தமிழக வெற்றி கழகத்தின் தலைவரான நடிகர் விஜய்யின் அரசியல் பயணம் குறித்து, அ.தி.மு.க.வில் இருந்து தவெகவுக்கு வந்த செங்கோட்டையன் முக்கியமான வியூக ஆலோசனைகளை வழங்கியுள்ளார். தற்போது நிலவும் அரசியல் சூழலில், விஜய்யின் தனிப்பட்ட பிரசார முறை எப்படி இருக்க வேண்டும், களப்பணிகள் யாவை என்பது குறித்து அவர் அளித்த ஆலோசனைகள், த.வெ.க.வின் எதிர்கால அரசியல் செயல்பாடுகளுக்கு தெளிவான பாதையை அமைத்துக் கொடுக்கும் என்று கருதப்படுகிறது.
விஜய் எதிர்கொள்ளும் மிகப்பெரிய சவால்களில் ஒன்று, அவருக்கு இயல்பாகவே கூடும் மிகப்பெரிய மக்கள் கூட்டம். இந்த மக்கள் திரளை சட்ட ரீதியாகவும், பாதுகாப்பு ரீதியாகவும் சமாளிப்பது கடினம் என்று செங்கோட்டையன் சுட்டிக்காட்டியுள்ளார். இந்த அளவு பெரிய கூட்டத்தை, த.வெ.க.வின் தற்போதைய கட்டமைப்பை கொண்டு கட்டுப்படுத்த முடியாது என்றும், இதனால் தேவையற்ற கூட்ட நெரிசல், சட்டம்-ஒழுங்கு சிக்கல்கள் மற்றும் பாதுகாப்புக் குறைபாடுகள் ஏற்பட வாய்ப்புள்ளது என்றும் அவர் விஜய்யிடம் எடுத்துரைத்ததாக தகவல்கள் தெரிவிக்கின்றன.
எனவே, சாலைகளில் நடந்து செல்லும் ‘ரோடு ஷோ’க்களை முற்றிலும் தவிர்க்க வேண்டும் என்று செங்கோட்டையன் அறிவுறுத்தியுள்ளார். அதற்கு பதிலாக, மக்கள் எளிதாக பிரமாண்டமாக கூடிச்செல்லக்கூடிய பிரதான நகரங்கள் அல்லது முக்கிய தொகுதிகளில் மட்டுமே பெரிய பொதுக்கூட்டங்களை நடத்த வேண்டும் என்றும் அவர் ஆலோசனை வழங்கியுள்ளார். இந்த கூட்டங்களில் மட்டுமே விஜய் நேரடியாக உரையாற்றி, தனது அரசியல் நிலைப்பாட்டை மக்களுக்கு தெளிவாக தெரிவிக்க வேண்டும் எனவும் அவர் வலியுறுத்தியுள்ளார்.
அதேபோல், தமிழகம் முழுவதும் தனது ஆற்றலை சிதறடிக்காமல், குறிப்பிட்ட முக்கிய தொகுதிகளில் மட்டுமே முழு கவனத்தை செலுத்த வேண்டும் என்ற அரசியல் ரீதியான வியூகத்தையும் செங்கோட்டையன் முன்வைத்துள்ளார். வெற்றி வாய்ப்புள்ள தொகுதிகள் அல்லது பலமான போட்டியை அளிக்கக்கூடிய தொகுதிகளை மட்டும் தேர்ந்தெடுத்து அங்கே பொதுக்கூட்டங்களை நடத்துவதன் மூலம், அதிகபட்ச கவனத்தையும் முதலீட்டையும் சரியான இடத்தில் செலுத்த முடியும் என்று அவர் கூறியுள்ளார்.
பிரதான தொகுதிகள் அல்லாத மற்ற பகுதிகளில் வெற்றி பெறுவதற்கான சவால்களை, த.வெ.க.வின் நிர்வாகிகள் மற்றும் தன்னார்வலர்களின் பணியை கொண்டு சமாளிக்க முடியும் என்றும் செங்கோட்டையன் வலியுறுத்தியுள்ளார். இந்த நிர்வாகிகள், கட்சியின் அடித்தளத்தை வலுப்படுத்தவும், வாக்குப்பதிவு விகிதத்தை அதிகரிக்கவும் கவனம் செலுத்த வேண்டும் என்றும், இதுவே மற்ற தொகுதிகளில் வெற்றியை உறுதி செய்யும் என்றும் அவர் ஆலோசனை வழங்கியுள்ளார்.
மேலும், தற்போதைய அரசியல் களத்தில் தவிர்க்க முடியாத டிஜிட்டல் பிரசாரம் குறித்தும் அவர் ஆலோசனை வழங்கியுள்ளார். அதன்படி, வருகிற ஜனவரி மாதம் முதல் தினசரி ஒரு வீடியோ பதிவை ட்விட்டர் தளத்தில் பதிவு செய்ய வேண்டும் என்றும், இதன் மூலம் த.வெ.க.வின் கொள்கைகளை மக்களுக்கு தெளிவாக எடுத்து சொல்வதுடன், ஆளும் தி.மு.க. அரசின் குறைகளை மக்கள் மனதில் பதியும் வகையில் சில கருத்துகளை வலுவாக பதிவு செய்ய வேண்டும் என்றும் செங்கோட்டையன் அறிவுறுத்தியுள்ளார்.
இது, பிரசார இடைவெளிகளிலும் கட்சிக்கான விவாதங்களை தொடர்ந்து உயிர்ப்புடன் வைத்திருக்க உதவும் என்று அரசியல் நோக்கர்கள் கருதுகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
