நடிகர் விஜய்யின் தமிழக வெற்றி கழகம் தமிழக அரசியலில் காலடி எடுத்து வைத்திருப்பதால், எதிர்வரும் தேர்தல்களுக்கான கருத்துக்கணிப்புகள் மற்றும் கூட்டணி சமன்பாடுகள் குறித்துப் புதிய விவாதங்கள் எழுந்துள்ளன. பிரதான அரசியல் கட்சிகளுக்கு மாற்றாக பார்க்கப்படும் த.வெ.க.வின் உண்மையான பலம் என்ன, அதன் வெற்றி வாய்ப்புகள் எப்படி இருக்கும் என்பது குறித்த தொடர்ச்சியான ஆய்வுகள் அரசியல் வட்டாரத்தில் சலசலப்பை ஏற்படுத்தியுள்ளன.
சமீபத்தில் வெளியான கருத்துக்கணிப்பு ஒன்றில் விஜய்யின் கட்சிக்கு 23 சதவிகித வாக்கு சதவீதம் இருப்பதாக ஆங்கில ஊடகம் ஒன்று செய்தி வெளியிட்டது. எனினும், த.வெ.க.வின் ஆதரவாளர்கள் தரப்பு, இந்த எண்கள் கள நிலவரத்தையும், இளைஞர்கள் மத்தியில் இருக்கும் ஆதரவின் ஆழத்தையும் துல்லியமாக பிரதிபலிக்கவில்லை என்று கருதுகின்றனர். தவெகவை குறைத்து மதிப்பிட்டு மக்கள் மத்தியில் தவெக ஆட்சியை பிடிக்காது என்ற பிம்பத்தை ஏற்படுத்துவதற்காக கிளப்பிவிட்ட கதையாக இருக்கலாம் என்று தவெக தொண்டர்கள் கூறுகின்றனர்.
தமிழகத்தில் ஆளும் மற்றும் எதிர்க்கட்சிகளுக்கு மாற்றாக ஒரு தூய்மையான அரசியல் தலைமை வேண்டும் என்று கருதும் நடுநிலை வாக்காளர்கள், படித்த இளைஞர்கள், மற்றும் முதல் தலைமுறை வாக்காளர்கள் மத்தியில் விஜய்க்கு கணிசமான ஆதரவு இருப்பதாக அரசியல் பார்வையாளர்கள் கருதுகின்றனர்.
இந்த நடுநிலை ஆதரவை பெறுவதற்கு, த.வெ.க. தனது அரசியல் நிலைப்பாட்டை தெளிவாகவும், தனித்துவமாகவும் நிலைநிறுத்த வேண்டிய கட்டாயத்தில் உள்ளது. ஒருவேளை, பிரதான அரசியல் கட்சிகளான அதிமுக அல்லது பாஜக போன்றவற்றுடன் கூட்டணி அமைத்தால், நடுநிலை மக்கள் மத்தியில் தற்போது இருக்கும் நம்பிக்கையும், தனித்தன்மையும் நீர்த்து போக வாய்ப்புள்ளது என்றும், அது த.வெ.க.வின் அரசியல் வளர்ச்சிக்கு சாதகமாக இருக்காது என்றும் ஒரு தரப்பினர் கருதுகின்றனர்.
அதிமுக அல்லது பாஜக கூட்டணியில் இணைவது, விஜய்யின் புதிய அரசியல் பயணத்திற்கு ஒரு பெரிய பின்னடைவை ஏற்படுத்தக்கூடும் என்று அரசியல் உத்திகளை வகுப்பவர்கள் மத்தியில் பேச்சு அடிபடுகிறது. கூட்டணியில் இணைந்தால், குறிப்பிட்ட பிராந்திய அல்லது சாதி சமன்பாட்டிற்குள் முடங்கி போக நேரிடலாம்.
மாறாக, த.வெ.க. தனித்து போட்டியிடுவதே அதன் நோக்கங்களை முழுமையாக மக்களிடம் கொண்டு சேர்க்கவும், கட்சிக்கு உள்ள உண்மையான பலத்தை நிரூபிக்கவும் ஒரே வழியாகும் என்று அக்கட்சி நம்புவதாக கூறப்படுகிறது. மேலும், தனித்து போட்டியிடுவது மட்டுமே, ‘மாற்றம் வேண்டும்’ என்ற மனநிலையில் இருக்கும் பொதுமக்களின் எதிர்பார்ப்பை முழுமையாக பூர்த்தி செய்ய முடியும். இத்தகைய வியூகம், 2026 சட்டமன்ற தேர்தலில் ஒரு பிரதான சக்தியாக உருவெடுக்கவும், ஒருவேளை ஆட்சியை கைப்பற்றவும் கூட வழிவகுக்கும் என்று உள்வட்டார தகவல்கள் ஆச்சரியமான கணிப்புகளை முன்வைக்கின்றன.
தற்போதைய ஊடகங்களில் வெளியாகும் கருத்துக்கணிப்புகளை குறைவான மதிப்பீடு என்று நிராகரிக்கும் த.வெ.க. ஆதரவாளர்கள், தங்கள் கட்சியின் வியூகமும், தனித்து போட்டி முடிவும் நிச்சயம் பெரும் வெற்றியை குவிக்கும் என்றும், குறைந்தது 45% வாக்குகள் கிடைக்கும் என்றும் திடமாக நம்புகின்றனர். விஜய்யின் அரசியல் எதிர்காலத்தை பொறுத்தவரை, அடுத்த சில மாதங்களில் அவர் எடுக்கும் கூட்டணியும், தனித்து போட்டி குறித்த முடிவும் தமிழக அரசியல் வரலாற்றை நிர்ணயிக்கும் முக்கியமான கட்டங்களாக அமையும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
