ஈரானுக்கு எதிரான அமெரிக்கா-இஸ்ரேல் ராணுவ நடவடிக்கைகள் இறுதி கட்டத்தை நெருங்கியுள்ள நிலையில், போருக்கு பிந்தைய ஈரானின் தலைமை குறித்து அதிபர் டொனால்ட் டிரம்ப் வெளியிட்டுள்ள கருத்துக்கள் சர்வதேச அளவில் விவாதங்களை ஏற்படுத்தியுள்ளன. ஓவல் அலுவலகத்தில் செய்தியாளர்களிடம் பேசிய டிரம்ப், ஈரானிய ஆட்சி மாற்றத்திற்கு பிறகு அந்த நாட்டுக்குள்ளேயே இருக்கும் ஒருவரே ஆட்சி பொறுப்பை ஏற்பது பொருத்தமாக இருக்கும் என்று தெரிவித்தார். ஆனால், அமெரிக்க நிர்வாகம் புதிய தலைவர்களாக கருதிக் கணக்கிட்டு வைத்திருந்த ஈரானிய அதிகாரிகள் பலர், கடந்த நான்கு நாட்களாக தொடரும் வான்வழி தாக்குதல்களில் கொல்லப்பட்டுவிட்டதாக அவர் அதிரடியாக குறிப்பிட்டார். “நாங்கள் நினைத்திருந்த பெரும்பாலான நபர்கள் இப்போது உயிருடன் இல்லை” என்று அவர் வேதனையுடன் தெரிவித்தார்.
1979-ஆம் ஆண்டு இஸ்லாமிய புரட்சிக்கு முன்பு ஈரானை ஆண்ட மன்னரின் வாரிசான இளவரசர் ரேசா பஹ்லவி மீண்டும் ஆட்சிக்கு வருவதற்கான வாய்ப்புகளை டிரம்ப் நிராகரித்துள்ளார். ஈரானிய மக்கள் மத்தியில் தற்போது செல்வாக்குடன் இருக்கும் ஒரு புதிய தலைவர் உருவாக வேண்டும் என்பதே அமெரிக்காவின் விருப்பமாக உள்ளது. அதே சமயம், கடந்த காலத்தை போலவே மோசமான ஒருவர் மீண்டும் ஆட்சிக்கு வந்துவிடக்கூடாது என்பதில் வெள்ளை மாளிகை உறுதியாக உள்ளது. ஐந்து ஆண்டுகளுக்கு பிறகு, நாம் பதவியில் அமர்த்தியவர் முந்தைய நபரை விட சிறந்தவர் இல்லை என்று வருத்தப்படும் நிலையை தவிர்க்க விரும்புவதாக டிரம்ப் விளக்கமளித்தார்.
இஸ்ரேலின் கட்டாயத்தினால்தான் அமெரிக்கா இந்த போருக்குள் இழுக்கப்பட்டது என்ற விமர்சனங்களை டிரம்ப் திட்டவட்டமாக மறுத்துள்ளார். “ஈரானிய தலைவர்கள் நம்மை தாக்கத் திட்டமிட்டுக்கொண்டிருந்தனர், அதனால் நானே முதலில் தாக்குதலை தொடங்கினேன்; ஒருவேளை நான்தான் இஸ்ரேலை இந்த போருக்குள் தள்ளியிருப்பேன்” என்று அவர் குறிப்பிட்டார். ஈரானுடன் நடத்தப்பட்ட அணுசக்தி பேச்சுவார்த்தைகள் தோல்வியடைந்ததை தொடர்ந்தே, ‘ஆபரேஷன் எபிக் ஃபியூரி’ தொடங்கப்பட்டதாக வெள்ளை மாளிகை தரப்பில் விளக்கம் அளிக்கப்பட்டுள்ளது. ஈரானியர்கள் வேண்டுமென்றே காலதாமதம் செய்வதாக அமெரிக்கா கருதிய பின்னரே இந்த ராணுவ நடவடிக்கை எடுக்கப்பட்டது.
ஜெர்மனியின் புதிய அதிபர் ஃபிரெட்ரிக் மெர்ஸ் வெள்ளை மாளிகைக்கு வருகை தந்து டிரம்பை சந்தித்து பேசினார். ஈரானில் தற்போதைய ஆட்சி வீழ்ந்த பிறகு, ஒரு பொதுவான வியூகத்தை வகுக்க ஜெர்மனி தயாராக இருப்பதாக மெர்ஸ் தெரிவித்தார். மத்திய கிழக்கின் பாதுகாப்பு என்பது அமெரிக்காவிற்கு மட்டுமல்லாமல் ஐரோப்பா மற்றும் இஸ்ரேலுக்கும் மிக முக்கியமானது என்று அவர் வலியுறுத்தினார். மேலும், இந்த போரினால் அதிகரித்து வரும் கச்சா எண்ணெய் விலை உலக பொருளாதாரத்தை பாதிப்பது குறித்தும், விரைவில் இதற்கு ஒரு முற்றுப்புள்ளி வைக்க வேண்டியதன் அவசியம் குறித்தும் அவர் டிரம்பிடம் விவாதித்தார்.
அமெரிக்காவில் பெட்ரோல் விலை ஒரே நாளில் 11 காசுகள் உயர்ந்து ஒரு கேலன் 3.11 டாலராக அதிகரித்துள்ளது. எண்ணெய் விலை உயர்வு குறித்துக் கவலை தெரிவித்துள்ள டிரம்ப், இது தற்காலிகமானது மட்டுமே என்று உறுதி அளித்தார். போர் முடிவுக்கு வந்தவுடன் எரிபொருள் விலை முன்னெப்போதும் இல்லாத அளவிற்கு மிக குறைவாகக் குறையும் என்று அவர் நம்பிக்கை தெரிவித்தார். ஒருபுறம் ராணுவ ரீதியான வெற்றிகள் கிடைத்தாலும், ஈரானில் நிலையான ஒரு புதிய ஆட்சியை அமைப்பதற்கான தகுதியான தலைவர்களைக் கண்டறிவது அமெரிக்காவிற்கு ஒரு சவாலான பணியாகவே நீடிக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
