இந்திய தேர்தல் ஆணையம் அண்மையில் வெளியிட்ட வரைவு வாக்காளர் பட்டியல், தமிழக அரசியலில் பெரும் புயலை கிளப்பியுள்ளது. ‘சிறப்புத் தீவிரத் திருத்தம்’ என்ற பெயரில் மேற்கொள்ளப்பட்ட இந்த நடவடிக்கையில், தமிழகம் முழுவதும் சுமார் 97.37 லட்சம் வாக்காளர்களின் பெயர்கள் நீக்கப்பட்டுள்ளன. இது மொத்த வாக்காளர் எண்ணிக்கையில் சுமார் 15% ஆகும். குறிப்பாக, சென்னை மாவட்டத்தில் மட்டும் 14.25 லட்சம் ஓட்டுகள் நீக்கப்பட்டுள்ளன. பல ஆண்டுகளாக நீக்கப்படாமல் இருந்த இறந்தவர்கள், குடிபெயர்ந்தவர்கள் மற்றும் இரட்டை பதிவுகளை கண்டறிந்து இந்த தூய்மைப்படுத்தும் பணி நடைபெற்றுள்ளது.
இந்த அதிரடி நடவடிக்கையில் மிகவும் உற்றுநோக்க வேண்டிய விஷயம், தமிழக முதல்வர் மு.க. ஸ்டாலின் அவர்களின் சொந்த தொகுதியான கொளத்தூரில் சுமார் 1.03 லட்சம் வாக்காளர்கள் நீக்கப்பட்டுள்ளனர். அதேபோல் துணை முதல்வர் உதயநிதி ஸ்டாலினின் சேப்பாக்கம்-திருவல்லிக்கேணி தொகுதியில் சுமார் 89,000 ஓட்டுகள் நீக்கப்பட்டுள்ளன. ஆளுங்கட்சியின் கோட்டைகளாக கருதப்படும் தொகுதிகளிலேயே இவ்வளவு பெரிய அளவில் பெயர்கள் சரிபார்க்கப்பட்டு நீக்கப்பட்டிருப்பது, இதுவரை அங்கு நிலவி வந்த வாக்காளர் பட்டியலின் நம்பகத்தன்மை குறித்த பல கேள்விகளை எழுப்புகிறது.
வழக்கமாக மத்திய அரசு எந்த ஒரு சிறு நடவடிக்கை எடுத்தாலும், “ஒன்றிய அரசு சதி செய்துவிட்டது”, “தமிழர்களை வஞ்சிக்கிறது” என்று கூக்குரலிடும் அரசியல் சக்திகள், இவ்வளவு பெரிய அளவில் 1 கோடி தமிழர்களின் பெயர்கள் நீக்கப்பட்டும் மௌனம் காப்பது ஏன் என்ற கேள்வி எழுகிறது. மாநிலத்தின் உரிமைகளை பேசுபவர்கள், தங்கள் தொகுதிகளில் இருந்த போலி வாக்காளர்கள் நீக்கப்பட்டபோது மட்டும் அமைதி காப்பது ஏன்? தேர்தல் ஆணையத்தின் இந்த சட்டப்பூர்வமான தூய்மைப்படுத்தும் பணியை எதிர்த்து வீதியில் இறங்கி போராடாமல், ஏதோ ஒரு பயத்தில் இருப்பது வெளிப்படையாக தெரிகிறது.
வாக்குத்திருட்டு மற்றும் போலி வாக்காளர்கள் பற்றி பிற கட்சிகளை குறை சொல்லி வந்தவர்கள், இப்போது தங்கள் வசமுள்ள போலி வாக்கு வங்கிகள் சரிந்ததை கண்டு வாயை மூடிக்கொண்டு இருக்கிறார்கள். இந்த 97 லட்சம் ஓட்டுகளில் கணிசமானவை தேர்தல் வெற்றிகளை தீர்மானிக்கும் சக்தியாக இருந்திருக்கலாம் என்ற சந்தேகம் வலுக்கிறது. அறிவியல் ரீதியான இந்த சரிபார்ப்பு முறையில் போலி முகவரிகளை காட்டி தப்பிப்பது கடினம் என்பதால், “இதுவரை நடந்த தில்லாலங்கடி இனி செல்லாது” என்ற அச்சம் அவர்களை வாட்டுகிறது.
தேர்தல் நாளன்று கடைசி அரை மணி நேரத்தில் சில வேலைகள் செய்யும் உத்திகள், இனி இந்த தூய்மையான பட்டியலின் முன்னால் எடுபடாது. ஒவ்வொரு வாக்காளரும் வீடு வீடாக சரிபார்க்கப்பட்டு, உயிருடன் இருப்பவர்களுக்கே வாக்காளர் அட்டை உறுதி செய்யப்பட்டுள்ளதால், ஒரு நபரின் பெயரில் பல இடங்களில் ஓட்டுப் போடும் வாய்ப்புகள் அடைக்கப்பட்டுள்ளன. ஜனநாயகத்தின் மிகப்பெரிய பலமே நேர்மையான வாக்காளர் பட்டியல்தான். அந்த பட்டியலை சுத்தப்படுத்தியதில் தேர்தல் ஆணையத்தின் பங்கு மகத்தானது; ஆனால் அதற்கு வரும் எதிர்ப்புகள் மிக குறைவாக இருப்பது வியப்பிற்குரியது.
மொத்தத்தில், இந்த சிறப்பு தீவிர திருத்தம் தமிழக அரசியலின் பல சமன்பாடுகளை மாற்றப்போகிறது. 2026 சட்டமன்ற தேர்தலுக்கு முன்னதாக மேற்கொள்ளப்பட்ட இந்த மெகா கிளீன்-அப், உண்மையான வாக்காளர்களின் உரிமையை நிலைநாட்டுகிறது. ஒரு மாநிலத்தின் மொத்த வாக்காளர் எண்ணிக்கையில் 15 சதவீதத்தை குறைக்கும் அளவிற்கு முறைகேடுகள் இருந்தது இப்போது நிரூபணமாகியுள்ளது. முக்கிய அரசியல் கட்சியினர் அமைதியாக இருப்பதன் பின்னணியில், தங்கள் கைகளில் இருந்த ‘நிழல் வாக்கு வங்கி’ பறிபோன கவலை இருக்கிறதா அல்லது அடுத்தகட்ட யுக்திக்கான காத்திருப்பா என்பது விரைவில் தெரியவரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
