தமிழக அரசியலில் 2026 சட்டமன்ற தேர்தலை முன்னிட்டு அரங்கேறி வரும் அதிரடி மாற்றங்கள், ஆளும் திமுக தரப்பில் பெரும் அதிர்வலைகளை ஏற்படுத்தியுள்ளன. குறிப்பாக, நடிகர் விஜய்யின் தமிழக வெற்றி கழகத்தை அரசியல் ரீதியாக தனிமைப்படுத்த வேண்டும் என்ற நோக்கில், காங்கிரஸ் கட்சியை தன் பக்கமே தக்கவைத்து கொள்ள முதல்வர் ஸ்டாலின் கையாண்ட உத்திகள் இப்போது அவருக்கே ஒரு சவாலாக மாற தொடங்கியுள்ளன. விஜய் ஒருவேளை அதிமுக தலைமையிலான தேசிஜ ஜனநாயகக் கூட்டணியில் இணைந்தால் என்ன நடக்கும் என்ற கேள்வி, திமுக வட்டாரத்தில் ஒருவித நடுக்கத்தை உருவாக்கியுள்ளது. என்.டி.ஏ கூட்டணிக்கு சென்றால் சிறுபான்மையினரின் வாக்குகள் விஜய்க்கு கிடைக்காது என்றாலும், தவெக மற்றும் என்.டி.ஏ கூட்டணி கட்சிகள் ஒன்றிணைந்தால் அது திமுகவின் வெற்றி வாய்ப்பை ஒட்டுமொத்தமாக பாதிக்கும் ‘டோட்டல் ஸ்வீப்’ காரணியாக மாறும் என கணிக்கப்படுகிறது.
முன்னதாக, விஜய் மற்றும் காங்கிரஸ் ஆகிய இரு தரப்பும் கைகோர்த்தால் அது திமுகவின் வாக்குகளை பிரித்து, ஒரு ‘தொங்கு சட்டமன்ற’ சூழலை உருவாக்கும் என்று அரசியல் விமர்சகர்கள் கருதி வந்தனர். ஆனால், தற்போது நிலவரம் முற்றிலும் மாறியுள்ளது. விஜய் தேசிய ஜனநாயக் கூட்டணியின் பக்கம் சாயும் பட்சத்தில், அதிமுக, பாஜக மற்றும் பாமக போன்ற வலிமையான சக்திகளுடன் அவர் கைகோர்க்கும் சூழல் உருவாகலாம். இது திமுகவின் ஓட்டு வங்கியில் ஒரு மிகப்பெரிய ஓட்டையை விழுத்தும் என்பதில் சந்தேகமில்லை. காங்கிரஸ் கட்சியை தன்வசம் வைத்திருப்பதன் மூலம் விஜய்யை தனிமைப்படுத்தலாம் என நினைத்த திமுகவுக்கு, விஜய்யின் இந்த அடுத்தகட்ட நகர்வு ஒரு ‘செக்’ வைப்பதை போல அமைந்துள்ளது.
திமுக தரப்பில் இப்போது எழுந்துள்ள முக்கிய கவலை என்னவென்றால், விஜய்யின் வருகை என்பது வெறும் ஒரு புதிய கட்சியின் உதயம் மட்டுமல்ல, அது ஆளுங்கட்சிக்கு எதிரான அதிருப்தி வாக்குகளை ஒரு புள்ளியில் குவிக்கும் காந்தமாக மாறியுள்ளது. “விஜய்யை தனிமைப்படுத்த நினைத்தோம், ஆனால் அவர் ஒரு மெகா கூட்டணியில் இணைந்து நம்மை தோற்கடிக்கும் நிலைக்கு சென்றுவிடுவாரோ?” என்ற அச்சம் திமுகவின் தேர்தல் வியூக வகுப்பாளர்கள் மத்தியில் நிலவுகிறது. சிறுபான்மையினர் வாக்குகள் திமுகவுக்கு சாதகமாக இருந்தாலும், பெரும்பான்மை மற்றும் இளைஞர்களின் வாக்குகள் சிதறினால் வெற்றி என்பது எட்டாக்கனியாகிவிடும்.
விஜய் தனித்துப் போட்டியிட்டால் கூட திமுகவுக்கு அது ஓரளவு சாதகமாக இருந்திருக்கலாம். ஆனால், அவர் ஒரு வலுவான கூட்டணியின் அங்கமாக மாறும் சூழல், திமுகவுக்கு ‘தோல்வி உறுதி’ என்ற அச்சத்தை விதைத்துள்ளது. ஆட்சியில் இருந்தபோதும், பலமான கூட்டணியை கொண்டிருந்தபோதும் கூட, ஒரு புதிய நடிகரின் வருகை ஆளும் தரப்பை இந்த திகைக்க வைத்துள்ளது தமிழக அரசியலின் புதிய பரிணாமத்தை காட்டுகிறது. இந்த சூழலில், முதல்வர் ஸ்டாலின் தனது வியூகங்களை மீண்டும் மாற்றியமைக்க வேண்டிய கட்டாயத்தில் உள்ளார்.
மொத்தத்தில் 2026 தேர்தல் என்பது வெறும் இரண்டு முனை போட்டியாக இல்லாமல், திராவிட அரசியலுக்கும் ஒரு புதிய மாற்றத்திற்கும் இடையிலான வாழ்வா சாவா போராட்டமாக மாறியுள்ளது. காங்கிரஸ் விஜய்யுடன் சேராமல் திமுகவுடன் நீடிப்பது ஸ்டாலினுக்கு ஒரு ஆறுதல் என்றாலும், விஜய் என்.டி.ஏ பக்கம் போவது என்பது திமுகவின் வெற்றி கனவை சிதைக்கும் ஒரு பெரும் புயலாக அமையப்போகிறது. வரும் நாட்களில் இந்த அரசியல் சதுரங்க ஆட்டம் இன்னும் பல திருப்பங்களை காணப்போவது உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
