தமிழக அரசியல் களம் 2026 சட்டமன்ற தேர்தலை ஒட்டி ஒரு மாபெரும் மாற்றத்தை நோக்கி நகர்ந்து கொண்டிருக்கிறது. நாளை தமிழ்கத்தில் நடைபெறவுள்ள பிரதமர் நரேந்திர மோடியின் தேர்தல் பிரசார கூட்டம், தேசிய ஜனநாயக கூட்டணியின் வலிமையை நிரூபிக்கும் ஒரு முக்கிய மைல்கல்லாக பார்க்கப்படுகிறது. இந்த மேடையில் எடப்பாடி பழனிசாமி, அண்ணாமலை, நயினார் நாகேந்திரன், டிடிவி தினகரன் முதல் பல முக்கிய தலைவர்கள் ஒன்றிணைவது தமிழக அரசியலில் ஒரு புதிய ஒருங்கிணைந்த உளவியலை மக்களிடையே உருவாக்கக்கூடும் என்று அரசியல் விமர்சகர்கள் கருதுகின்றனர். பீகார் மாடல் பாணியில், சித்தாந்த ரீதியாக மாறுபட்டிருந்தாலும், பொதுவான எதிரியான திமுகவை வீழ்த்த அனைத்து சக்திகளையும் திரட்டும் முயற்சியில் பாஜக தலைமை தீவிரமாக ஈடுபட்டுள்ளது.
கூட்டணி பேச்சுவார்த்தைகளை பொறுத்தவரை, அதிமுக இம்முறை கௌரவமான எண்ணிக்கையில், அதாவது சுமார் 164 தொகுதிகளில் தனித்து போட்டியிட திட்டமிட்டுள்ளதாக தகவல்கள் தெரிவிக்கின்றன. மீதமுள்ள 70 தொகுதிகளை கூட்டணி கட்சிகளுக்குப் பிரித்து வழங்குவதில் இழுபறி நீடித்தாலும், பாஜக சுமார் 25 முதல் 30 தொகுதிகள் வரை குறிவைத்துள்ளது. குறிப்பாக சென்னையில் மயிலாப்பூர் மற்றும் தி நகர் போன்ற தொகுதிகளில் பாஜக ஆர்வம் காட்டினாலும், அந்த தொகுதிகள் அதிமுகவின் பலமான இடங்கள் என்பதால், வேளச்சேரி அல்லது துறைமுகம் போன்ற தொகுதிகள் ஒதுக்கப்பட வாய்ப்புள்ளதாக கூறப்படுகிறது. தொகுதி உடன்படிக்கை கிட்டத்தட்ட இறுதிக்கட்டத்தை எட்டியுள்ள சூழலில், பிரதமர் மேடையில் யார் யாரெல்லாம் இடம்பெறுவார்கள் என்பது பெரிய எதிர்பார்ப்பை ஏற்படுத்தியுள்ளது.
டிடிவி தினகரனின் என்டிஏ பிரவேசம் தமிழக அரசியலில் ஒரு திருப்புமுனையாக பார்க்கப்படுகிறது. எடப்பாடி பழனிசாமிக்கும் தினகரனுக்கும் இடையே இருந்த தனிப்பட்ட கருத்து வேறுபாடுகளைக் களைந்து, அமித்ஷாவின் நேரடி தலையீட்டின் பேரில் இந்த இணைப்பு சாத்தியமாகியுள்ளது. தென் மாவட்டங்களில் ஒரு குறிப்பிட்ட சமூக வாக்குகளை ஒருங்கிணைக்கவும், திமுகவின் வாக்கு வங்கியில் ஓட்டை போடவும் தினகரன் பங்களிப்பு அவசியமானது என்பதை பாஜக உணர்ந்துள்ளது. இதற்கிடையில், ஓபிஎஸ், சசிகலா ஆகிய இருவரையும் திமுகவுக்கு எதிராக குரல் கொடுக்க வைப்பதற்கான முயற்சிகளும் திரைமறைவில் நடந்து வருவதாக கூறப்படுகிறது, இது அதிமுக தொண்டர்களிடையே ஒருவித புத்துணர்ச்சியை ஏற்படுத்தியுள்ளது.
மறுபுறம், தேமுதிகவின் பிரேமலதா மற்றும் பாமகவின் ராமதாஸ் ஆகியோர் இன்னும் தங்களின் இறுதி முடிவை அறிவிக்காமல் குழப்பமான நிலையிலேயே நீடிக்கின்றனர். பிரேமலதா என்.டி.ஏ கூட்டணியில் இணைய வாய்ப்புள்ளதா என்ற பேச்சுக்கள் எழுந்தாலும், அவர் யாருக்கும் பிடிகொடுக்காமல் இருப்பது சிக்கலை ஏற்படுத்தும்.
தேமுதிகவின் தற்போதைய நிலைப்பாடு மிகுந்த மர்மமாகவே உள்ளது. அக்கட்சியின் தலைமை இரு அணிகளிடமும் பேச்சுவார்த்தை நடத்தி வருவதாக தகவல்கள் தெரிவிக்கின்றன. திமுக தரப்பில் ராஜ்யசபா சீட் வாக்குறுதிகள் அளிக்கப்பட்டாலும், அதிமுக மற்றும் பாஜக கூட்டணி தங்களுக்கு அதிக முக்கியத்துவம் தரும் என அவர்கள் எதிர்பார்க்கின்றனர். இருப்பினும், முந்தைய தேர்தல்களில் தப்பு தப்பாக முடிவெடுத்து தங்களின் அங்கீகாரத்தை இழந்த தேமுதிக, இம்முறை மிக கவனமாகக் காய்களை நகர்த்த வேண்டிய கட்டாயத்தில் உள்ளது. ஒருவேளை அவர்கள் முடிவெடுப்பதில் தாமதம் காட்டினால், அது அவர்களின் அரசியல் எதிர்காலத்திற்கே ஆபத்தாக முடியலாம்.
ஒட்டுமொத்தமாகப் பார்க்கும்போது, 2026 தேர்தல் களம் என்பது வெறும் இரண்டு கட்சிகளுக்கு இடையேயான போட்டியாக இல்லாமல், பலமுனை தாக்குதல்களை கொண்டதாக இருக்கும். திமுகவை ‘தீய சக்தி’ என சித்தரித்து, எதிர்க்கட்சிகளின் வாக்குகள் சிதறாமல் ஒரு குடையின் கீழ் கொண்டுவர பாஜக எடுக்கும் முயற்சி எந்தளவுக்கு பலன் தரும் என்பது விரைவில் தெரிந்துவிடும். குறிப்பாக, சசிகலா, தினகரன், மற்றும் எடப்பாடி ஆகியோர் நேரடியாகவோ அல்லது மறைமுகமாகவோ ஒரு புரிந்துணர்வுக்கு வந்தால், அது திமுகவுக்கு பெரும் சவாலாக அமையும். தமிழக அரசியல் வரலாற்றில் இதுவரை கண்டிராத ஒரு ‘மெகா கூட்டணி’ அமையுமா அல்லது வழக்கம் போல வாக்குகள் சிதறி திமுக மீண்டும் ஆட்சியைக் கைப்பற்றுமா என்பதைப் பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
