தமிழக அரசியலில் தற்போது 2026 சட்டமன்ற தேர்தலுக்கான களம் சூடுபிடிக்க தொடங்கியுள்ள நிலையில், ஆளுங்கட்சியான திமுக மற்றும் அதன் கூட்டணி கட்சிகளுக்கு இடையிலான தொகுதி பங்கீடு விவகாரம் பெரும் இழுபறியை சந்தித்து வருகிறது. “ஒரு கண்ணில் வெண்ணெய், மறு கண்ணில் சுண்ணாம்பு” என்ற பழமொழியை போல, மத்தியில் ஆளும் பாஜக அரசு தமிழகத்தைப் பாரபட்சமாக நடத்துவதாகப் பலமுறை விமர்சித்த முதலமைச்சர் மு.க. ஸ்டாலின், தற்போது அதே விமர்சனத்தை தனது கூட்டணி கட்சிகளிடமிருந்தே எதிர்கொள்ளும் சூழல் உருவாகியுள்ளது.
குறிப்பாக, கொள்கை ரீதியாக நீண்டகாலமாக இணைந்து பயணிக்கும் இடதுசாரிகள் மற்றும் விடுதலை சிறுத்தைகள் கட்சி ஆகியவற்றுக்குக் குறைவான இடங்களை ஒதுக்கிவிட்டு, புதிதாக கூட்டணியில் இணைந்துள்ள தேமுதிக போன்ற கட்சிகளுக்கு அதிக முக்கியத்துவம் அளிக்கப்படுவதாக எழுந்துள்ள அதிருப்தி, அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இந்திய கம்யூனிஸ்ட் கட்சி மற்றும் மார்க்சிஸ்ட் கம்யூனிஸ்ட் கட்சி ஆகிய இரண்டு கட்சிகளும் கடந்த நான்கு தேர்தல்களாக திமுகவுடன் கொள்கை ரீதியான கூட்டணியில் உறுதியாக இருந்து வருகின்றன. இம்முறை தங்களுக்கு இரட்டை இலக்கத் தொகுதிகள் வேண்டும் என்று அவை கோரிக்கை விடுத்த நிலையில், திமுக தரப்பிலிருந்து மிக குறைவான எண்ணிக்கையே முன்வைக்கப்படுவதால் பேச்சுவார்த்தையில் சிக்கல் நீடிக்கிறது. தேர்தல் நேர கூட்டணியாக மட்டும் இல்லாமல், பாஜகவின் கொள்கைகளை தீவிரமாக எதிர்ப்பதில் திமுகவுக்குப் பக்கபலமாக இருக்கும் தங்களுக்கு உரிய அங்கீகாரம் அளிக்கப்பட வேண்டும் என்று இடதுசாரிகள் வாதிடுகின்றனர். தங்களை விட கொள்கை பிடிப்பு குறைவாக இருக்கும் கட்சிகளுக்கு அதிக இடங்களை ஒதுக்கினால், அது ‘கொள்கை கூட்டணி’ என்ற பிம்பத்தை சிதைத்துவிடும் என்று அவர்கள் முதலமைச்சரிடம் தங்களது நியாயமான கோரிக்கைகளை முன்வைத்துள்ளனர்.
விடுதலை சிறுத்தைகள் கட்சியை பொறுத்தவரை, அக்கட்சியின் தொண்டர்கள் மத்தியில் நிலவும் கொதிப்பு மிக அதிகமாக உள்ளது. கடந்த நாடாளுமன்ற தேர்தலின் போதே ஒரு பொது தொகுதியைக் கோரிய தங்களுக்கு, சட்டமன்ற தேர்தலில் பார்த்து கொள்ளலாம் என்று அளிக்கப்பட்ட வாக்குறுதி இன்னும் நிறைவேற்றப்படவில்லை என்ற ஆதங்கம் விசிக வட்டாரத்தில் நிலவுகிறது. வடதமிழகத்தில் பட்டியல் சமூக மக்களின் வாக்குகளை திமுகவை நோக்கி திருப்புவதில் விசிகவின் பங்கு மிக முக்கியமானது என்பதை சுட்டிக்காட்டும் அக்கட்சியினர், தங்களுக்கு குறைந்தது 10 முதல் 12 இடங்களாவது ஒதுக்கப்பட வேண்டும் என்று எதிர்பார்க்கின்றனர். ஆனால், ஆறு அல்லது ஏழு இடங்களுடன் அவர்களைத் திருப்திப்படுத்த திமுக முயற்சிப்பது, கூட்டணியின் முற்போக்கு அடையாளத்திற்குப் பாதிப்பை ஏற்படுத்தும் என்று திருமாவளவன் தரப்பில் வலியுறுத்தப்பட்டு வருகிறது.
