் காந்தி முன்னெடுக்கும் “இந்தியா” கூட்டணி என்பது வெறும் பெயரளவில் இருக்கிறதே தவிர, மாநில அளவில் அந்த கட்சிகளுக்குள் இருக்கும் முரண்பாடுகளை களைய அவருக்கு திறமை இல்லை என்றே மக்கள் கருதுகின்றனர். முடிவெடுக்க தள்ளாடும் தலைமை எப்போதும் ஒரு சாதாரண எம்பியாகத்தான் இருக்க முடியும், மக்கள் தலைவனாக முடியாது.
மக்களின் பார்வையில், ஒரு கூட்டணியை பற்றி முடிவு செய்ய முடியாத கட்சியிடம் ஒரு மாநிலத்தின் அல்லது நாட்டின் ஆட்சியை ஒப்படைப்பது என்பது தற்கொலைக்கு சமம். இன்று திமுக அதிகாரம் மிக்க ஒரு நிலையில் இருப்பதற்கு காரணம் அதன் தெளிவான நிலைப்பாடு மற்றும் கட்சியின் கட்டமைப்பு. ஆனால் காங்கிரஸ் கட்சிக்குள்ளோ தவெகவுடன் சேரலாம் என்று ஒரு தரப்பும், திமுகவிடம் மீண்டும் தொடரலாம் என்று மற்றொரு தரப்பும் மல்லுக்கட்டிக்கொண்டு இருக்கின்றன. இந்த உட்கட்சி பூசல் காரணமாகவே காங்கிரஸ் ஒரு செல்லா காசாக மாறிக்கொண்டிருக்கிறது. தவெக போன்ற புதிய கட்சிகள் கூட தங்களின் கொள்கைகளில் உறுதியாக இருக்கும்போது, 100 ஆண்டுகால பாரம்பரியம் கொண்ட காங்கிரஸ் இப்படித் தள்ளாடுவது அக்கட்சியின் அந்திம காலத்தை தான் நினைவூட்டுகிறது.
இறுதியாக, 2026 தேர்தல் என்பது காங்கிரஸிற்கு ஒரு வாழ்வா சாவா போராட்டமாகும். திமுக கொடுக்கும் 20 அல்லது 25 தொகுதிகளை பெற்றுக்கொண்டு மீண்டும் ஜால்ரா தட்டுவதா அல்லது தவெகவிடம் கதவை தட்டி அங்கேயும் அவமானப்படுவதா என்ற இக்கட்டான நிலையில் அக்கட்சி உள்ளது. இந்த தள்ளாட்டமே காங்கிரஸின் வீழ்ச்சிக்கு காரணம். கொள்கை பிடிப்பு இல்லாத, முடிவெடுக்கும் திறன் அற்ற, தலைமைக்கு கட்டுப்படாத ஒரு அரசியல் இயக்கம் காலப்போக்கில் காணாமல் போவது இயற்கை. 50 வருஷமாக ஆட்சியில் இல்லாத காங்கிரஸ், இன்னும் 50 வருஷம் கழித்தும் இதே “கூட்டணி குழப்பத்தில்” தான் இருக்கும் போல தெரிகிறது. மக்கள் விழிப்புணர்வு பெற்றுவிட்டனர்; முடிவெடுக்க தயங்கும் கட்சிகளை அவர்கள் ஒருபோதும் அரியணையில் அமர்த்த மாட்டார்கள்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
