தமிழக வெற்றி கழகத்தின் தலைவர் விஜய், அண்மையில் நடைபெற்ற வேட்பாளர் அறிமுகக் கூட்டத்தில் இளைஞர்களுக்கான ஒரு புரட்சிகரமான தேர்தல் அறிக்கையை முன்வைத்துள்ளார். இந்த புதிய திட்டங்கள் தமிழக அரசியலில் பெரும் சலனத்தை ஏற்படுத்தியுள்ளன. குறிப்பாக, வளர்ந்து வரும் தலைமுறை எதிர்கொள்ளும் வேலைவாய்ப்பின்மை மற்றும் போதைப்பொருள் அச்சுறுத்தல் ஆகியவற்றுக்கு தீர்வுகாணும் வகையில் அவரது வாக்குறுதிகள் அமைந்துள்ளன. கல்வி முதல் தொழில்முனைவு வரை அனைத்துத் துறைகளிலும் இளைஞர்களை முன்னிலைப்படுத்தும் இந்த ‘இளைஞர் நலன் சார்ந்த’ அணுகுமுறை, திராவிட கட்சிகளின் பாரம்பரிய தேர்தல் வாக்குறுதிகளுக்கு ஒரு மாற்றாக பார்க்கப்படுகிறது.
தமிழகத்தின் எதிர்காலத்தை தடம் புரள செய்யும் போதைப்பொருள் புழக்கத்திற்கு எதிராக விஜய் அதிரடியான முழக்கத்தை முன்வைத்துள்ளார். போதைப்பொருள் இல்லாத தமிழகத்தை உருவாக்குவதே தனது முதல் இலக்கு என்று அவர் தெரிவித்துள்ளார். இதற்காக கடுமையான சட்டங்கள் இயற்றப்படுவதுடன், பள்ளிகள் மற்றும் கல்லூரிகளில் மாணவர்களை நல்வழிப்படுத்த ‘போதைப்பொருள் எதிர்ப்பு மன்றங்கள்’ கட்டாயம் அமைக்கப்படும் என்று உறுதியளித்துள்ளார். கல்வி என்பது வெறும் பட்டத்தோடு நின்றுவிடாமல், உயர்கல்வி வரை தடையின்றி தொடர ‘கல்வி உத்தரவாத திட்டம்’ மூலம் 12-ஆம் வகுப்புக்கு மேல் Ph.D படிக்கும் மாணவர்களுக்கு ரூ. 20 லட்சம் வரை பிணையில்லா கடன் வழங்கப்படும் என்ற அறிவிப்பு நடுத்தர வர்க்கத்தினரிடையே பெரும் வரவேற்பை பெற்றுள்ளது.
வேலைவாய்ப்பு துறையில் நிலவும் காலதாமதத்தைத் தவிர்க்க ‘TRATA’ என்ற புதிய அமைப்பின் மூலம் அரசு பணிகளுக்கான ஆட்சேர்ப்பு அட்டவணை முறையாக வெளியிடப்படும் என்று விஜய் குறிப்பிட்டுள்ளார். மேலும், 29 வயதை கடந்தும் வேலையின்றி தவிக்கும் பட்டதாரி இளைஞர்களுக்கு மாதம் ரூ. 4000 மற்றும் பாலிடெக்னிக் மாணவர்களுக்கு ரூ. 2000 ‘இளைஞர் நல நிதி’யாக வழங்கப்படும் என்ற அறிவிப்பு வேலையில்லா திண்டாட்டத்திற்கு ஒரு தற்காலிக மருந்தாக அமையும். இதுமட்டுமின்றி, ஆண்டுதோறும் 5 லட்சம் இளைஞர்களுக்கு தனியார் மற்றும் அரசு கூட்டு முயற்சியில் பயிற்சி பணிகளை வழங்கி, அவர்களுக்கு ரூ. 10,000 வரை உதவித்தொகை வழங்கவும் அவர் திட்டமிட்டுள்ளார்.
புதிய தொழில்முனைவோரை உருவாக்குவதில் விஜய் காட்டியுள்ள ஆர்வம் குறிப்பிடத்தக்கது. நேர்மையான முறையில் தொழில் தொடங்க விரும்பும் இளைஞர்களுக்கு எவ்வித பிணையமும் இன்றி ரூ. 25 லட்சம் கடன் வழங்கப்படும் என்பது சிறு குறு தொழில்களை மேம்படுத்த உதவும். மிக முக்கியமாக, தமிழகத்தில் உள்ள தனியார் நிறுவனங்களில் 75 சதவீத வேலைவாய்ப்பு தமிழர்களுக்கே வழங்கப்பட வேண்டும் என்ற நிபந்தனையை அவர் முன்வைத்துள்ளார். இதனை பின்பற்றும் நிறுவனங்களுக்கு மாநில ஜிஎஸ்டியில் 2.5 சதவீத மானியமும், மின் கட்டணத்தில் 5 சதவீத சலுகையும் வழங்கப்படும் என்ற அறிவிப்பு, மண்ணின் மைந்தர்களுக்கு வேலைவாய்ப்பை உறுதி செய்வதற்கான ஒரு வலுவான உந்துதலாக இருக்கும்.
கிராமப்புற இளைஞர்களின் நலனைக் கருத்தில் கொண்டு ‘முதல்வர் மக்கள் சேவை நண்பர் திட்டம்’ என்ற புதிய திட்டத்தை விஜய் அறிமுகப்படுத்தியுள்ளார். இதன் மூலம் ஒவ்வொரு ஊராட்சி அளவிலும் உள்ளூர் இளைஞர்களுக்கு வேலைவாய்ப்பு வழங்கப்பட்டு, சுமார் 5 லட்சம் பேருக்கு வாழ்வாதாரம் உறுதி செய்யப்படும். மேலும், இளைஞர்களின் குரல் நேரடியாக ஆட்சி நிர்வாகத்தில் ஒலிக்க ‘தமிழ்நாடு இளைஞர் ஆலோசனைக் குழு’ அமைக்கப்படும் என்று அவர் கூறியுள்ளார். இதன் மூலம் இளைஞர்கள் தங்களின் கருத்துக்களையும் ஆலோசனைகளையும் அரசிடம் நேரடியாகப் பகிர்ந்து கொள்ளும் வாய்ப்பு உருவாகும் என்பது ஜனநாயகத்தின் ஒரு புதிய பரிமாணமாகக் கருதப்படுகிறது.
இறுதியாக, தமிழகத்தின் கலை மற்றும் பண்பாட்டை உலக அரங்கிற்கு எடுத்து செல்லும் நோக்கில் ‘நவீன படைப்பாளி பள்ளிகள்’ நிறுவப்படும் என்று விஜய் தெரிவித்துள்ளார். இது படைப்பாற்றல் மிக்க இளைஞர்களுக்கு ஒரு புதிய களத்தை அமைத்து கொடுக்கும். மொத்தத்தில், விஜய்யின் இந்தத் தேர்தல் வாக்குறுதிகள் வெறும் கவர்ச்சித் திட்டங்களாக இல்லாமல், தரவு சார்ந்த மற்றும் தீர்வுகளை நோக்கிய திட்டங்களாக இருப்பதால், தமிழக இளைஞர்களிடையே ஒரு மிகப்பெரிய அரசியல் ஈர்ப்பை ஏற்படுத்தியுள்ளது. இந்த வாக்குறுதிகள் தேர்தல் களத்தில் எந்த மாதிரியான மாற்றத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
