மத்திய கிழக்கு பிராந்தியத்தில் மூண்டுள்ள போர் தற்போது இந்திய பெருங்கடல் வரை விரிவடைந்துள்ளது. இலங்கை கடற்பரப்புக்கு அருகே ஈரானிய கடற்படைக்கு சொந்தமான ‘ஐரிஸ் டெனா’ என்ற போர்க்கப்பல் மர்மமான முறையில் மூழ்கடிக்கப்பட்டுள்ளது. இலங்கையின் தெற்கே சுமார் 25 மைல் தொலைவில் நிகழ்ந்த இந்த தாக்குதலில், 100-க்கும் மேற்பட்ட மாலுமிகள் மாயமாகியுள்ளனர் மற்றும் 78 பேர் படுகாயமடைந்துள்ளனர். இந்த சம்பவம் ஒரு நீர்மூழ்கிக் கப்பல் நடத்திய தாக்குதலாக இருக்கலாம் என்று ராணுவ வட்டாரங்கள் தெரிவிக்கின்றன. காயமடைந்த ஈரானிய வீரர்கள் இலங்கையின் காலி மருத்துவமனையில் அனுமதிக்கப்பட்டுள்ளனர், அங்கு பலத்த போலீஸ் பாதுகாப்பு போடப்பட்டுள்ளது.
இலங்கை கடற்பகுதியில் நடந்த இந்த தாக்குதல் குறித்து அந்நாட்டு அரசியல்வாதிகள் மௌனம் காத்து வருகின்றனர். மற்றொரு நாட்டின் ராணுவ விவகாரம் என்பதால் மீட்பு பணிகள் குறித்த வீடியோக்களை வெளியிட போவதில்லை என்று இலங்கை கடற்படை மற்றும் விமானப்படை அறிவித்துள்ளது. இருப்பினும், இந்திய பெருங்கடலில் அமெரிக்கா அல்லது அதன் நட்பு நாடுகளின் நீர்மூழ்கி கப்பல்கள் நடமாட்டம் அதிகரித்துள்ளதாக நிபுணர்கள் கருதுகின்றனர். அமைதி பூங்காவாக கருதப்பட்ட இந்திய பெருங்கடல் பகுதி இப்போது வல்லரசு நாடுகளின் மோதல் களமாக மாறியிருப்பது ஆசிய நாடுகளிடையே பெரும் கவலையை ஏற்படுத்தியுள்ளது.
மத்திய கிழக்கில் தொடங்கி தற்போது ஆசியா வரை பரவியுள்ள இந்த போர், ஒரு மூன்றாம் உலக போருக்கான ஆரம்பமாக இருக்குமோ என்ற பீதியை ஏற்படுத்தியுள்ளது.
இதுவரை மத்திய கிழக்கு நாடுகளில் மட்டுமே மையம் கொண்டிருந்த அமெரிக்கா-இஸ்ரேல்-ஈரான் போர், இப்போது இந்தியாவின் அண்டை நாடான இலங்கை அருகே வந்துள்ளது. இந்திய பெருங்கடல் பகுதியில் ஒரு நாட்டின் போர்க்கப்பல் நீர்மூழ்கி தாக்குதல் என்பது Operation Epic Fury-ன் ஒரு பகுதியாக இருக்கலாம் என கருதப்படுகிறது. இப்பகுதி ஒரு போர்முனையாக மாறிவருவதையும் காட்டுகிறது. இது இந்தியாவின் கடல்சார் பாதுகாப்பிற்கு ஒரு சவால்.
இந்தியா தனது கச்சா எண்ணெய் மற்றும் வர்த்தக போக்குவரத்திற்கு இந்திய பெருங்கடல் பாதையையே பெரிதும் நம்பியுள்ளது. இலங்கைக்கு தெற்கே 25-40 மைல் தொலைவில் தாக்குதல்கள் நடப்பது, இப்பாதை வழியாக செல்லும் இந்திய வணிக கப்பல்களின் பாதுகாப்பை கேள்விக்குறியாக்குகிறது. கப்பல் காப்பீட்டு தொகைகள் உயரவும், விநியோக சங்கிலியில் சிக்கல்கள் ஏற்படவும் இது வழிவகுக்கும்.
ஈரான் மற்றும் அமெரிக்கா ஆகிய இரு நாடுகளுடனும் நல்லுறவை இந்தியா பேணி வருகிறது. மூழ்கடிக்கப்பட்ட ‘ஐரிஸ் டெனா’ கப்பல், சமீபத்தில் விசாகப்பட்டினத்தில் நடந்த ராணுவப் பயிற்சியில் பங்கேற்றுவிட்டுத் திரும்பியதாகத் தகவல்கள் தெரிவிக்கின்றன. இத்தகைய சூழலில், தனது கடல் எல்லையில் நடக்கும் மோதலில் எந்த பக்கமும் சாயாமல் சமநிலையைப் பேணுவது இந்தியாவிற்கு ஒரு பெரிய தூதரக சவாலாக இருக்கும்.
இலங்கைக் கடற்படை ஈரானிய வீரர்களை மீட்டு மருத்துவமனையில் அனுமதித்து இருந்தாலும், ஒருவேளை போர் தீவிரமடைந்தால், காயமடைந்தவர்களை காப்பாற்றவும், கடலில் மூழ்கியவர்களை தேடவும் இந்தியாவின் உதவி கோரப்படலாம். இது இந்தியாவின் அண்டை நாட்டு கொள்கையின் கீழ் கூடுதல் பொறுப்பை ஏற்படுத்தும்.
தனது ‘கொல்லைப்புறத்தில்’ இத்தகைய அதிநவீன நீர்மூழ்கித் தாக்குதல்கள் நடப்பதை இந்தியா உன்னிப்பாக கவனிக்க வேண்டியுள்ளது. யார் இந்த தாக்குதலை நடத்தினார்கள் என்பது அதிகாரப்பூர்வமாக தெரியாத நிலையில், இந்திய கடற்படை தனது P-8I ரக கண்காணிப்பு விமானங்கள் மற்றும் ஆளில்லா ட்ரோன்கள் மூலம் கண்காணிப்பைத் தீவிரப்படுத்த வேண்டிய கட்டாயம் ஏற்பட்டுள்ளது.
ஒட்டுமொத்தமாக பார்த்தால்: இது இந்தியாவின் மீது நடத்தப்பட்ட நேரடி தாக்குதல் அல்ல என்றாலும், இந்தியாவின் கடல்சார் எல்லைக்கு மிக அருகே ஒரு போர் சூழல் உருவாவது நாட்டின் தேசியப் பாதுகாப்பிற்கு மறைமுக அச்சுறுத்தலாகவே பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