தமிழக வாழ்வுரிமை கட்சியின் தலைவர் வேல்முருகன் போன்ற நிர்வாகிகளும் தங்களுக்குக் கூடுதல் இடங்கள் வேண்டும் என்பதில் பிடிவாதமாக உள்ளனர். குறிப்பாக, பாமக கூட்டணியில் இல்லாத சூழலில் வடதமிழகத்தில் வன்னியர் வாக்குகளை பெறுவதற்கு தனது கட்சி திமுகவுக்குப் பேருதவியாக இருக்கும் என்று வேல்முருகன் கருதுகிறார். ஆனால், கூட்டணி கட்சிகள் எக்காரணம் கொண்டும் கூட்டணியை விட்டு வெளியேற மாட்டார்கள் என்ற நம்பிக்கையில், திமுக தலைமை அவர்களை குறைவான இடங்களுக்கு ஒப்புக்கொள்ள வைக்கும் ‘மேலாதிக்க’ போக்கை கடைப்பிடிப்பதாக பரவலான விமர்சனம் எழுந்துள்ளது. புதிய கட்சிகளின் வரவுக்காக தங்களது பலத்தை குறைத்து கொள்ள கூட்டணிக் கட்சிகள் தயாராக இல்லை என்பது தெளிவு.
புதிதாகக் கூட்டணியில் இணைய வாய்ப்புள்ள தேமுதிக மற்றும் காங்கிரஸ் ஆகிய கட்சிகளுக்கு அதிக இடங்கள் மற்றும் மாநிலங்களவை இடங்கள் ஒதுக்கப்படுவது மற்ற தோழமை கட்சிகளுக்கு எரிச்சலை ஊட்டியுள்ளது. காங்கிரசுக்கு 28 இடங்கள் வரை ஒதுக்கப்படலாம் என்ற தகவல்களும், தேமுதிகவுக்கு மாநிலங்களவை இடத்துடன் 9 தொகுதிகள் ஒதுக்கப்படலாம் என்ற செய்திகளும் கூட்டணி கட்சிகளுக்கு இடையிலான இடைவெளியை அதிகரித்துள்ளன. “கூடவே இருப்பவர்களை கைகழுவிவிட்டு, புதிதாக வருபவர்களுக்கு சிவப்பு கம்பளம் விரிப்பது முறையல்ல” என்ற குரல் சிபிஎம் மற்றும் விசிக தரப்பில் இருந்து மிக வலுவாக ஒலிக்கிறது. இது பேச்சுவார்த்தையை மேலும் சிக்கலாக்கி, இறுதி முடிவை எடுப்பதில் காலதாமதத்தை ஏற்படுத்தி வருகிறது.
முடிவாக, திமுக தலைமையிலான கூட்டணி ஒரு ‘வெற்றி கூட்டணி’யாக தொடர வேண்டுமானால், அதில் உள்ள அனைத்து கட்சிகளும் சமமாக நடத்தப்பட வேண்டும் என்பதே அரசியல் நோக்கர்களின் கருத்தாக உள்ளது. இடப்பங்கீட்டில் ஏற்படும் அதிருப்தி தேர்தல் களத்தில் கீழ்மட்ட தொண்டர்களிடையே ஒத்துழைப்பின்மையை உருவாக்கக்கூடும். முதலமைச்சர் மு.க. ஸ்டாலின் இந்த இழுபறியை தீர்த்து, தனது கொள்கை தோழர்களுக்கு உரிய மரியாதையையும் இடங்களையும் வழங்கி கூட்டணியை ஒருங்கிணைப்பாரா அல்லது தேர்தல் நெருக்கத்தில் புதிய விரிசல்கள் உருவாகுமா என்பது அடுத்த சில நாட்களில் தெரிந்துவிடும். 2026 தேர்தல் களம் என்பது தொகுதி பங்கீட்டை தாண்டி கொள்கை உறுதிக்கான ஒரு பரீட்சையாகவும் மாறியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
