தமிழக அரசியல் வரலாற்றில் இதுவரை கண்டிராத ஒரு மிகப்பெரிய மாற்றத்திற்கான அலை தற்போது வீச தொடங்கியுள்ளது. குறிப்பாக, நடிகர் விஜய்யின் தமிழக வெற்றி கழகத்தின் வரவு, பல ஆண்டுகளாக தமிழகத்தை ஆண்டு வரும் திராவிட கட்சிகளின் வாக்கு வங்கி கோட்டைகளை வேரோடு அசைக்க தொடங்கியுள்ளது. பாரம்பரியமாக ஒரு குறிப்பிட்ட கட்சிக்கே வாக்களித்து வந்த தலித் சமூகத்தின் வாக்குகள், இந்த முறை ஒட்டுமொத்தமாக விஜய்யின் பக்கம் நகர தொடங்கியுள்ளதாக அரசியல் நோக்கர்கள் கருதுகின்றனர். சமூக நீதி மற்றும் சமத்துவத்தை முன்வைத்து விஜய் எடுத்து வரும் நகர்வுகள், அடித்தட்டு மக்களின் நம்பிக்கையை பெற்றுள்ளதோடு, தங்களை ஒரு வாக்கு வங்கியாக மட்டுமே பார்த்த கட்சிகளுக்கு பாடம் புகட்ட அவர்கள் தயாராகிவிட்டதையே இது காட்டுகிறது.
இந்த தேர்தலின் போக்கை மாற்றப்போகும் மிக முக்கியமான சக்தியாக முதல்முறை வாக்காளர்கள் உருவெடுத்துள்ளனர். சுமார் 70 சதவீதத்திற்கும் அதிகமான இளம் வாக்காளர்கள், எந்தவித அரசியல் சார்பும் இன்றி, ஒரு மாற்றத்திற்காக காத்திருக்கின்றனர். பழைய அரசியல் சண்டைகளையும், வாரிசு அரசியலையும் கண்டு சலிப்படைந்த இந்த இளைஞர் பட்டாளம், விஜய்யை தங்களின் ஒரு அங்கமாகவே பார்க்கிறது. ஊழலற்ற நிர்வாகம் மற்றும் வெளிப்படையான அரசியல் என்ற தவெகவின் முழக்கம், இந்த தலைமுறையினரை ஈர்த்துள்ளது. ஒரு புரட்சியை ஏற்படுத்த துடிக்கும் இந்த இளைஞர்களின் வாக்குகள், தேர்தல் முடிவுகளில் மிகப்பெரிய அதிர்வலைகளை ஏற்படுத்தும் என்பதில் ஐயமில்லை.
பெண் வாக்காளர்களின் ஆதரவும் இந்த முறை விஜய்க்கு பெருமளவில் பெருகி வருகிறது. குறிப்பாக, 40 வயதுக்குட்பட்ட இளைய தலைமுறை பெண்கள், குடும்ப அரசியலை தாண்டி சிந்திப்பவர்களாக மாறியுள்ளனர். கல்வி, வேலைவாய்ப்பு மற்றும் பாதுகாப்பு குறித்த விஜய்யின் திட்டங்கள் பெண் வாக்காளர்களை கவர்ந்துள்ளன. திராவிட கட்சிகள் வழங்கும் இலவசங்களை விட, தற்சார்பு வாழ்வாதாரத்தை நோக்கிய விஜய்யின் அணுகுமுறை இவர்களிடம் எடுபட்டுள்ளது. தமிழகத்தின் சரிபாதி பலமான பெண் வாக்குகளில் பெரும் பகுதியை விஜய் தட்டி செல்வார் என்ற கணிப்பு, ஆளுங்கட்சியையும் எதிர்க்கட்சியையும் கலக்கத்தில் ஆழ்த்தியுள்ளது.
பாரம்பரியக் கட்சிகளின் வாக்குகள் தலைகீழாக மாறுவது, தமிழக அரசியல் களத்தை ஒரு விறுவிறுப்பான த்ரில்லர் திரைப்படம் போல மாற்றியுள்ளது. ஒவ்வொரு தொகுதியிலும் நிலவும் இழுபறி நிலையும், புதிய வாக்காளர்களின் மௌன புரட்சியும் திராவிடக் கட்சிகளின் தேர்தல் வியூகங்களை தோல்வியடைய செய்துள்ளன. இதுவரை ‘வெற்றி நிச்சயம்’ என்று நம்பி கொண்டிருந்த கோட்டைகளில் கூட, தற்போது தவெகவின் கொடி உயரமாக பறப்பதை காண முடிகிறது. திரைமறைவில் நடக்கும் அரசியல் பேரங்கள் மற்றும் வதந்திகளுக்கு அப்பாற்பட்டு, களத்தில் மக்கள் காட்டும் ஆர்வம் ஒரு மிகப்பெரிய அரசியல் சுனாமியின் அறிகுறியாகவே பார்க்கப்படுகிறது.
தமிழக வெற்றி கழகத்திற்கு 200-க்கும் மேற்பட்ட இடங்கள் கிடைத்தாலும் ஆச்சரியப்படுவதற்கில்லை என்ற சூழல் தற்போது உருவாகியுள்ளது. இது ஒரு மிகைப்படுத்தப்பட்ட தகவல் போல் தெரியும், ஆனால் களத்தில் நிலவும் எதார்த்தம் என்று தவெக தொண்டர்கள் நம்பிக்கையுடன் கூறுகின்றனர். எதிர்க்கட்சிகள் தற்போது கிண்டலாகவும் கேலியாகவும் பேசி வந்தாலும், மக்களின் அமைதியான புரட்சி வாக்குப்பெட்டியில் எதிரொலிக்கும் போது அவர்களின் குரல் அடங்கிவிடும். ஒரு புதிய கட்சி இவ்வளவு குறுகிய காலத்தில் இத்தகைய விஸ்வரூபம் எடுப்பது தமிழக வரலாற்றில் இதுவே முதல் முறை. அந்த அசாத்தியமான வெற்றியை நோக்கி விஜய் மிக நிதானமாகவும் உறுதியாகவும் அடியெடுத்து வைக்கிறார்.
இன்னும் ஒரு மாத காலமே எஞ்சியுள்ள நிலையில், கிண்டல் செய்தவர்கள் எல்லாம் வியந்து பார்க்கும் காலம் நெருங்கிவிட்டது. தேர்தல் முடிவுகள் வெளிவரும் போது, தமிழக அரசியல் வரைபடம் முற்றிலும் மாற்றப்பட்டிருக்கும். திராவிட கட்சிகளின் பிடியில் இருந்து தமிழகம் விடுபட்டு, ஒரு புதிய அரசியல் பாதையில் பயணிக்க தொடங்கும். விஜய்யின் அரசியல் வருகை என்பது வெறும் ஒரு நடிகரின் வருகை அல்ல, அது ஒரு தலைமுறையின் ஏக்கம் மற்றும் மாற்றத்திற்கான குரல். அந்த மாற்றத்தின் வெற்றி முழக்கம் மே மாதம் ஒட்டுமொத்த இந்தியாவையும் திரும்பி பார்க்க வைக்கும் என்பதில் மாற்று கருத்தில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
