தமிழக அரசியல் களம் 2026 சட்டமன்ற தேர்தலை நோக்கி அதிவேகமாக நகர்ந்து வரும் சூழலில், அரசியல் விமர்சகர்கள் மற்றும் தேர்தல் வியூகவாதிகளின் கணக்கீடுகள் அனைத்தும் ஒரே புள்ளியில் வந்து குவிகின்றன; அது ‘விஜய் காரணி’.
தமிழக வெற்றி கழகத்தின் வருகை ஆளுங்கட்சியான திமுகவின் வாக்கு வங்கியில் எந்த அளவுக்கு சிதைவை ஏற்படுத்தும் என்பதுதான் தற்போதுள்ள மில்லியன் டாலர் கேள்வி. குறிப்பாக, ஒரு தொகுதியில் விஜய் வாங்கும் வாக்கு எண்ணிக்கைக்கும், திமுகவின் வெற்றி வாய்ப்புக்கும் இடையே நேரடி தொடர்பு இருப்பதாக புள்ளிவிவரங்கள் எச்சரிக்கின்றன.
ஒரு தொகுதியில் விஜய் 10,000 முதல் 15,000 வாக்குகள் வரை பிரித்தால், அது திமுகவுக்கு பெரிய பாதிப்பை ஏற்படுத்தாது என்றும், திமுகவின் வாக்கு வங்கியில் ஏற்படும் சிறு சரிவை மற்ற கூட்டணி கட்சிகளின் பலம் ஈடுகட்டிவிடும் என்றும் கணிக்கப்படுகிறது. இது போன்ற சூழலில் திமுக ‘தப்பிக்கும்’ வாய்ப்புகள் அதிகம்.
ஆனால், விஜய்யின் வாக்கு சேகரிப்பு 15,000 முதல் 25,000 வரை உயரும் பட்சத்தில், அது ஆளுங்கட்சிக்கு கடுமையான நெருக்கடியை உருவாக்கும். இந்த வாக்குகள் பெரும்பாலும் திமுகவின் பாரம்பரிய வாக்கு வங்கியில் இருந்தும், முதல்முறை வாக்காளர்களிடம் இருந்தும் பிரியும் என்பதால், பல தொகுதிகளில் திமுகவின் தோல்வி உறுதியாகக்கூடும் என்கிறார்கள் அரசியல் நோக்கர்கள்.
குறிப்பாக, மும்முனை அல்லது நான்கு முனை போட்டி நிலவும் போது, குறைவான வாக்கு வித்தியாசத்தில் வெற்றி-தோல்வி தீர்மானிக்கப்படும் தொகுதிகளில் விஜய் பிரிக்கும் ஒவ்வொரு வாக்கும் ஆளுங்கட்சியின் அதிகார கனவை சிதைக்கும் ஆயுதமாக மாறும். விஜய்யின் இந்த வாக்குச் சதவீதம் என்பது வெறும் 2026 தேர்தலுக்கான முடிவு மட்டுமல்ல, அது தமிழகத்தின் எதிர்கால கூட்டணி அரசியலைத் தீர்மானிக்க போகும் ஒரு முக்கியக் குறியீடாகவும் பார்க்கப்படுகிறது.
தேசிய மற்றும் மாநில அளவில் நிலவும் அரசியல் மாற்றங்களை கவனிக்கும் போது, விஜய் 20% அல்லது அதற்கு மேற்பட்ட வாக்கு சதவீதத்தை எட்டினால், அது 2029 நாடாளுமன்ற தேர்தலில் ஒரு மிகப்பெரிய அரசியல் சுனாமியை ஏற்படுத்தும். தற்போதைய நிலையில் திமுக கூட்டணியில் அங்கம் வகிக்கும் காங்கிரஸ், விடுதலை சிறுத்தைகள் கட்சி, மதிமுக மற்றும் கம்யூனிஸ்ட் கட்சிகள், 2026 தேர்தல் முடிவுகளுக்கு பிறகு தங்கள் நிலைப்பாட்டை மறுபரிசீலனை செய்ய வாய்ப்புள்ளது.
ஒருவேளை திமுகவின் செல்வாக்கு சரிந்து, விஜய்யின் செல்வாக்கு எழுச்சி பெற்றால், 2029-ல் இந்தக் கட்சிகள் அனைத்தும் தங்களது எதிர்கால அரசியல் நலன் கருதி விஜய் தலைமையிலான கூட்டணிக்கு தாவும் சூழல் உருவாகும். காங்கிரஸ் போன்ற தேசிய கட்சிகள் எப்போதும் வெற்றி வாய்ப்புள்ள மற்றும் பலமான வாக்கு வங்கி கொண்ட பக்கமே சாய விரும்பும் என்பதால், விஜய்யின் ’20 சதவீத மேஜிக்’ நிகழ்ந்தால், தமிழகத்தின் தற்போதைய மெகா கூட்டணி சிதறி விஜய் பக்கம் அணிவகுக்கும் என்பது அரசியல் விமர்சகர்களின் ஒருமித்த கருத்தாக உள்ளது.
எனவே, 2026-ல் விஜய் வாங்கும் ஒவ்வொரு வாக்கும் தமிழக அதிகார மையத்தின் திசையை மாற்றப் போகும் வல்லமை கொண்டவை என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
