இந்தியாவின் மூன்றாவது விமானம் தாங்கி கப்பல் குறித்த விவாதங்கள் மீண்டும் சூடுபிடித்துள்ளன. இந்த மூன்றாவது கப்பல், ஐஎன்எஸ் விஷால் என்ற பெயரில் கட்டப்படலாம் என்றும், இது 60 முதல் 80 போர் விமானங்களை தாங்கிச் செல்லும் திறன் கொண்டதாக இருக்கும் என்றும் தகவல்கள் தெரிவிக்கின்றன. சுவாரஸ்யமாக, இந்த கப்பலை கட்டும் திட்டத்தில் பிரிட்டிஷ், பிரெஞ்சு, ஜெர்மானியர் மற்றும் ரஷ்யர்கள் உட்பட பல வெளிநாடுகள் உதவி செய்ய ஆர்வம் காட்டி வருகின்றன.
தற்போது இந்த மூன்றாவது விமானம் தாங்கி கப்பல், உண்மையிலேயே கடற்படையின் பலத்தை அதிகரிக்க புதிதாக சேர்க்கப்படுகிறதா அல்லது ஏற்கனவே உள்ள ஐஎன்எஸ் விக்ரமாதித்யாவின் மாற்று திட்டமா என்ற கேள்வி எழுந்துள்ளது.
ரஷ்யாவின் அட்மிரல் கோர்ஷ்கோவ் கப்பலாக இருந்து, இந்தியாவுக்கு மாற்றி அமைக்கப்பட்ட ஐஎன்எஸ் விக்ரமாதித்யா, 2012-13 ஆம் ஆண்டில் சேவையில் சேர்க்கப்பட்டது. பெரிய மேம்படுத்தல்கள் எதுவும் செய்யப்படவில்லை என்றால், 2037-38 ஆம் ஆண்டு வாக்கில் இது சேவையில் இருந்து விலக்கப்படும் என்ற நிலை உள்ளது.
கொள்கையளவில், கடற்படைக்கு எப்போதும் மூன்று விமானம் தாங்கி கப்பல்கள் தேவைப்படும் என்று ஒரு கருத்து உள்ளது. ஏனெனில், எந்த நேரத்திலும் இரண்டு கப்பல்கள் செயல்பாட்டில் இருக்கவும், ஒரு கப்பல் பராமரிப்பு அல்லது மேம்படுத்தல் பணிகளில் இருக்கவும் இது உதவும்.
விக்ரமாதித்யாவை மீண்டும் மேம்படுத்த செய்யும் செலவுக்கும், புதிதாக ஐஎன்எஸ் விஷாலை கட்டுவதற்கும் உள்ள சாத்தியக்கூறுகளை இந்தியா இப்போது ஆராய்ந்து வருகிறது. எனவே, ஐஎன்எஸ் விஷாலை மூன்றாவது கப்பலாக அல்லாமல், விக்ரமாதித்யாவின் மாற்று திட்டமாகவே பார்க்க வேண்டியுள்ளது.
கொச்சி கப்பல் கட்டும் தளத்தில் ஐஎன்எஸ் விக்ராந்த் கட்டப்பட்டது போலவே, அதே 45,000 டன் திறன் கொண்ட மற்றொரு கப்பலை உருவாக்குவது ஒப்பீட்டளவில் எளிதானது. ஐஎன்எஸ் விஷால் 60 முதல் 80 போர் விமானங்களை தாங்கிச் செல்லும் திறன் கொண்ட, மிகப்பெரிய 65,000 டன் எடை கொண்டதாக இருக்கும் என எதிர்பார்க்கப்படுகிறது.
65,000 டன் கப்பல் கட்ட ஒரு பெரிய தொழில்நுட்பம் தேவைப்படும். இதற்கு கட்டோபார் (CATOBAR – Catapult Assisted Take-Off But Arrested Landing) எனப்படும் தொழில் நுட்பம் தேவை. தற்போதுள்ள ஐஎன்எஸ் விக்ராந்த் ‘ஸ்டோபார்’ (STOBAR – Short Take Off But Arrested Landing) முறையை பயன்படுத்துகிறது. இந்த அதிநவீன கட்டோபார் தொழில்நுட்பத்தை பெறுவதற்காகவே பிரிட்டிஷ் மற்றும் பிரெஞ்சு நாடுகள் இந்தியாவுக்கு உதவ ஆர்வம் காட்டி வருகின்றன.
சீனா தனது மூன்றாவது விமானம் தாங்கி கப்பலான ஃபுஜியானை (Fujian) அறிமுகப்படுத்தியிருப்பது, இந்தியாவை தனது கப்பல் படையை பலப்படுத்த வேண்டிய கட்டாயத்தை உருவாக்கியுள்ளது. சீன கடற்படையில் தற்போது லியோனிங், ஷான்டாங் மற்றும் ஃபுஜியான் என மூன்று விமானம் தாங்கி கப்பல்கள் உள்ளன.
இருப்பினும், இந்தியாவின் பட்ஜெட் வரம்புகள் மற்றும் முப்படைகளுக்கும் தேவையான நவீனமயமாக்கல் திட்டங்கள் காரணமாக, ஒரே நேரத்தில் அனைத்தையும் நிறைவேற்றுவது சவாலானது.
ஒரு கருத்து என்னவென்றால், ஏவுகணை தாக்குதலுக்கு ஆளாகும் வாய்ப்புள்ள விமானம் தாங்கி கப்பலைவிட, நீர்மூழ்கிக் கப்பல்களே அடுத்த தலைமுறை போர்களுக்கு மிகவும் முக்கியம் என்று சில விமர்சகர்கள் வாதிடுகின்றனர்.
தற்போது இந்திய கடற்படையில் அணுசக்தி மூலம் இயக்கப்படும் நீர்மூழ்கி கப்பல்கள் உட்பட பல நீர்மூழ்கிக்கப்பல் திட்டங்கள் நிலுவையில் உள்ளன.
விமான படைக்கு ரஃபேல், கடற்படைக்கு ரஃபேல், அணுசக்தி நீர்மூழ்கிக் கப்பல்கள், மற்றும் ராணுவத்திற்கான தளவாடங்கள் ஆகியவற்றில் ஒரே நேரத்தில் பெருமளவு முதலீடு செய்ய வேண்டியுள்ளதால், ஐஎன்எஸ் விஷால் திட்டம் கால அவகாசம் எடுக்கும் என எதிர்பார்க்கப்படுகிறது.
தற்போது, இந்தியா கிட்டத்தட்ட ஒவ்வொரு 40 நாட்களுக்கும் ஒரு புதிய போர்க்கப்பலை சேவையில் இணைத்து வருகிறது. 50-க்கும் மேற்பட்ட போர்க்கப்பல்கள் இந்தியாவில் உற்பத்தியில் உள்ளன. எனவே, ஐஎன்எஸ் விஷால் திட்டம் முக்கியமானதாக இருந்தாலும், மற்ற கட்டாயமான பாதுகாப்பு தேவைகளுக்கு பிறகு அது சிறிது தாமதமாகலாம் என்று தெரிகிறது. எனினும், ஒரு விமானம் தாங்கி கப்பலை கட்ட குறைந்தது 10 ஆண்டுகள் ஆகும் என்பதால், 2037-38 வாக்கில் விக்ரமாதித்யாவை மாற்றுவதற்கான ஆரம்ப பணிகள் தற்போது தொடங்கப்படும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
