தமிழகத்தில் 2026 சட்டமன்ற தேர்தல் களம் இப்போதே சூடுபிடிக்க தொடங்கியுள்ளது. ஆளுங்கட்சியான திமுக மற்றும் எதிர்க்கட்சியான அதிமுகவுக்கு போட்டியாக தமிழக வெற்றிக் கழகத்தை தொடங்கியுள்ள நடிகர் விஜய், வரும் தேர்தலில் முதல்வர் வேட்பாளராக களம் காண்பது உறுதியாகியுள்ளது. இந்த சூழலில், காங்கிரஸ் கட்சியின் மூத்த தலைவர் ராகுல் காந்தி விஜய்யுடன் ரகசிய பேச்சுவார்த்தையில் ஈடுபட்டு வருவதாக தகவல்கள் வெளியாகியுள்ளன. தமிழகத்தில் திராவிட கட்சிகளின் பலத்த ஆதிக்கத்திற்கு முற்றுப்புள்ளி வைக்க, விஜய்யுடன் கைகோர்ப்பதே சரியான உத்தியாக இருக்கும் என்று ராகுல் காந்தி கருதுவதாக தெரிகிறது.
கேரளாவிலும் காங்கிரஸ் கட்சி ஒரு பெரிய அரசியல் மாற்றத்திற்கு தயாராகி வருகிறது. வயநாடு இடைத்தேர்தலில் வெற்றி பெற்று எம்பி-யாகியுள்ள பிரியங்கா காந்தியை, வரும் கேரள சட்டமன்ற தேர்தலில் முதல்வர் வேட்பாளராக முன்னிறுத்த ராகுல் காந்தி திட்டமிட்டு வருவதாக பேச்சுக்கள் அடிபடுகின்றன. கேரளாவில் காங்கிரஸ் தலைமையிலான ஐக்கிய ஜனநாயக முன்னணிக்கு மக்கள் மத்தியில் நல்ல ஆதரவு இருப்பதால், பிரியங்கா காந்தியின் வருகை வெற்றியை உறுதி செய்யும் என்று அக்கட்சி நம்புகிறது. கேரளாவின் அடுத்த ‘பெண் முதல்வர்’ என்ற பிம்பத்தை பிரியங்கா காந்திக்கு உருவாக்குவதன் மூலம் தென்னிந்தியாவில் காங்கிரஸின் பிடியை பலப்படுத்த ராகுல் காய் நகர்த்தி வருகிறார்.
புதுச்சேரியைப் பொறுத்தவரை, முன்னாள் முதல்வர் நாராயணசாமியை மீண்டும் முதல்வர் வேட்பாளராக முன்னிறுத்த ராகுல் காந்தி விரும்புவதாக கூறப்படுகிறது. புதுச்சேரியில் காங்கிரஸ் மற்றும் திமுக கூட்டணி வலுவாக இருந்தாலும், நாராயணசாமியின் அனுபவம் மற்றும் மத்திய அரசுக்கு எதிரான அவரது துணிச்சலான அணுகுமுறை தங்களுக்கு சாதகமாக அமையும் என டெல்லி மேலிடம் கருதுகிறது. புதுச்சேரியில் இழந்த ஆட்சியை மீண்டும் கைப்பற்ற, ராகுல் காந்தி மூத்த தலைவர்கள் மற்றும் இளைஞர்களை ஒருங்கிணைக்கும் புதிய வியூகத்தை செயல்படுத்தி வருகிறார்.
இந்த அதிரடி திட்டங்களைச் செயல்படுத்துவதற்காக ராகுல் காந்தி மற்றும் பிரியங்கா காந்தி விரைவில் சென்னை வர உள்ளதாக தகவல்கள் தெரிவிக்கின்றன. சென்னையில் விஜய்யை நேரில் சந்தித்து கூட்டணி குறித்து பேச வாய்ப்பிருப்பதாக அரசியல் வட்டாரங்கள் தெரிவிக்கின்றன. ஏற்கனவே கரூரில் நடைபெற்ற சம்பவத்தின் போது விஜய்யை தொலைபேசியில் அழைத்து ராகுல் பேசியது, இருவருக்கும் இடையே ஒரு புரிந்துணர்வு இருப்பதை உறுதி செய்கிறது. ஒருவேளை விஜய்யுடன் கூட்டணி அமைந்தால், அது தமிழக அரசியலில் பல ஆண்டுகளாக தொடர்ந்து வரும் திராவிட கட்சிகளின் ஆதிக்கத்தை வீழ்த்தும் ஒரு மாபெரும் சக்தியாக உருவெடுக்கும்.
காங்கிரஸ் கட்சியின் இந்த தென்னிந்திய திட்டங்களுக்கு சோனியா காந்தி முழு சுதந்திரம் அளித்துள்ளதாக கூறப்படுகிறது. ராகுல் மற்றும் பிரியங்கா எடுக்கும் முடிவுகளுக்கு சோனியா காந்தி முழு ஆதரவு தெரிவித்துள்ளதால், காங்கிரஸ் மேலிடம் மிகவும் உற்சாகத்தில் உள்ளது. வடமாநிலங்களில் பாஜகவை வீழ்த்த முடியவில்லை என்றாலும், தென்னிந்தியாவில் பிராந்திய கட்சிகளின் ஆதிக்கத்தை குறைத்து காங்கிரஸை தேசிய அளவில் மீண்டும் ஒரு பலமான சக்தியாக மாற்ற ராகுல் காந்தி தீவிரம் காட்டி வருகிறார்.
ராகுல் காந்தியின் இந்த “பக்கா பிளான்” வெற்றி பெற்றால், 2026-க்கு பிறகு தென்னிந்திய அரசியலின் முகம் முற்றிலும் மாறிவிடும். தமிழ்நாட்டில் விஜய்யின் புதிய அரசியல், கேரளாவில் பிரியங்கா காந்தியின் வருகை, மற்றும் புதுச்சேரியில் நாராயணசாமியின் மறுபிரவேசம் என தெற்கே ஒரு புதிய அரசியல் அலையை உருவாக்க காங்கிரஸ் தயாராகிவிட்டது. திராவிட அரசியலுக்கு மாற்றாக தேசியமும் தமிழ் உணர்வும் கலந்த ஒரு புதிய கூட்டணியை விஜய் மற்றும் காங்கிரஸ் இணைந்து உருவாக்கினால், அது தமிழக வரலாற்றில் ஒரு புதிய அத்தியாயமாக அமையும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
