தமிழக அரசியலில் நடிகர் விஜய்யின் வருகையும், அவர் தொடங்கியுள்ள தமிழக வெற்றி கழகத்தின் செயல்பாடுகளும் தற்போதைய அரசியல் சூழலை மிகவும் பரபரப்பாக்கியுள்ளன. விஜய் தனது திரைத்துறை வாழ்க்கையின் உச்சத்தில் இருக்கும்போது, ஆண்டுக்கு சுமார் 500 கோடி ரூபாய் வருமானம் தரக்கூடிய வாய்ப்புகளை துறந்துவிட்டு அரசியலுக்கு வந்திருப்பது, ஏதோ ஒரு சாதாரண எதிர்க்கட்சி தலைவர் பதவியை அலங்கரிக்க அல்ல என்பது அரசியல் விமர்சகர்களின் பொதுவான கருத்தாக உள்ளது. அவரது உண்மையான இலக்கு ஆளும் கட்சியான திமுகவை வீழ்த்துவது மட்டுமல்ல, மாறாக தமிழகத்தின் அதிகார மையமான அந்த முதல்வர் நாற்காலியில் அமர்வதுதான். ஒரு பெரும் புகழின் உச்சத்தில் இருக்கும் நட்சத்திரம், தான் ஈட்டும் இமாலய வருமானத்தை விட்டுவிட்டு பொதுவாழ்விற்கு வரும்போது, அவரது எதிர்பார்ப்பும் திட்டமிடலும் மிக உயரிய இடத்தையே நோக்கியிருக்கும் என்பதில் எள்ளளவும் சந்தேகமில்லை.
திமுக என்ற மாபெரும் அரசியல் கட்டமைப்பை எதிர்த்து நிற்பது என்பது சாமானியமான காரியமல்ல என்பதை விஜய் நன்கு அறிவார். அந்த பலமான எதிரியை வீழ்த்த வேண்டுமெனில் அதிமுக போன்ற ஒரு பெரிய கட்சியுடன் கூட்டணி சேர வேண்டும் என்ற ஒரு கருத்து அரசியல் வட்டாரத்தில் நிலவுகிறது. இருப்பினும், அப்படி ஒரு கூட்டணியை அமைப்பதில் விஜய்க்கு பெரிய தயக்கம் இருப்பதற்கு காரணம் அதிகாரப்பங்கீடுதான். அதிமுகவுடன் கரம் கோர்த்தால் திமுகவை வீழ்த்துவது எளிதாக இருக்கலாம், ஆனால் அப்படி அமையும் வெற்றியில் எடப்பாடி பழனிசாமியை மீண்டும் முதல்வராக்கத்தான் அந்த வெற்றி பயன்படுமே தவிர, விஜய்யால் அந்த முதல்வர் நாற்காலியில் அமர முடியாது. எடப்பாடியை முதல்வராக்குவதற்காத் தனது இத்தனை பெரிய திரையுலக பயணத்தையும், பொருளாதார ரீதியான வசதிகளையும் விஜய் தியாகம் செய்ய முன்வரமாட்டார் என்பதே யதார்த்தம்.
விஜய்யின் அரசியல் வியூகம் என்பது ‘திமுகவை வீழ்த்த வேண்டும், அதே நேரத்தில் அந்த நாற்காலியில் தானே உட்கார வேண்டும்’ என்ற இரட்டை இலக்கை கொண்டது. தமிழக அரசியலில் திராவிட கட்சிகளுக்கு மாற்றாக ஒரு புதிய சக்தியாக உருவெடுக்க அவர் விரும்புவதால், அவர் மற்றுமொரு திராவிட கட்சிக்கு அடங்கிப்போக விரும்பவில்லை. தான் ஒரு ‘கிங் மேக்கராக’ இருப்பதை விட, ‘கிங்’ ஆக இருப்பதே தனது நீண்ட கால இலக்கு என்பதை அவர் மறைமுகமாக தனது பேச்சுகளிலும் செயல்பாடுகளிலும் உணர்த்தி வருகிறார். இதனால்தான் அவர் தனது கட்சியின் மாநாட்டில் ‘கொள்கை எதிரி’, ‘அரசியல் எதிரி’ என பிரித்துப் பேசி, மற்ற கட்சிகளிடமிருந்து ஒரு தனித்துவமான இடைவெளியை பராமரித்து வருகிறார்.
