தமிழக அரசியல் களம் 2026 சட்டமன்ற தேர்தலை நோக்கி அனல் பறக்க தொடங்கியுள்ள நிலையில், தமிழக வெற்றி கழகத்தின் தலைவர் விஜய் தீவிர தேர்தல் பிரச்சாரத்தில் ஈடுபட்டு வருகிறார். ஆனால் அவருக்கு எதிராகச் சில மூத்த நடிகர்கள் முன்வைக்கும் விமர்சனங்கள் ஆளுங்கட்சியின் தூண்டுதலால் அமைகிறதோ என்ற சந்தேகம் மக்கள் மத்தியில் எழுந்துள்ளது.
சத்யராஜ் மற்றும் பிரகாஷ் ராஜ் போன்ற நடிகர்கள் விஜய்யின் அரசியல் புரிதல் குறித்து கேள்வி எழுப்புவதும், அவரை ஒரு முழுநேர அரசியல்வாதியாக ஏற்க தயங்குவதும் திட்டமிட்டு பரப்பப்படும் ஒரு பொய் பிரச்சாரமாக தெரிகிறது. ஒரு நடிகரை எதிர்க்க மற்றொரு நடிகரையே ஆயுதமாக பயன்படுத்தும் திராவிட கட்சிகளின் உத்தி, விஜய்யின் வருகை ஏற்படுத்தியுள்ள அரசியல் அதிர்வலைகளை தற்காத்துக் கொள்ளும் முயற்சியாகவே பார்க்கப்படுகிறது.
சென்னையின் 16 தொகுதிகளிலும் விஜய் மேற்கொண்டு வரும் சூறாவளி பிரச்சாரம், இளைஞர்கள் மற்றும் பெண்கள் மத்தியில் ஒரு மிகப்பெரிய அலையி உருவாக்கியுள்ளது. கடந்த கால தேர்தல்களில் திமுக அல்லது அதிமுக என்ற இருமுனை போட்டியே நிலவி வந்த நிலையில், இந்த முறை தவெக ஒரு வலுவான மூன்றாவது சக்தியாக உருவெடுத்துள்ளது. கருத்துக்கணிப்புகள் பல விஜய்க்கு சாதகமாக இல்லை என்று கூறினாலும், கள யதார்த்தம் வேறொன்றை சொல்கிறது. பாரம்பரியமாக திராவிட கட்சிகளுக்கு வாக்களித்து வந்த குடும்பங்களில் கூட, இந்த முறை மாற்றத்திற்காக விஜய்யை ஆதரிக்கும் மனநிலை உருவாகியுள்ளது.
அரசியல் களத்தில் விஜய்க்கு எதிராக முன்வைக்கப்படும் சொத்து மதிப்பு முறைகேடு தொடர்பான வழக்குகள் மற்றும் 100 கோடி ரூபாய் அபராதம் போன்ற செய்திகள், தேர்தலுக்கு சில நாட்களுக்கு முன்பு திட்டமிட்டே பரப்பப்படுவதாக தெரிகிறது. ஒரு பக்கம் விஜய்யை தனிப்பட்ட முறையில் தாக்கும் அதே வேளையில், மற்றொரு பக்கம் ஆளுங்கட்சி மற்றும் பிரதான எதிர்க்கட்சியினர் பண பலத்தை பயன்படுத்தித் தேர்தலைச் சந்திக்கத் தயாராகி வருகின்றனர்.
நடிகர் பிரகாஷ் ராஜ் போன்றவர்கள் விஜய்யின் அரசியல் வருகையை ‘பார்ட் டைம்’ அரசியல் என்று விமர்சிப்பது வேடிக்கையாக உள்ளது. திராவிட மாடல் ஆட்சியின் குறைகளையோ அல்லது அண்ணா பல்கலைக்கழக நிர்வாக சிக்கல்கள், பாலியல் அத்துமீறல்கள் போன்ற சமூகப் பிரச்சினைகளையோ கண்டிக்கத் தயங்கும் இவர்கள், விஜய்யை மட்டும் குறிவைத்துப் பேசுவது அவர்களின் அரசியல் விசுவாசத்தையே காட்டுகிறது.
இறுதியாக, வரும் ஏப்ரல் 23 அன்று தமிழக அரசியலில் ஒரு புதிய வரலாற்றை எழுதக்கூடும். மக்கள் பணத்தை வாங்கி கொண்டு வாக்களிக்கும் நிலையை தாண்டி, மாற்றத்திற்காக வாக்களிக்க முன்வர வேண்டும் என்பதே நடுநிலையாளர்களின் எதிர்பார்ப்பு. இளைஞர்களின் உற்சாகமும், 18 வயது பூர்த்தியான புதிய வாக்காளர்களின் ஈடுபாடும் இந்தத் தேர்தலில் மிகப்பெரிய மாற்றத்தை ஏற்படுத்தும் காரணியாக இருக்கும். எத்தனை நடிகர்கள் வந்து எதிர்த்தாலும், எத்தனை ஆயிரம் கோடிகள் பணமாக பாய்ந்தாலும், இறுதித் தீர்ப்பு மக்களின் கைகளிலேயே உள்ளது. தமிழகம் மீண்டும் ஒரு குடும்பத்தின் பிடியில் சிக்கப்போகிறதா அல்லது புதிய அரசியல் பாதையைத் தேர்ந்தெடுக்கப்போகிறதா என்பது விரைவில் தெரிந்துவிடும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
