அரசியல் களம் எப்போதுமே அதிகாரத்தின் பின்னால் ஓடும் ஒரு விசித்திரமான தன்மையை கொண்டது. இங்கு ஒரு அரசியல் கட்சி தொடர்ச்சியாக வெற்றிகளை பெற்று, ஆட்சி கட்டிலில் அல்லது பலமான ஒரு இடத்தில் இருக்கும் வரை மட்டும்தான் அதற்கு பொதுவெளியிலும், சொந்த கட்சியினரிடமும் மாபெரும் மரியாதை இருக்கும். ஆனால், அதே கட்சி ஒருமுறை பலவீனமடைந்து அல்லது தொடர் தோல்விகளை சந்திக்க தொடங்கிவிட்டால், அதற்கு முன்னால் இருந்த மகுடங்கள் யாவும் கழற்றி எறியப்பட்டு, மிக கொடூரமான முறையில் விமர்சனங்களால் கீழே போட்டு மிதிக்கப்படும் நிலைக்கு தள்ளப்பட்டுவிடும். தமிழ்நாட்டின் கடந்த கால மற்றும் தற்போதைய அரசியல் நகர்வுகள் யாவும், இந்த “வெற்றி மட்டுமே தகுதி” என்ற நிதர்சனமான உண்மையைத்தான் நமக்கு தொண்டர்கள் மற்றும் தலைவர்களின் கட்சித் தாவல்கள் மூலமாகப் பறைசாற்றி கொண்டிருக்கின்றன.
இதற்கு மிகச்சிறந்த மற்றும் அண்மைக்கால உதாரணமாக விளங்குவது உலகநாயகன் கமல்ஹாசன் தொடங்கிய மக்கள் நீதி மய்யம் கட்சியின் வீழ்ச்சியாகும். கட்சி தொடங்கப்பட்ட ஆரம்ப காலத்தில், இது தமிழ்நாட்டு அரசியலில் ஒரு மிகப்பெரிய மாற்றத்தையும் மாற்று பாதையையும் உருவாக்கும் என்று பலரும் நம்பினர். ஆனால், அடுத்தடுத்து சந்தித்த தேர்தல் தோல்விகளுக்குப் பிறகு, “இந்தக் கட்சி இனிமேல் தேறாது, இதனால் எவ்வித அரசியல் எதிர்காலமும் இல்லை” என்ற முடிவுக்கு வந்த முக்கிய நிர்வாகிகள் பலரும், அடுத்தடுத்து கட்சியை விட்டு அதிரடியாக வெளியேறி அப்போதைய ஆளுங்கட்சி திமுகவில் தங்களை இணைத்துக் கொண்டனர். இறுதியில், கட்சியை தனித்து வழிநடத்த முடியாத ஒரு பலவீனமான சூழலுக்குத் தள்ளப்பட்ட கமல்ஹாசன் அவர்களே, தற்பொழுது கிட்டத்தட்ட திமுக முகாமுக்கே சென்று, அவர்களது தயவில் ஒரு ராஜ்யசபா எம்பி சீட்டை வாங்கும் நிலைக்கு தள்ளப்பட்டதுதான் இந்த அதிகார அரசியலின் உச்சக்கட்டம்.
இதே போன்றதொரு சறுக்கலையும், அதன் விளைவாக ஏற்பட்ட மனிதர்களின் முகமாற்றத்தையும் நாம் அம்மா மக்கள் முன்னேற்றக் கழகத்தின் பொதுச்செயலாளர் டிடிவி தினகரன் விஷயத்திலும் மிகத்தெளிவாகப் பார்த்தோம். ஜெயலலிதாவின் மறைவிற்கு பிறகு, ஆர்.கே. நகர் இடைத்தேர்தலில் அவர் பெற்ற அசுர வெற்றி, தமிழக அரசியலில் அவர் ஒரு மிகப்பெரிய சக்தியாக உருவெடுப்பார் என்றும், எடப்பாடி பழனிசாமியின் ஆட்சியை வீழ்த்தி விடுவார் என்றும் பலரையும் நம்ப வைத்தது. ஆனால், அதற்கு பின் வந்த பொதுத்தேர்தல்களில் அவர் சந்தித்த தொடர் தோல்விகள், அவரது செல்வாக்கை முற்றிலும் காலி செய்தன. தினகரன் இனி ஜெயிக்க மாட்டார் என்ற உண்மை தெரிந்த அடுத்த கணமே, அவருக்கு பின்னால் நிழல் போல நின்ற செந்தில் பாலாஜியில் தொடங்கி, மேடைக்கு மேடை அவருக்காக வீர வசனம் பேசிய நாஞ்சில் சம்பத் வரை அத்தனை முக்கியப் புள்ளிகளும் அவரை விட்டு விலகி, தங்களது அரசியல் பாதுகாப்பைத் தேடி வேறு முகாம்களுக்கு ஓடினர்.
