மேற்காசியாவில் இஸ்ரேல் மற்றும் ஈரான் இடையே முற்றியுள்ள மோதல், வெறும் இரு நாடுகளுக்கு இடையிலான எல்லை போராக மட்டும் இல்லாமல், உலக வல்லரசுகளின் கௌரவ போராட்டமாக மாறியுள்ளது. அமெரிக்கா தனது அதிநவீன ஆயுத பலத்தை கொண்டு ஈரானை மிக எளிதாக பணிய வைத்துவிடலாம் என்று நினைத்து இந்த போருக்குள் குதித்தது. ஆனால், போர் தொடங்கி 12 நாட்கள் கடந்த நிலையிலும், அமெரிக்கா எதிர்பார்த்த வெற்றி இன்னும் எட்டாக்கனியாகவே உள்ளது. இஸ்ரேல் விரித்த ராஜதந்திர வலையில் அமெரிக்கா சிக்கிக்கொண்டிருப்பதாகவே சர்வதேச அரசியல் நோக்கர்கள் கருதுகின்றனர். அமெரிக்காவுக்கு இது அடுத்த நாட்டின் மண்ணில் நடக்கும் மற்றொரு போர் என்றாலும், ஈரானை பொறுத்தவரை இது தனது இறையாண்மையையும் மண்ணையும் காக்க நடத்தும் ஒரு தர்ம யுத்தமாகவே பார்க்கப்படுகிறது.
வரலாற்றை திரும்பிப் பார்த்தால், வியட்நாம் போரில் அமெரிக்கா சந்தித்த படுதோல்வி இப்போதும் அதன் ராணுவ பெருமைக்கு ஒரு கறையாகவே உள்ளது. அன்று காடுகளுக்குள் மறைந்திருந்து தாக்கிய வியட்நாம் வீரர்களிடம் அமெரிக்காவின் அதிநவீன விமானங்கள் தோற்று போனது போல, இன்று ஈரானின் நிலத்தடி ஏவுகணை தளங்கள் மற்றும் ட்ரோன் தொழில்நுட்பங்களுக்கு முன்னால் அமெரிக்கா திணறி வருகிறது. வல்லரசு என்று மார் தட்டிக்கொண்டு களமிறங்கிய அமெரிக்காவுக்கு, ஈரானின் பதிலடி இப்போது மூச்சு முட்ட செய்துள்ளது. ஈரானின் ஆயுத பலத்தை விட அவர்களின் பொறுமை மிகவும் ஆபத்தானது என்பதை அமெரிக்கா உணர தொடங்கியுள்ளது. அந்த பொறுமைக்கு பின்னால் ஒரு மிகப்பெரிய பூகம்பம் போன்ற திட்டமிடல் ஒளிந்திருப்பதை தற்போதைய கள நிலவரங்கள் உறுதிப்படுத்துகின்றன.
ஈரானின் ராஜதந்திரம் என்பது வெறும் ஏவுகணைகளை வீசுவது மட்டுமல்ல, உலகளாவிய பொருளாதாரத்தின் நரம்பு மண்டலத்தை தொடுவதாகும். குறிப்பாக, ஈரானின் கட்டுப்பாட்டில் உள்ள ஹோர்முஸ் ஜலசந்தி வழியாக நடக்கும் எரிசக்தி போக்குவரத்தை சீர்குலைப்பதன் மூலம், அமெரிக்கா மற்றும் அதன் நட்பு நாடுகளுக்கு ஈரான் கடும் நெருக்கடியை கொடுத்து வருகிறது. கத்தார் தனது எரிவாயு உற்பத்தியை நிறுத்தியதும், உலக நாடுகளில் சமையல் எரிவாயு தட்டுப்பாடு ஏற்பட்டிருப்பதும் ஈரானின் வியூகத்திற்கு கிடைத்த வெற்றியாகவே பார்க்கப்படுகிறது. அமெரிக்காவிடம் ஆயுத பலம் இருக்கலாம், ஆனால் ஈரான் தனது ஆளுமை பலத்தை நம்பி காய்களை நகர்த்தி வருகிறது.
அமெரிக்க அதிபர் டொனால்ட் ட்ரம்ப் ஈரானின் ராணுவ கட்டமைப்பை முழுமையாக அழித்துவிட்டோம் என்று அவர் கூறுவது உண்மைக்கு மாறானதாக தெரிகிறது. டிரம்ப் இதற்கு முன் பல பொய்கள் சொல்லியிருப்பதால் அவரது நம்பகத்தன்மையும் கேள்விக்குறியாகியுள்ளது. ஈரானின் ஏவுகணைகள் இப்போதும் இஸ்ரேலின் வான் பாதுகாப்பு வளையங்களை தாண்டித் தாக்கிக் கொண்டுதான் இருக்கின்றன. ஈரானை ஆயுதங்களால் அழிப்பது என்பது அசாத்தியமானது என்பதை அமெரிக்காவின் உளவு அமைப்புகளே ரகசிய கூட்டங்களில் ஒப்பு கொண்டுள்ளன.
அமெரிக்காவின் படைத்தளங்கள் தங்கள் மண்ணில் இருப்பதால், ஈரானின் தாக்குதலுக்கு தாங்கள் பலியாக நேரிடும் என்ற அச்சம் வளைகுடா நாடுகளிடம் உள்ளது. இதனால், அமெரிக்காவுக்கு வழக்கம் போல கிடைக்கும் அரபு நாடுகளின் ஆதரவு இப்போது கேள்விக்குறியாகியுள்ளது. ஒரு கட்டத்தில், வளைகுடா நாடுகளின் அழுத்தத்தால் அமெரிக்கா இந்த போரை பாதியிலேயே நிறுத்திவிட்டு வெளியேற வேண்டிய சூழல் உருவாகலாம்.
ஒட்டுமொத்தமாகப் பார்க்கும்போது, ஈரான் இந்த யுத்தத்தை மிக தெளிவான இலக்குகளுடன் எதிர்கொள்கிறது. அமெரிக்காவின் உள்நாட்டு அரசியலில் இந்த போருக்கு எதிரான அதிருப்தி கிளம்பியுள்ள நிலையில், போர் நீடிக்கும் ஒவ்வொரு நாளும் அமெரிக்காவிற்குப் பெரும் நிதி இழப்பையும், சர்வதேச அளவில் அவமானத்தையும் தேடித்தருகிறது. வியட்நாமில் அமெரிக்கா சந்தித்த அதே போன்றதொரு இக்கட்டான நிலையை ஈரான் இப்போதும் உருவாக்கி வருகிறது. ஒரு முட்டுச்சந்தில் நின்று கொண்டு எப்படி வெளியேறுவது என்று தெரியாமல் தவிக்கும் அமெரிக்காவுக்கு, ஈரானின் ராஜதந்திரம் ஒரு பெரிய பாடத்தை புகட்டி வருகிறது. இந்த தர்ம யுத்தத்தில் ஈரானின் பிடி இறுகி கொண்டே போவது, வல்லரசின் வீழ்ச்சியையே உலகிற்கு உணர்த்துகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
