தமிழக அரசியல் களத்தில் ஏற்பட்டுள்ள தற்போதைய மாற்றங்கள், வரவிருக்கும் 2026 சட்டமன்ற தேர்தல் முடிவுகளை தீர்மானிக்கும் மிக முக்கிய காரணியாக உருவெடுத்துள்ளன. குறிப்பாக, திமுக கூட்டணியில் நீண்டகாலமாக நீடித்து வரும் காங்கிரஸ் கட்சிக்கும், ஆளுங்கட்சிக்கும் இடையே நிலவும் மோதல் போக்கு, ஒரு புதிய அரசியல் புரட்சியை நோக்கி தள்ளியுள்ளது.
திமுக கூட்டணியில் இருந்து காங்கிரஸ் விலகி, நடிகர் விஜய்யின் தமிழக வெற்றி கழகத்துடன் கைகோர்த்தால், அது மக்கள் மத்தியில் ஒரு மிகப்பெரிய தாக்கத்தை ஏற்படுத்தும். இவ்வளவு காலம் திமுகவுடன் பயணித்த ஒரு தேசிய கட்சி, இப்போது தவெகவை நோக்கி செல்கிறது என்றால், அங்குதான் வெற்றி வாய்ப்பு இருக்கிறது என்ற எண்ணம் பொதுமக்களிடையே இயல்பாகவே உருவாகும். இது நடுநிலை வாக்காளர்களை தவெக பக்கம் இழுப்பதற்கான ஒரு ‘இமேஜ் கிரியேட்டர்’ ஆக அமையும்.
காங்கிரஸ் கட்சியின் முக்கிய நிர்வாகிகளான மாணிக்கம் தாகூர் மற்றும் ஜோதிமணி ஆகியோர் அண்மை காலமாக திமுக அரசை விமர்சிப்பதும், “ஆட்சியில் பங்கு” என்று குரல் எழுப்புவதும் தன்னிச்சையானது அல்ல என்று அரசியல் நோக்கர்கள் கருதுகின்றனர். இது ராகுல் காந்தி, பிரியங்கா காந்தி, கார்கே மற்றும் சோனியா காந்தி ஆகியோரின் விருப்பப்படியே நடப்பதாக கொள்ள வேண்டும்.
ஏனெனில், ஒரு கூட்டணியின் தலைமை வகிக்கும் கட்சியை அந்த அணியில் உள்ள மற்ற நிர்வாகிகள் விமர்சிக்கும்போது, தேசிய தலைமை அவர்கள் மீது நடவடிக்கை எடுக்கவில்லை என்றால், அது மேலிடத்தின் மறைமுக ஆதரவு இருப்பதையே காட்டுகிறது. இந்த “அதிகாரத்தில் பங்கு” என்ற முழக்கம் திமுக கூட்டணியில் ஒரு பெரிய சலசலப்பை ஏற்படுத்தியுள்ளதுடன், காங்கிரஸ் தனது அடுத்தகட்ட நகர்வுக்கு தயாராகி வருவதையும் உணர்த்துகிறது.
தேர்தல் நெருங்கும் வேளையில் ஒரு குறிப்பிட்ட கட்சி வெற்றி பெறும் என்ற ‘டிரெண்ட்’ உருவானால், மற்ற கட்சிகளில் உள்ள நிர்வாகிகள் அந்த திசை நோக்கி நகர தொடங்குவார்கள். லெட்டர்பேடு கட்சிகள் என்று சொல்லப்படும் சிறிய இயக்கங்கள் கூட, வெற்றி வாய்ப்பு உள்ள கட்சிக்கு தங்களின் ஆதரவை தெரிவிக்க அணிவகுக்கும். அந்த வகையில் காங்கிரஸ் போன்ற ஒரு குறிப்பிட்ட வாக்கு வங்கி கொண்ட கட்சி தவெகவை நோக்கி சென்றால், அது விஜய்யின் வெற்றிக்கு மிகப்பெரிய கூடுதல் பலமாக அமையும். இதுவரை எந்த கட்சிக்கு வாக்களிப்பது என்று குழப்பத்தில் இருந்த வாக்காளர்கள் கூட, “தவெகதான் ஜெயிக்கும் போலிருக்கிறது” என்ற முடிவுக்கு வந்து அவர்களுக்கு வாக்களிக்க முன்வருவார்கள்.
விஜய்யின் பார்வையில் திமுக மற்றும் அதிமுக ஆகிய இரு கூட்டணிகளுமே தற்போது பலவீனமாகவே உள்ளன. திமுக கூட்டணிக்குள் இருக்கும் இடதுசாரிகள் அல்லது விசிக போன்ற கட்சிகள் ஓரளவிற்கு வாக்கு வங்கியை வைத்திருந்தாலும், ஆளுங்கட்சி மீதான அதிருப்தி அந்த வாக்குகளை சிதைக்கும் என அவர் நம்புகிறார். மறுபுறம் அதிமுக கூட்டணியில் எடப்பாடி பழனிசாமிக்கு போதுமான அளவில் வலுவான ஆதரவு இல்லாதது மற்றும் மற்ற சிறிய கட்சிகளின் பிம்பம் சிதைந்து போயிருப்பது விஜய்க்கு ஒரு பெரிய வாய்ப்பை வழங்கியுள்ளது. எம்.ஜி.ஆர் மற்றும் ஜெயலலிதா ஆகியோரின் பெயர்களை சொல்லி, அந்த பாரம்பரிய வாக்குகளை தன் பக்கம் திருப்புவதுதான் விஜய்யின் தற்போதைய முக்கிய வியூகமாக உள்ளது.
இறுதியாக, தேர்தல் நேர கூட்டங்களில் ஏற்படும் விபத்துகள் மற்றும் உயிரிழப்புகளை தவிர்க்க விஜய் மிகவும் கவனமாக செயல்பட வேண்டியுள்ளது. நிர்வாக குளறுபடிகள் அல்லது வெயிலின் தாக்கம் காரணமாக ஏற்படும் மரணங்கள் எதிர்க்கட்சிகளால் விஜய்க்கு எதிராக பயன்படுத்தப்படுகின்றன. எதிர்காலத்தில் இத்தகைய அசம்பாவிதங்கள் நடக்காமல் இருக்க, கூட்டங்களை உச்சி வெயில் நேரத்திலோ அல்லது அதிக இரவிலோ நடத்தாமல், மாலை நேரங்களில் நடத்துவது அவருக்கு நல்லது. ஒவ்வொரு அனுபவத்திலிருந்தும் பாடம் கற்றுக்கொண்டு, தனது தேர்தல் அறிக்கையை ஒரு துருப்புச்சீட்டாக பயன்படுத்தினால், விஜய் தமிழக அரசியலில் ஒரு புதிய சகாப்தத்தைப் படைப்பதற்கான வாய்ப்புகள் பிரகாசமாக உள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