தற்பொழுது இதே போன்றதொரு மிக மோசமான மற்றும் இக்கட்டான “டர்ன்” தமிழ்நாட்டின் பிரதான எதிர்க்கட்சியான அனைத்திந்திய அண்ணா திராவிட முன்னேற்றக் கழகத்திற்கு வந்துள்ளது. ஜெயலலிதா என்ற ஒற்றை ஆளுமையின் மறைவிற்கு பிறகு, எடப்பாடி பழனிசாமியின் முழுமையான கட்டுப்பாட்டுக்குள் வந்த அதிமுக, கடந்த சில ஆண்டுகளில் நாடாளுமன்றத் தேர்தல், சட்டமன்ற தேர்தல், உள்ளாட்சி தேர்தல், இடைத்தேர்தல்கள் எனத் தொடர்ந்து கிட்டத்தட்ட 11 தேர்தல் தோல்விகளை சந்தித்து மிகப்பெரிய சரிவை சந்தித்துள்ளது. தொடர்ச்சியாக 11 முறை தோல்வியை தழுவிய ஒரு தலைமையை, இனியும் நம்பித் தங்களது அரசியல் எதிர்காலத்தை பாழாக்கி கொள்ள தொண்டர்களும் சரி, அடிமட்ட மற்றும் உயர்மட்டத் தலைவர்களும் சரி, தற்பொழுது எள்ளளவும் தயாராக இல்லை என்பதே தற்போதைய கள நிலவரம் ஆகும்.
தலைமையின் மீதான இந்த நம்பகத்தன்மை முழுமையாக குறைந்து போனதன் நேரடி விளைவாகத்தான், தற்பொழுது அதிமுகவில் இருந்து முக்கிய நிர்வாகிகளும், முன்னாள் அமைச்சர்களும், மாவட்ட செயலாளர்களும் அடுத்தடுத்து கட்சியை விட்டு வெளியேற தொடங்கியுள்ளனர். ஒரு காலத்தில் கோட்டையை ஆண்டு, அசைக்க முடியாத பலத்துடன் இருந்த ஒரு இயக்கம், இன்று தனது சொந்த தலைவரின் தவறான வியூகங்களாலும், தொடர் சறுக்கல்களாலும் சிதைந்து போவதை காண முடிகிறது. எடப்பாடி பழனிசாமியால் இனி ஒருபோதும் திமுகவையோ அல்லது தவெக போன்ற புதிய மாற்று சக்திகளையோ வீழ்த்தி அதிமுகவிற்கு வெற்றியை தேடித்தர முடியாது என்ற எண்ணம், கட்சியின் அடிநாதமாக விளங்கும் அடிமட்டத் தொண்டர்களின் நெஞ்சில் ஆழ பதிந்துவிட்டதால், இந்த வெளியேற்றங்கள் தற்பொழுது தவிர்க்க முடியாத ஒன்றாக மாறியுள்ளன.
முடிவாக பார்க்கும்போது, ஒரு கட்சி தோற்றவுடன் தலைவர்கள் விலகுவதும், மாற்று முகாம்களை நோக்கி ஓடுவதும், நேற்று வரை கொண்டாடிய தலைவனையே இன்று கீழே போட்டு மிதிப்பதும் தமிழக அரசியலில் ஒன்றும் புதிய விஷயங்கள் அல்ல, இதெல்லாம் காலங்காலமாக நடக்கும் ஒரு சகஜமான கூத்துதான். அதிகாரம் யாரிடம் இருக்கிறதோ அல்லது யாருக்கு வெற்றி வாய்ப்பு பிரகாசமாக இருக்கிறதோ, அவரை நோக்கி மனிதர்கள் நகர்வது இயற்கையின் விதி போன்றது. கமல்ஹாசன், டிடிவி தினகரன் ஆகியோரைத் தொடர்ந்து இன்று எடப்பாடி பழனிசாமியும் இந்தத் தோல்வியின் கோர முகத்தையும், அதன் விளைவாக ஏற்படும் தனிமையையும் தற்பொழுது அனுபவிக்க தொடங்கியுள்ளார். இந்த தொடர் வெளியேற்றங்களும் உட்கட்சிப் பிளவுகளும் அதிமுகவை எந்த மாதிரியான ஒரு இறுதி புள்ளிக்கு கொண்டு செல்ல போகிறது என்பதை வரவிருக்கும் தேர்தல் முடிவுகளே தீர்மானிக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
