தமிழக அரசியல் களம் தற்போது 2026 சட்டமன்ற தேர்தலை நோக்கி ஒரு பெரும் போர்க்களமாக மாறியுள்ளது. ஒருபுறம் பல ஆண்டுகளாக ஆட்சி கட்டிலில் இருக்கும் திராவிட கட்சிகள், மறுபுறம் ‘தமிழக வெற்றிக் கழகம்’ என்ற புதிய பாய்ச்சலுடன் களமிறங்கியுள்ள நடிகர் விஜய். இத்தனை ஆண்டுகள் சினிமாவில் உச்சத்தில் இருந்த விஜய், அரசியலுக்கு வந்தவுடன் அவர் மீது தொடுக்கப்படும் தனிநபர் தாக்குதல்களும், குடும்ப விவகாரங்களை மையப்படுத்திய விமர்சனங்களும் எல்லை மீறி செல்கின்றன. ஆனால், எத்தனை சோதனைகள் வந்தாலும், விவாகரத்து நோட்டீஸ் முதல் சிபிஐ வழக்குகள் வரை அனைத்தையும் ஒரு ‘யோகி’ போன்ற நிதானத்துடன் விஜய் எதிர்கொள்வது அவரது அரசியல் முதிர்ச்சியையே காட்டுகிறது.
விஜய்யை ஆரம்பத்தில் ஒரு பலவீனமான அரசியல் சக்தியாகச் சித்தரிக்க முயன்றவர்கள், இன்று அவரைச் சமாளிக்க முடியாமல் திணறி வருவதை அரங்கேறி வரும் அரசியல் நகர்வுகள் வெளிச்சம் போட்டு காட்டுகின்றன. “விஜய்க்கு அரசியல் தெரியாது, அவருக்கு வாக்கு வங்கி இல்லை” என்று எள்ளி நகையாடியவர்கள், இன்று அரை சதவீதம், ஒரு சதவீத வாக்குகள் வைத்திருக்கும் சிறிய அமைப்புகளை கூட தங்கள் பக்கம் இழுக்கப் போராடி வருகின்றனர். ரோட்டில் போவோர் வருவோரையெல்லாம் கட்சியில் சேர்த்துக்கொண்டு, எப்படியாவது ஒரு மெகா கூட்டணியை உருவாக்கி விஜய்யை வீழ்த்த துடிப்பது, எதிர்தரப்பில் நிலவும் ஆழ்ந்த பயத்தையே உறுதிப்படுத்துகிறது.
“சிங்கம் எப்போதும் சிறுநரிகளோடு சேராது” என்ற பழமொழிக்கு ஏற்ப, விஜய் இன்றுவரை எந்தவொரு சந்தர்ப்பவாத கூட்டணியையும் நாடாமல் தனித்துவமாக நின்று களம் காண்கிறார். அரசியலில் அதிகார பலமும், பண பலமும் கொண்ட ஆளுங்கட்சிகள் கூட, விஜய்யின் எழுச்சியை கண்டு அஞ்சி, உதிரி கட்சிகளை வளைத்து போடும் நிலையில், விஜய் தனது தொண்டர் படையை மட்டுமே நம்பி களத்தில் நிற்கிறார். இது அவர் மீது மக்கள் வைத்திருக்கும் நம்பிக்கைக்கு கிடைத்த வெற்றியாக பார்க்கப்படுகிறது. ஒரு பலமான எதிரியை எதிர்கொள்ள துணிவில்லாதவர்கள்தான் கூட்டமாக சேர்ந்து வர துடிப்பார்கள் என்பதற்கு தமிழக அரசியலே இன்று சாட்சியாக உள்ளது.
விஜய்யின் அரசியல் கூட்டங்கள் மற்றும் பொதுநிகழ்வுகளில் காணப்படும் கட்டுப்பாடு, மற்ற கட்சிகளுக்குப் பெரும் சவாலாக மாறியுள்ளது. காசு கொடுத்து அழைத்து வரப்படும் கூட்டத்திற்கும், உணர்வுப்பூர்வமாக தலைவனுக்காக திரண்டு வரும் கூட்டத்திற்கும் உள்ள வித்தியாசத்தை விக்ரவாண்டி முதல் ஈரோடு வரை மக்கள் கண்டுள்ளனர். விஜய்யின் இந்த ‘தனிப்பாதை’ என்பது வெறும் பிடிவாதமல்ல, அது ஒரு புதிய அரசியல் கலாச்சாரத்தை உருவாக்குவதற்கான முயற்சி. ஊழல் கறை படிந்தவர்களையும், சந்தர்ப்பவாதிகளையும் பக்கத்தில் வைத்துக்கொண்டு “தூய்மையான ஆட்சி தருவேன்” என்று அவர் சொல்ல விரும்பவில்லை என்பதையே இது காட்டுகிறது.
சிங்கத்தோடு கூட்டணி வைக்க இன்னொரு சிங்கத்திற்கு மட்டும்தான் தகுதி இருக்கும் என்பது போல, கொள்கை ரீதியாகவும் நேர்மையாகவும் விஜய்யுடன் கைகோர்க்கும் துணிச்சல் கொண்டவர்களுக்காக மட்டுமே தவெகவின் கதவுகள் திறந்திருக்கும். காங்கிரஸ் போன்ற தேசிய கட்சிகள் கூட திமுகவின் அதிகார பகிர்வு மறுப்பால் அதிருப்தியில் இருக்கும் சூழலில், அவர்கள் விஜய்யை ஒரு கௌரவமான மாற்றாக பார்ப்பதில் ஆச்சரியமில்லை. விஜய்யின் நிதானம், பண்பான பேச்சு மற்றும் எதற்கும் கலங்காத உறுதி ஆகியவை அவரை ஒரு ‘மாஸ் லீடர்’ என்பதையும் தாண்டி, ஒரு நம்பிக்கைக்குரிய அரசியல் ஆளுமையாக நிலைநிறுத்தியுள்ளது.
இறுதியாக, 2026 தேர்தல் என்பது வெறும் எண்களுக்கான போட்டியல்ல; அது ‘தனி ஒருவன்’ விஜய்க்கும், அவரை சூழ்ந்து தாக்கும் பழைய அரசியல் சக்திகளுக்கும் இடையிலான தார்மீக போர். எதிரிகள் எவ்வளவு பெரிய பிரம்மாஸ்திரங்களை ஏவினாலும், மக்கள் என்ற கவசத்தோடு விஜய் வீரநடை போட்டு வருகிறார். சிங்கத்தின் கர்ஜனை இன்னும் உரக்க கேட்க தொடங்கும்போது, இப்போது கூட்டமாக சேர்ந்து வருபவர்கள் சிதறி போவது நிச்சயம். தமிழக மக்கள் மாற்றத்தை விரும்புகிறார்கள், அந்த மாற்றத்தின் முகமாக விஜய் கெத்தாக தனித்து நிற்பது அவருக்கு கிடைத்துள்ள மிகப்பெரிய அரசியல் அங்கீகாரமாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