அரசியலை பொறுத்தவரை எதார்த்தமான சூழல்களை கையாள்வது மிக முக்கியம். தான் விரும்பும் முழுமையான அதிகாரம் கிடைக்காத பட்சத்தில், அல்லது மக்கள் செல்வாக்கு வாக்குகளாக மாறாத ஒரு சூழல் ஏற்பட்டால், விஜய் என்ன செய்வார் என்ற கேள்வியும் எழுகிறது. ஒரு நடிகராக இருந்து அரசியலுக்கு வந்து தோல்வியை சந்தித்தவர்களின் வரலாறு தமிழகத்தில் உண்டு. அப்படிப்பட்ட ஒரு நெருக்கடியான சூழல் ஏற்பட்டால், விஜய் மீண்டும் தனது திரையுலக பயணத்தைத் தொடர வாய்ப்புகள் இருப்பதாகவே பார்க்கப்படுகிறது. ஏனெனில், அவர் இன்னும் இளமையாகவும், மக்களிடையே பெரும் செல்வாக்கு பெற்ற நட்சத்திரமாகவும் இருக்கிறார். அரசியலில் ஒருவேளை பின்னடைவு ஏற்பட்டால், அவர் மீண்டும் சினிமாவுக்கு திரும்புவது அவருக்கு மிகவும் எளிதான காரியமாக இருக்கும்.
விஜய் தனது ரசிகர்களிடமும் தொண்டர்களிடமும் ஒருவிதமான நம்பிக்கையை விதைத்திருக்கிறார். ஆனால், அந்த நம்பிக்கை தேர்தல் களத்தில் வெற்றியாக மாற வேண்டுமெனில், அவர் மிகக் கவனமாகத் தனது காய்களை நகர்த்த வேண்டியுள்ளது. ‘வெற்றி அல்லது மரணம்’ என்ற ரீதியில் அவர் அரசியலில் இறங்கினாலும், ஒருவேளை திட்டமிட்டபடி ஆட்சி அதிகாரம் கைவராத பட்சத்தில், தனது சினிமா கேரியரை அவர் மீண்டும் கையில் எடுப்பதற்கான கதவுகள் எப்போதும் திறந்தே இருக்கின்றன. திரையுலகில் அவர் வைத்திருக்கும் மார்க்கெட் மதிப்பு என்பது உலகளாவியது. எனவே, அரசியலில் எதிர்பார்த்த பலன் கிடைக்கவில்லை என்றால், ‘ஜனநாயகன் 2’, ‘லியோ 2’, ‘மாஸ்டர் 2’ போன்ற பிரம்மாண்ட திரைப்படங்களின் மூலம் அவர் மீண்டும் தனது திரை சாம்ராஜ்யத்தை மீட்டெடுக்க முடியும் என்ற ஒரு பாதுகாப்பு வலை அவருக்கு எப்போதும் உண்டு.
முடிவாக பார்க்கையில், விஜய்யின் அரசியல் பயணம் என்பது ஒரு பெரும் சூதாட்டத்தை போன்றது. ஒருபுறம் கோடிக்கணக்கான வருமானம் மற்றும் திரையுலக அதிகாரம், மறுபுறம் தமிழகத்தின் ஆட்சி அதிகாரம். இந்த இரண்டிற்கும் இடைப்பட்ட போராட்டத்தில் அவர் தற்போது எடப்பாடி பழனிசாமிக்கோ அல்லது மற்றவர்களுக்கோ வழிவிட தயாராக இல்லை. தனது தனித்துவத்தை நிரூபித்து, நேரடியாக முதல்வர் நாற்காலியில் அமர்வதே அவரது முதன்மையான நோக்கம். அந்த நோக்கம் நிறைவேறாத பட்சத்தில், அவர் மீண்டும் ஒரு திரையுலக பேரரசராக தனது பயணத்தை தொடருவார் என்பதுதான் நிதர்சனமான உண்மை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
