2026 சட்டமன்ற தேர்தல் களம் சூடுபிடிக்க தொடங்கியுள்ள நிலையில், அதிமுக மற்றும் பாஜக இடையிலான கூட்டணி உறவு ஒருவிதமான மர்மமான சூழலிலேயே நகர்ந்து கொண்டிருக்கிறது. என்.டி.ஏ கூட்டணி வெற்றி பெறுவது உறுதி என்று மேடைக்கு மேடை எடப்பாடி பழனிசாமி முழங்கினாலும், திரைக்கு பின்னால் அவர் ஒரு ரகசிய திட்டத்தை தீட்டி வருவதாக அரசியல் வட்டாரங்களில் பலத்த பேச்சு எழுந்துள்ளது. குறிப்பாக, அதிமுக தனித்து 118 இடங்கள் என்ற மேஜிக் எண்ணைத் தொட்டுவிட்டால், தேர்தலுக்கு பிறகு பாஜகவை லாவகமாக தூக்கி எறிந்துவிட்டு, எந்தவித நெருக்கடியும் இல்லாத ஒரு தனித்துவமான ஆட்சியை அமைக்க வேண்டும் என்பதே எடப்பாடியின் பிரதான இலக்காக இருப்பதாக கூறப்படுகிறது. கூட்டணி என்பது வெறும் தேர்தல் வெற்றிக்கான ஒரு தற்காலிக ஏற்பாடு மட்டுமே தவிர, தேர்தலுக்கு பின்னரும் தொடரும் உறவு அல்ல என்பதே எடப்பாடியின் எண்ணம் என கூறப்படுகிறது.
இந்த ரகசியத் திட்டத்தின் ஒரு பகுதியாகவே, பாஜகவிற்கு ஒதுக்கப்பட்ட 27 தொகுதிகளிலும் அதிமுகவினர் தேர்தல் வேலைகளில் பெரிய அளவில் வேகம் காட்டாமல் சுணக்கம் காட்டி வருவதாக ஒரு புகார் எழுந்துள்ளது. “கூட்டணி தர்மம்” என்று வெளியில் சொன்னாலும், களத்தில் அதிமுகவின் வாக்குகள் முழுமையாக பாஜக வேட்பாளர்களுக்கு சென்று சேராமல் பார்த்து கொள்ளும் ஒரு மறைமுக வியூகம் வகுக்கப்பட்டுள்ளதாக சொல்லப்படுகிறது. பாஜக வேட்பாளர்கள் பலமாகிவிட்டால், அது பிற்காலத்தில் அதிமுகவின் வாக்கு வங்கியை அந்தந்த பகுதிகளில் சிதைத்துவிடும் என்ற அச்சம் அதிமுக மாவட்ட செயலாளர்கள் மத்தியில் நிலவுகிறது. இதனால், பாஜக போட்டியிடும் இடங்களில் மேலோட்டமாக மட்டும் வேலை செய்துவிட்டு, அதிமுக போட்டியிடும் தொகுதிகளில் முழு கவனத்தை செலுத்துமாறு அடிமட்ட தொண்டர்களுக்கு வாய்மொழி உத்தரவு போயிருக்கலாம் என்று அரசியல் நோக்கர்கள் சந்தேகிக்கின்றனர்.
கூட்டணி கட்சிகள் அதிக இடங்களில் வெற்றி பெறுவது பிற்காலத்தில் தங்களுக்கு பெரும் தலைவலியாக மாறும் என்று அதிமுக தலைமை ஆழமாக கருதுகிறது. குறிப்பாக பாஜக போன்ற ஒரு தேசிய கட்சி தமிழக சட்டமன்றத்திற்குள் கணிசமான இடங்களுடன் நுழைந்தால், அவர்கள் அமைச்சரவையில் பங்கு கேட்பார்கள் அல்லது ஆட்சியின் ஒவ்வொரு முடிவிலும் டெல்லியின் தலையீடு இருக்கும் என்பதை எடப்பாடி பழனிசாமி நன்கு அறிவார். ஜெயலலிதா மறைவிற்கு பிறகு டெல்லியின் பிடியில் அதிமுக இருப்பதாக எழுந்த விமர்சனங்களை துடைத்தெறிய வேண்டும் என்றால், இந்த தேர்தலில் அதிமுக தனி மெஜாரிட்டி பெறுவது அவசியமாகிறது. கூட்டணி கட்சிகள் பலவீனமாக இருக்கும் வரைதான் அதிமுகவின் அதிகாரம் வலுவாக இருக்கும் என்ற கணக்கை எடப்பாடி பழனிசாமி லாவகமாக போட்டு வருகிறார்.
அரசியல் என்றாலே “கூட இருந்தே குழி பறிப்பது” என்பது ஒரு எழுதப்படாத விதியாகவே பார்க்கப்படுகிறது. கடந்த காலங்களில் அதிமுக மற்றும் திமுக ஆகிய இரு கட்சிகளுமே தங்களது கூட்டணி கட்சிகளை தேர்தலுக்கு பிறகு எப்படி கையாண்டன என்பது வரலாறு. அதே பாணியைத்தான் இப்போதும் எடப்பாடி கையாள்கிறார். பாஜகவை ஒரு பக்கம் தேர்தல் செலவுகளுக்கும், சிறுபான்மையினர் அல்லாத வாக்குகளை ஒருங்கிணைக்கவும் பயன்படுத்தி கொண்டு, தேர்தல் முடிந்த பிறகு அவர்களை கழட்டிவிடுவதுதான் எடப்பாடியின் திட்டம் என்கிறார்கள் விவரம் அறிந்தவர்கள். ஒருவேளை பாஜக 10-க்கும் மேற்பட்ட இடங்களில் வெற்றி பெற்றுவிட்டால், அதிமுகவின் தனி மெஜாரிட்டி கனவு கலைந்துவிடும் என்பதோடு, எடப்பாடியின் முதல்வர் நாற்காலியும் பாஜகவின் தயவிலேயே இருக்கும் சூழல் உருவாகும். இதை தவிர்க்கவே அவர் தற்போதே காய்களை நகர்த்துகிறார்.
இறுதியாக, எடப்பாடி பழனிசாமியின் இந்த வியூகம் ஒருவேளை எடுபட்டால் அவர் ஒரு மாபெரும் அரசியல் ராஜதந்திரியாக பார்க்கப்படுவார். ஆனால், பாஜகவும் ஒன்றும் சளைத்த கட்சி அல்ல. அவர்களும் அதிமுகவின் இந்த ரகசிய நகர்வுகளை உன்னிப்பாக கவனித்துக் கொண்டுதான் இருக்கிறார்கள். 2026 தேர்தல் முடிவுகள் வந்த பிறகு, “துரோகம்” என்ற வார்த்தை அதிமுக தரப்பில் இருந்து வருமா அல்லது பாஜக தரப்பில் இருந்து வருமா என்பதுதான் இப்போதைய எதிர்பார்ப்பு. அரசியலில் நிரந்தர நண்பனும் இல்லை, நிரந்தர எதிரியும் இல்லை என்பதை நிரூபிக்கும் வகையில், எடப்பாடியின் இந்த ரகசிய திட்டம் அதிமுகவின் தன்னாட்சியை காப்பாற்றுமா அல்லது கூட்டணியில் பெரும் விரிசலை ஏற்படுத்துமா என்பதை 2026 மே மாதம் வரை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
