2026 தமிழக சட்டமன்றத் தேர்தல் முடிவுகள், தமிழகத்தில் பல தசாப்தங்களாக நிலைபெற்றிருந்த சிறிய மற்றும் நடுத்தரக் கட்சிகளின் அரசியல் எதிர்காலத்தை ஒரு கேள்விக்குறியாக மாற்றியுள்ளன. நடிகர் விஜய் தலைமையிலான தமிழக வெற்றிக் கழகம் ஏற்படுத்திய அரசியல் சூறாவளியில், பாரம்பரியமாக ஒரு குறிப்பிட்ட வாக்கு வங்கியைக் கொண்டிருந்த பல கட்சிகள் இம்முறை சுவடு தெரியாமல் மறைந்து போயுள்ளன.
திமுக மற்றும் அதிமுக ஆகிய இரு பெரும் கூட்டணிகளைச் சார்ந்து தங்களது இருப்பைத் தக்கவைத்து வந்த இந்தக் கட்சிகள், தவெகவின் எழுச்சியால் தற்போது தங்களது அரசியல் அடையாளத்தையே இழக்கும் அபாயத்திற்குத் தள்ளப்பட்டுள்ளன.
வாக்கு எண்ணிக்கை விவரங்களின்படி, திமுக கூட்டணியில் உள்ள காங்கிரஸ் 5 இடங்களிலும், இடதுசாரி கட்சிகளான சிபிஐ மற்றும் சிபிஎம் தலா 2 இடங்களிலும் மட்டுமே முன்னிலை பெற்றுள்ளன. அதேபோல் ஐயுஎம்எல் 2 இடங்களிலும், விசிக மற்றும் தேமுதிக தலா 1 இடத்திலும் சுருங்கிப்போயுள்ளன. மிக முக்கியமாக, வைகோ தலைமையிலான மதிமுக படுதோல்வி அடைந்துள்ளது.
அதிமுக கூட்டணியைப் பொறுத்தவரை, பாமக 6 இடங்களைப் பிடித்து ஓரளவு தனது கௌரவத்தைத் தக்கவைத்தாலும், பாஜக வெறும் 1 இடத்திலும், அமமுக 1 இடத்திலும் மட்டுமே முன்னிலை பெற்றுள்ளன. நாம் தமிழர் கட்சி ஒரு இடத்தில் கூட கணக்கைத் தொடங்க முடியாமல் போனது அக்கட்சியினருக்குப் பெரும் அதிர்ச்சியை தந்துவிட்டது. அக்கட்சியின் தலைவர் சீமான் தனது காரைக்குடி தொகுதியில் டெபாசிட் இழந்தார்.
காங்கிரஸ் மற்றும் பாமக ஆகிய இரு கட்சிகளைத் தவிர, மற்ற அனைத்து சிறிய கட்சிகளும் இந்தத் தேர்தலில் மிக மோசமான தோல்வியைச் சந்தித்துள்ளன. பல ஆண்டுகளாக ஒரு குறிப்பிட்ட சமூகத்தையோ அல்லது கொள்கையையோ முன்னிறுத்தி அரசியல் செய்து வந்த இந்தக் கட்சிகளின் செல்வாக்கு, விஜய்யின் வருகைக்குப் பிறகு ஒட்டுமொத்தமாகச் சரிந்துள்ளதை இந்தத் தரவுகள் உறுதிப்படுத்துகின்றன. குறிப்பாக, இளைஞர்கள் மற்றும் முதல்முறை வாக்காளர்கள் பழைய கூட்டணிக் கணக்குகளைத் தூக்கி எறிந்துவிட்டு, புதிய மாற்றத்தை நோக்கி நகர்ந்துள்ளதால், இந்தக் கட்சிகளின் “பருப்பு இனி வேகாது” என்ற அரசியல் விமர்சனம் தற்போதைய சூழலில் உண்மையாகி வருகிறது.
இந்தத் தேர்தல் முடிவுகள் சிறிய கட்சிகளுக்கு விடுக்கப்பட்டுள்ள ஒரு இறுதி எச்சரிக்கையாகவே பார்க்கப்படுகிறது. கூட்டணியின் தயவில் ஓரிரு இடங்களைப் பிடித்து வந்த காலம் முடிந்துவிட்டதை மக்கள் தங்களது தீர்ப்பின் மூலம் உணர்த்தியுள்ளனர். தவெகவின் அசுர வளர்ச்சியால் ஏற்பட்ட இந்த அரசியல் மாற்றம், அடுத்தடுத்த தேர்தல்களில் இந்தக் கட்சிகளை மக்கள் சீந்தவே மாட்டார்கள் என்ற அச்சத்தை அவற்றின் தலைவர்கள் மத்தியில் உருவாக்கியுள்ளது. ஒரு வலுவான மாற்றுச் சக்தி உருவெடுக்கும்போது, கொள்கைப் பிடிப்பற்ற மற்றும் கூட்டணி பேரம் பேசும் கட்சிகளை மக்கள் நிராகரிப்பார்கள் என்பதற்கு இந்தத் தோல்விகளே சாட்சி.
ஒட்டுமொத்தமாகப் பார்க்கையில், 2026 தேர்தல் என்பது தமிழக அரசியலில் ஒரு சுத்திகரிப்பு நடவடிக்கையாக மாறியுள்ளது. திராவிடப் பேரியக்கங்களின் நிழலில் வளர்ந்த கட்சிகள் அனைத்தும் இன்று தனித்துவத்தை இழந்து தவிக்கின்றன. விஜய்யின் அரசியல் சூறாவளி, தேமுதிக, விசிக, இடதுசாரிகள் எனப் பல கட்சிகளின் வாக்கு வங்கியை வேரோடு பிடுங்கி எறிந்துவிட்டது. இனிவரும் காலங்களில் இக்கட்சிகள் தங்களைத் தீவிரமாக மறுசீரமைப்பு செய்யத் தவறினால், தமிழக அரசியல் வரைபடத்தில் இருந்து இவை நிரந்தரமாக நீக்கப்படுவதைத் தவிர்க்க முடியாது என்பதே நிதர்சனமான உண்மை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
