தமிழக அரசியல் களத்தில் நடிகர் விஜய்யின் வருகை என்பது வெறும் திரை நட்சத்திரத்தின் வரவாக மட்டும் பார்க்கப்படாமல், ஒரு மிகப்பெரிய ‘கிரேஸ்’ அல்லது மக்கள் மோகமாக உருவெடுத்துள்ளது. வரலாற்று ரீதியாக பார்த்தால், எம்.ஜி.ஆர் காலத்தில் ஒரு நடிகரை பார்க்க மக்கள் கட்டுச்சோறு கட்டிக்கொண்டு ஆறுகளை கடந்து வந்த அதே உணர்ச்சிவசப்பட்ட சூழல், தற்போது பெரம்பூர் மற்றும் கொளத்தூர் பகுதிகளில் விஜய்யின் பிரசாரத்தின்போது பிரதிபலித்தது. சென்னை போன்ற பரபரப்பான மாநகரங்களிலேயே ஒரு நடிகருக்காக மக்கள் வீட்டு காம்பவுண்டுகளிலும் மாடிகளிலும் ஏறி நின்று முண்டியடித்தது, விஜய்யின் அரசியல் பிம்பம் எந்தளவுக்கு வலுப்பெற்றுள்ளது என்பதை காட்டுகிறது. இருப்பினும், இந்த அதிரடி வரவு பாதுகாப்பு சவால்களையும் சட்ட சிக்கல்களையும் சேர்த்தே கொண்டு வந்துள்ளது, குறிப்பாக அனுமதிக்கப்பட்ட எண்ணிக்கையை தாண்டி ஸ்பீக்கர்களை பயன்படுத்தியது மற்றும் கூட்டத்தைக் கட்டுப்படுத்தத் தவறியது போன்ற காரணங்களுக்காக அவர் மீது வழக்குகள் பதியப்பட்டுள்ளன.
விஜய்யின் பிரசார வாகனத்தை சுற்றி நிலவிய கூட்ட நெரிசல் மற்றும் பாதுகாப்பு குறைபாடுகள் காரணமாக, அவர் தனது திட்டமிட்ட பல இடங்களுக்கு செல்ல முடியாமல் பாதியிலேயே திரும்ப வேண்டிய சூழல் ஏற்பட்டது. போலீஸ் பாதுகாப்பை பொறுத்தவரை, ஒரு குறிப்பிட்ட எண்ணிக்கையிலான தொண்டர்களுக்கு மட்டுமே பாதுகாப்பு வழங்க முடியும் என்றும், லட்சக்கணக்கில் கூடும் கூட்டத்திற்கு தங்களால் முழுமையான பொறுப்பேற்க முடியாது என்றும் அரசு தரப்பு வாதிடுகிறது. மறுபுறம், தமிழக வெற்றி கழக தரப்பினர் இது திட்டமிட்டு ஏற்படுத்தப்பட்ட முட்டுக்கட்டை என்றும், ஆளுங்கட்சியும் மத்திய அரசும் விஜய்யின் மக்கள் செல்வாக்கை கண்டு அஞ்சுவதாகவும் குற்றம் சாட்டுகின்றனர். இந்த மோதல் போக்கு, ஒரு புதிய அரசியல் சக்தியின் எழுச்சியை தடுப்பதற்கான அதிகார வர்க்கத்தின் முயற்சியாகவே அக்கட்சியினரால் பார்க்கப்படுகிறது.
தேர்தல் களத்தில் வேட்புமனு தாக்கலின்போது விஜய் தாக்கல் செய்த சொத்து விவரங்கள் தற்போது சமூக வலைதளங்களில் மிகப்பெரிய விவாத பொருளாக மாறியுள்ளன. தனது மொத்த சொத்து மதிப்பு 624 கோடி ரூபாய் என்று அவர் குறிப்பிட்டிருப்பது, மற்ற அரசியல் தலைவர்களின் சொத்து கணக்குகளுடன் ஒப்பிடப்படுகிறது. குறிப்பாக, பல ஆண்டுகளாக அதிகாரத்தில் இருக்கும் முதல்வர்கள் மற்றும் முன்னாள் முதல்வர்கள் தங்கள் சொத்து மதிப்பை வெறும் ஆறு அல்லது ஏழு கோடி என்று காட்டும் வேளையில், ஒரு நடிகர் நேர்மையாக தனது உழைப்பின் மூலம் ஈட்டிய வருமானத்தை துல்லியமாக காட்டியிருப்பதை ஒரு தரப்பினர் வரவேற்கின்றனர். அதேசமயம், ஒரு படத்திற்கு 200 கோடிக்கும் மேல் சம்பளம் வாங்கும் ஒருவர் காட்டியுள்ள இந்த தொகை குறைவானது என்ற விமர்சனமும் எழுப்பப்பட்டுள்ளது.
விஜய் தனது சொத்து விவரங்களை இவ்வளவு விரிவாக பட்டியலிட்டதற்கு பின்னால் ஒரு குடும்ப சிக்கலும் இருப்பதாகக் கூறப்படுகிறது. அவரது மனைவி சங்கீதா விவாகரத்து மனுத்தாக்கல் செய்துள்ள சூழலில், சொத்து விவரங்களை மறைத்து காட்டினால் அது சட்டரீதியான சிக்கல்களை உருவாக்கும் என்பதாலேயே, தனது கார்கள் முதல் முதலீடுகள் வரை அனைத்தையும் அவர் வெளிப்படையாக அறிவித்துள்ளார்.
அரசியல் எதிரிகளான திமுக மற்றும் அதிமுக ஆகிய இரு தரப்புமே விஜய்யின் இந்த மாபெரும் எழுச்சியை கண்டு கலக்கமடைந்துள்ளன. காசு கொடுத்து கூட்டத்தை கூட்ட வேண்டிய அவசியமில்லாமல், ஒரு நடிகரின் ஒரு பார்வைக்காக மக்கள் தாங்களாகவே திரண்டு வருவது பாரம்பரிய அரசியல் கட்சிகளுக்குப் பெரும் வயித்தெரிச்சலை ஏற்படுத்தியுள்ளது. இதன் காரணமாகவே, அவர் செல்லும் இடங்களில் எல்லாம் முட்டுக்கட்டைகள் போடுவதும், தொழில்நுட்ப ரீதியாக ஆடியோ மற்றும் வீடியோ குளறுபடிகளை ஏற்படுத்துவதும் நடப்பதாக சந்தேகங்கள் எழுகின்றன. ஆனால், எடப்பாடி பழனிசாமி போன்ற தலைவர்கள் தற்கால தொழில்நுட்பத்தை மிகச்சரியாக பயன்படுத்தி லைவ் ஸ்ட்ரீமிங்கில் தரமான ஒலியை வழங்குவதை போல, விஜய் தரப்பும் தங்களின் டெக்னிக்கல் டீமை வலுப்படுத்த வேண்டியது அவசியம்.
இறுதியாக, “ஆட்சிக்கு வந்ததும் உங்கள் வீட்டு வாசலுக்கே வருவேன்” என்று அவர் கொடுத்த வாக்குறுதியை மக்கள் நம்புகிறார்களா என்பது தேர்தல் முடிவில்தான் தெரியும். எது எப்படியோ, திராவிட கட்சிகளுக்கு மாற்றாக ஒரு ‘மாஸ்’ ஹீரோ களத்தில் இறங்கியிருப்பது தமிழக அரசியலை மீண்டும் ஒரு நட்சத்திர போர்க்களமாக மாற்றியுள்ளது என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
