தமிழக அரசியல் வரலாற்றில் முப்பத்தைந்து ஆண்டுகால பத்திரிகை பணியில் இதுவரை கண்டிராத ஒரு பேரதிசயத்தை நான் கண்கூடாக பார்த்ததாக பத்திரிகையாளர் மணி அளித்த பேட்டியில் கூறியுள்ளர். விஜய் ஃபேக்டரை ஏதோ மேம்போக்காக சொல்லப்படும் வார்த்தையாக கருதிவிட முடியாது, ஏனெனில் களத்தில் நிலவும் எதார்த்தம் அத்தனை வலுவாக உள்ளது.
ஒரு பத்திரிகையாளராக பல தேர்தல்களை, பல அரசியல் மாற்றங்களை சந்தித்திருந்தாலும், தற்போது விஜய் என்ற தனிமனிதரை சுற்றி உருவாகியுள்ள இந்த எழுச்சி என்பது எவராலும் எளிதில் விளக்கிவிட முடியாத ஒரு Phenomenon ஆக உருவெடுத்துள்ளது. இதனை வெறும் சினிமா கவர்ச்சியாகவோ அல்லது ஒரு தற்காலிக அலை என்றோ ஒதுக்கித் தள்ளுவது என்பது அரசியல் முதிர்ச்சியின்மையையே காட்டும்.
டிவி ஸ்டுடியோக்களிலும், ஊடக விவாதங்களிலும் அமர்ந்துகொண்டு ‘இதெல்லாம் ஒண்ணுமே இல்லை, வெறும் பத்தாயிரம் ஓட்டுகளோடு விஜய் அரசியல் முடிந்துவிடும்’ என்று பேசும் அரசியல் விமர்சகர்கள் தங்கள் அறிவு நேர்மையை தொலைத்துவிட்டு பேசுகிறார்கள் என்றே சொல்ல வேண்டும். கடந்த காலங்களில் சிவாஜி கணேசன், கமல்ஹாசன், விஜயகாந்த் போன்ற ஆளுமைகள் அரசியலுக்கு வந்தபோது இருந்த சூழலை விட, இன்று விஜய்க்கு இருக்கும் ஆதரவு பல மடங்கு வீரியமிக்கதாக இருப்பதை நேர்மையான எவரும் மறுக்க முடியாது. கண்ணை திறந்து பார்த்தால் தெரியும் இந்த கடலென திரண்ட மக்கள் கூட்டம் எதற்காக கூடுகிறது என்பதை உணராமல், பழைய உதாரணங்களை சுட்டிக்காட்டி மட்டம் தட்டுவது என்பது பச்சைப்பொய் சொல்லும் செயலாகும்.
கடந்த ஐந்து ஆண்டுகளாக சில குறிப்பிட்ட அரசியல் சக்திகளுக்கு சொம்படித்தே தங்கள் வாழ்க்கையை ஓட்டிய ‘வாடகை வாய்கள்’ 80% வாக்குப்பதிவுக்கு என்ன பேசுவதென்று தெரியாமல் திணறி போயிருக்கிறார்கள். விஜய்யின் வருகை எவ்வித மாற்றத்தையும் ஏற்படுத்தாது என்று கூச்சலிட்டவர்களின் வீட்டிலேயே, அவர்களின் பிள்ளைகளும் குடும்ப உறுப்பினர்களும் விஜய்க்கு வாக்களிக்க தயாராகிவிட்டார்கள் என்பதுதான் நிதர்சனம்.
இந்த உண்மையை விழுங்க முடியாமல், கிணற்றில் விழுந்த நிலவாக அவர்கள் தவித்து கொண்டிருக்கிறார்கள். ஒரு பத்திரிகையாளனாக உண்மையை உரக்க சொல்லாவிட்டால் அது தொழிலுக்கு செய்யும் துரோகம் என்பதால், இந்த மாற்றத்தை ஒரு ‘பேரதிசயம்’ என்று பதிவு செய்வதில் எவ்விதத் தயக்கமும் இல்லை.
இந்த அரசியல் மாற்றத்தை வெறும் இளைஞர்களுக்கானது என்று மட்டும் சுருக்கி பார்த்துவிட முடியாது. கல்லூரி மாணவர்கள் மற்றும் இளைஞர்கள் மத்தியில் விஜய் ஒரு அடையாளமாக திகழ்வது உண்மைதான், ஆனால் அதையும் தாண்டி நடுத்தர வயதுடையவர்கள் மற்றும் முதியவர்கள் மத்தியிலும் அவர் மீதான நம்பிக்கை ஆழமாக வேரூன்றியுள்ளது. குறிப்பாக பெண்கள் மத்தியில் விஜய்க்கு இருக்கும் ஆதரவு என்பது மற்ற அரசியல் தலைவர்களுக்கு சிம்ம சொப்பனமாக மாறியுள்ளது. ஒரு வீட்டின் பெண்களும் இளைஞர்களும் ஒரு பக்கம் நின்றால், அந்த தேர்தல் முடிவுகள் எப்படி இருக்கும் என்பதை புரிந்துகொள்ள பெரிய அரசியல் ஞானம் தேவையில்லை.
நிச்சயமாக இது வாக்குகளாக மாறுமா, எத்தனை தொகுதிகளில் வெற்றி கிடைக்கும் என்பதெல்லாம் தேர்தல் முடிவுகளில் தெரியவரும். ஆனால், இன்று மக்கள் மத்தியில் உருவாகியுள்ள இந்த அரசியல் தெளிவும், ஒரு புதிய மாற்றத்திற்கான ஏக்கமும் விஜய்யின் மூலம் வெளிப்படுவது மறுக்க முடியாத உண்மை.
இதனை புரிந்துகொள்ள மறுப்பவர்கள் அல்லது மழுப்புபவர்கள் தங்களை சுற்றி நடக்கும் நிஜங்களை உணர மறுக்கும் அறிவிலிகளாகவே கருதப்படுவார்கள். தமிழக அரசியலில் இது ஒரு புதிய அத்தியாயத்தின் தொடக்கம் என்பதில் எவ்வித ஐயமும் இல்லை; இந்த மௌன புரட்சி வாக்குச்சாவடிகளில் எதிரொலிக்கும்போது பலரின் அரசியல் கணக்குகள் தவிடு பொடியாவது உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
