தமிழக அரசியல் களம் 2026 சட்டமன்ற தேர்தலை நோக்கி நகர்ந்து கொண்டிருக்கும் வேளையில், ஊடகங்களின் நடுநிலைமை மற்றும் கருத்துக்கணிப்புகளின் உண்மைத்தன்மை குறித்து பொதுமக்கள் மத்தியில் மிகப்பெரிய கேள்வி எழுந்துள்ளது. தேர்தலுக்கு இன்னும் சில காலமே உள்ள நிலையில், பல்வேறு முன்னணி ஊடகங்கள் மற்றும் தனியார் ஆய்வு நிறுவனங்கள் களத்தில் இறங்கி மக்களின் நாடி துடிப்பை கணித்தன. ஆனால், எடுக்கப்பட்ட நூற்றுக்கணக்கான கருத்துக்கணிப்புகள் இன்னும் வெளிவராமல் பெட்டிக்குள் முடங்கிக் கிடப்பது ஜனநாயகத்தின் நான்காவது தூண் என்று அழைக்கப்படும் ஊடகத்துறையின் சுதந்திரத்தை பெரும் கேள்விக்குறியாக்கியுள்ளது.
குறிப்பாக, எடுக்கப்பட்ட பெரும்பாலான கருத்துக்கணிப்புகள் ஆளுங்கட்சிக்கு சாதகமாக இல்லை என்ற ஒரே காரணத்திற்காகவே அவை இருட்டடிப்பு செய்யப்படுவதாக பரவலான குற்றச்சாட்டுகள் எழுந்துள்ளன. மக்களின் உண்மையான மனநிலை வெளிவந்தால், அது தற்போதைய ஆட்சி அதிகாரத்தில் இருப்பவர்களுக்கு பின்னடைவை ஏற்படுத்தும் என்பதால், அதிகார பலத்தை பயன்படுத்தி ஊடக நிறுவனங்கள் மிரட்டப்படுகின்றனவா என்ற சந்தேகம் வலுத்துள்ளது. ஆளுங்கட்சியின் குறைகளை சுட்டிக்காட்ட வேண்டிய ஊடகங்கள், அவர்களின் சாதனைகளை மட்டுமே பாடும் ஊதுகுழலாக மாறிப்போனால், அதற்கு பெயர் ‘மீடியா’ கிடையாது; அது வெறும் விளம்பர நிறுவனம் மட்டுமே என்று பொதுமக்கள் சமூக வலைதளங்களில் தங்களின் குமுறல்களை பதிவு செய்து வருகின்றனர்.
கடந்த சில மாதங்களாகவே, தமிழகத்தின் பல்வேறு பகுதிகளில் எடுக்கப்பட்ட கருத்துக்கணிப்புகளில், புதிய அரசியல் மாற்றத்தை மக்கள் விரும்புவது தெளிவாக தெரிய வந்துள்ளது. குறிப்பாக, இளைஞர்கள் மற்றும் பெண்கள் மத்தியில் ஆளுங்கட்சி மீதான அதிருப்தி அதிகரித்துள்ளதும், புதிய வரவான தமிழக வெற்றி கழகம் போன்ற கட்சிகளுக்கு ஆதரவு பெருகி வருவதும் அந்த ஆய்வுகளில் தெரிய வந்துள்ளது. இந்த உண்மைகள் வெளியே வந்தால், அது ஆளுங்கட்சியின் தேர்தல் வியூகத்தை பாதிக்கும் என்பதால், பெரும் பணபலத்தை கொண்டு அந்த தகவல்கள் முடக்கப்பட்டுள்ளன. கருத்துக்கணிப்புகளை வெளியிடும் சுதந்திரம் கூட இல்லாத ஒரு சூழலில் ஊடகங்கள் இருப்பது, ஆரோக்கியமான ஜனநாயகத்திற்கு அழகல்ல.
இப்படித் தகவல்கள் மறைக்கப்படுவதும், கருத்துக்கணிப்புகள் முடக்கப்படுவதும் மக்களின் வாக்குகளை மாற்றிவிடாது. மாறாக, ஊடகங்கள் மீதான நம்பிக்கையை தான் சிதைக்கும். ஆளுங்கட்சிக்கு சாதகமான செய்திகளை மட்டும் வெளியிடும் ஊடகங்கள், நடுநிலையானவை என்று தங்களை அழைத்துக்கொள்ள தகுதியற்றவை. 2026 தேர்தல் என்பது அரசியல் கட்சிகளுக்கு மட்டுமல்ல, ஊடகங்களின் நேர்மைக்கும் ஒரு மிகப்பெரிய சோதனையாக அமையப்போகிறது. உண்மையை மறைக்க முயலும் எந்தவொரு சக்தியும் மக்களின் தீர்ப்பிலிருந்து தப்பிக்க முடியாது என்பதுதான் நிதர்சனம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
