தமிழக அரசியல் களம் தற்போது கண்டிராத ஒரு புதிய அலை உருவாகி வருகிறது. ஒரு அரசியல் தலைவரின் வருகைக்காக லட்சக்கணக்கான மக்கள் தானாக முன்வந்து குவிவது, அனைத்து முன்னணி ஊடகங்களும் அதை நேரலையாக ஒளிபரப்புவது, சமூக வலைத்தளங்கள் முழுவதும் ஒரே தலைவரின் பெயர் டிரெண்டாவது – இப்படி ஒரு நிகழ்வு இதற்கு முன் தமிழக அரசியல் வரலாற்றில் நிகழ்ந்ததுண்டா? இந்த கேள்வியைத்தான் நடிகர் விஜய்யின் நாமக்கல் மற்றும் கரூர் மக்கள் சந்திப்பு பயணங்கள் தமிழகம் முழுவதும் ஏற்படுத்தியுள்ளன.
விஜய்யின் அரசியல் பயணத்தின் ஒவ்வொரு அடியும் ஒரு புதிய சாதனையை படைத்து வருகிறது. நாமக்கல்லில் அவரது வருகை, அந்த மாவட்டத்தையே ஸ்தம்பிக்க வைத்தது. சாலைகள், தெருக்கள், வீதிகளில் என எங்கு பார்த்தாலும் மக்கள் வெள்ளமாக நிரம்பியிருந்தனர். கட்சித் தொண்டர்கள் அல்லாமல், விஜய்யை நேரில் காணவேண்டும் என்ற ஆவலில், பள்ளி மாணவர்கள், இளைஞர்கள், பெண்கள், பெரியவர்கள் என அனைத்துத் தரப்பு மக்களும் லட்சக்கணக்கில் திரண்டிருந்தனர்.
விஜய்யின் மக்கள் சந்திப்பு பயணத்திற்காக பயன்படுத்தப்பட்ட பிரத்யேக வேன், மக்கள் வெள்ளத்தில் சிக்கி நகர முடியாமல் ஊர்ந்து சென்றது. ஒருசில கிலோமீட்டர் தூரத்தை கடக்க மணிநேரங்கள் ஆனது. இது, எந்தவித கட்டாயமோ அல்லது பண பலமோ இல்லாமல், மக்கள் தானாக முன்வந்து காட்டிய அன்பின் வெளிப்பாடாக இருந்தது. திரையுலகில் ஒரு நட்சத்திரமாக இருந்த விஜய், தற்போது ஒரு அரசியல் தலைவராக மக்களின் மனதில் ஆழமாக பதிந்து வருகிறார் என்பதற்கான அசைக்க முடியாத சாட்சியாக நாமக்கல் கூட்டம் அமைந்தது.
நாமக்கல் கூட்டத்தின் பரபரப்பு முடிந்தவுடன் அடுத்த சில மணி நேரத்தில் விஜய் என்ற அரசியல் புயல் கரூரில் மையம் கொள்ளவுள்ளது. திமுகவின் ‘தளபதி’ என்று கூறப்படும் அமைச்சர் செந்தில் பாலாஜியின் கோட்டையாக கருதப்படும் கரூரில், விஜய்யின் வருகை பெரும் சவாலாக இருக்கும். சமீபத்தில் திமுகவின் முப்பெரும் விழா, அதற்குப் பிறகு எடப்பாடி பழனிசாமியின் பிரச்சாரம் என கரூரில் அடுத்தடுத்து அரசியல் நிகழ்வுகள் நடந்தன. ஆனால், இவற்றுக்கெல்லாம் சவால் விடும் வகையில், விஜய்யின் கூட்டம் அனைத்தையும் மிஞ்சும் விதத்தில் அமைந்தது.
கரூரின் முக்கிய சாலைகள் போக்குவரத்து நெரிசலால் செயலிழந்து, மக்கள் கூட்டம் அலைமோதியது. இது, வெறும் கூட்டமல்ல, திமுகவின் கோட்டைக்குள் ஒரு அரசியல் சக்தி நுழைந்து விட்டதற்கான அறிகுறியாக பார்க்கப்படுகிறது. விஜய்யின் வருகை, திமுகவின் முன்னணி தலைவர்களின் தூக்கத்தை கெடுத்துள்ளது என்று அரசியல் விமர்சகர்கள் கூறுகின்றனர்.
விஜய்யின் ஒவ்வொரு மக்கள் சந்திப்பு பயணமும், முன்னணி செய்தி ஊடகங்களின் கவனத்தை ஈர்த்து வருகிறது. வழக்கமாக, ஒரு கட்சி நிகழ்ச்சிக்கு செய்தி சேகரிக்கச் செல்லும் ஊடகங்கள், விஜய்யின் பயணத்தை ஒரு தேசிய முக்கியத்துவம் வாய்ந்த நிகழ்வாக கருதி நேரலையாக ஒளிபரப்புகின்றன. இது, விஜய்யின் அரசியல் நகர்வுகளுக்கு கிடைத்த ஒரு பெரிய அங்கீகாரமாகும்.
சமூக வலைத்தளங்களான ட்விட்டர் மற்றும் முகநூலில், “#TVK”, “#கரூரில்விஜய்”, “#நாமக்கல்அலை” போன்ற ஹேஷ்டேக்குகள் தேசிய அளவில் ட்ரெண்ட் ஆகின்றன. விஜய்யின் பேச்சுகள், மக்கள் வெள்ளம் குறித்த வீடியோக்கள், ரசிகர்கள் வெளியிடும் புகைப்படங்கள் என அனைத்தும் வைரலாகப்பரவி, ஒரு புதிய அரசியல் அலையை உருவாக்கி வருகின்றன. இது, விஜய் ரசிகர்கள் மற்றும் தொண்டர்கள் மட்டுமின்றி, பொதுவான வாக்காளர்கள் மத்தியிலும் ஆச்சரியத்தை ஏற்படுத்துகிறது.
இந்த மக்கள் வெள்ளம், வெறும் ஒரு நடிகரின் கவர்ச்சி அல்ல என்று அரசியல் ஆய்வாளர்கள் கூறுகின்றனர். “இதுவரை திரையில் மட்டுமே பார்த்த தலைவரை நேரில் பார்க்க வேண்டும் என்ற ஆசையுடன், அவர் சொல்வதை கேட்க வேண்டும் என்ற ஆர்வத்தில் மக்கள் திரள்கின்றனர். இது, தமிழகத்தின் தற்போதைய அரசியல் நிலவரத்தின் மீது மக்கள் கொண்டுள்ள அதிருப்தியையும், ஒரு மாற்றத்தை எதிர்பார்க்கிறார்கள் என்பதையும் காட்டுகிறது” என்று ஒரு அரசியல் விமர்சகர் கூறுகிறார்.
மக்கள் கூட்டங்களை வாடகைக்கு அமர்த்தும் அரசியல் கலாச்சாரத்திற்கு மத்தியில், விஜய்யின் மக்கள் சந்திப்பு பயணங்கள், மக்கள் சக்திக்கு ஒரு புதிய வரையறையை கொடுத்துள்ளன. விஜய்யின் ஒவ்வொரு நகர்வும், பாரம்பரிய அரசியல் கட்சிகளுக்குப் புதிய சவால்களை முன்வைக்கின்றன. இந்த மக்கள் வெள்ளம், வெறும் காட்சிப் பிழையல்ல; அது தமிழக அரசியலில் விரைவில் ஒரு பெரிய மாற்றத்தை கொண்டு வரப்போகும் புயலின் அறிகுறியே!
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
