மட்டனில் கலந்த மாட்டிறைச்சி.. மொட்டை அடித்து கோமியம் குடித்து பரிகார பூஜை செய்த கிராமத்தினர்..!

மட்டன் என நினைத்து மாட்டுக்கறியை தெரியாமல் சாப்பிட்டதை அடுத்து, மொட்டை அடித்து கோமியம் குடித்து பரிகார பூஜை செய்ததாக ஒடிசா  மாநிலத்தைச் சேர்ந்த கிராம மக்கள் செய்ததற்கான தகவல் பரபரப்பை ஏற்படுத்தியுள்ளது.ஒடிசா மாநிலம், பூரி மாவட்டத்தில் உள்ள ஒரு உணவகத்தில், அந்த பகுதியில் உள்ள பலர் தினசரி உணவருந்தி வந்தனர். ஆனால், அதிரடியாக, மட்டன் உணவில் மாட்டிறைச்சி கலக்கப்பட்டதாக குற்றச்சாட்டு எழுந்தது. இதனை அடுத்து, மாவட்ட நிர்வாகம் விரைந்து விசாரணை நடத்தியது. விசாரணையின் முடிவில், உணவகத்தில் உண்மையாகவே மாட்டுக்கறி கலக்கப்பட்டிருந்தது உறுதியாக தெரிய வந்ததால், அந்த உணவகம் மூடப்பட்டது.

இந்தச் சம்பவத்தால், அந்த பகுதியில் உள்ள கிராமத்தினர் மனதளவில் மிகவும் பாதிக்கப்பட்டனர். தாங்கள் தெரியாமல் மாட்டுக்கறி சாப்பிட்டுவிட்டோம் என்பதால், உள்ளூர் பூசாரி சில பரிகார சடங்குகளை மேற்கொள்ள வேண்டும் என அறிவுறுத்தினார். இதனை அடுத்து, கானாஸ் என்ற கிராமத்தைச் சேர்ந்த பொதுமக்கள் மொட்டை அடித்து, புனித நீராடி, சிறப்பு பூஜைகள் செய்தனர். மேலும், சிலர் கோமியம் குடித்ததாகவும் கூறப்படுகிறது.

மேலும், மாடுகளை வணங்கி தாங்கள் அறியாமல் செய்த தவறுக்காக மன்னிப்பு கேட்டதாகவும் தகவல்கள் வெளியாகியுள்ளன. இதற்கிடையில், சம்பவம் குறித்த வீடியோ இணையத்தில் வைரலாகி வருகிறது. இந்த விவகாரம் மத உணர்வுகளை பாதிக்கக் கூடியதாக இருந்ததால், உடனடியாக அந்த உணவகத்திற்கும் நடவடிக்கை எடுக்கப்பட்டதாகவும், இது தொடர்பாக கூடுதல் விசாரணை நடைபெற்று வருவதாகவும் பூரி மாவட்ட ஆட்சியர் சித்தார்த் ஷங்கர் தெரிவித்துள்ளார்.