2026 சட்டமன்றத் தேர்தல் நெருங்கி வரும் நிலையில், தமிழக அரசியல் களம் பரபரப்படைந்து வருகிறது. குறிப்பாக, நடிகர் விஜய்யின் ‘தமிழக வெற்றிக் கழகம்’ என்ற புதிய கட்சியின் வருகை, கடந்த காலங்களில் நிலவி வந்த அரசியல் சமன்பாடுகளை முற்றிலுமாக மாற்றி அமைத்துள்ளது. வழக்கமாக திமுக மற்றும் அதிமுக என இருபெரும் கூட்டணிகளுக்குள் சுழன்றுகொண்டிருந்த தேர்தல் கருத்துக்கணிப்புகள், இப்போது விஜய்யின் வருகையால் திசைமாறி, அனைத்து கட்சிகளையும் மறுபரிசீலனை செய்யத் தூண்டியுள்ளன.
அதிமுக – பாஜக கூட்டணி முறிவு?
கடந்த சில ஆண்டுகளுக்கு முன் அண்ணாமலையின் சர்ச்சைக்குரிய நடவடிக்கையால் அதிமுக தலைமை பாஜகவுடனான கூட்டணியை முறித்து கொண்டது. இது, தங்கள் கட்சியின் தனித்துவத்தையும், செல்வாக்கையும் மீட்டெடுக்கும் ஒரு முயற்சியாக பார்க்கப்பட்டது. பாஜகவுடன் கூட்டணி வைத்ததால், சிறுபான்மையினர் மற்றும் திமுகவுக்கு எதிரான வாக்குகள் தங்களுக்கு கிடைக்காமல் போனதாக அதிமுக கருதுகிறது. ஆனால் திடீரென கடந்த ஏப்ரல் மாதம் மீண்டும் பாஜகவுடன் கூட்டணி வைத்தது. பாஜகவுடன் இணைந்து புதிய கூட்டணியை உருவாக்கஅதிமுக முயன்று வருகிறது.
இந்த நிலையில் விஜய் வந்தால் தான் வெற்றி என்பதை புரிந்து கொண்ட ஈபிஎஸ், பாஜகவை கூட்டணியில் இருந்து விலக்க தயாராகிவிட்டதாக தெரிகிறது. அமித்ஷாவின் கூட்டணி ஆட்சி, அதிமுகவில் இருந்து ஒருவர் தான் முதல்வர் வேட்பாளர் என்ற பேச்சை ஈபிஎஸ் ரசிக்கவில்லை. எனவே அதிமுக கூட்டணியில் இருந்து பாஜக விலக்கப்படும் என்றே கணிக்கப்படுகிறது.
பாஜகவின் புதிய கூட்டணி வியூகம்:
அதிமுக கூட்டணியிலிருந்து விலகினால், பாஜக தனது செல்வாக்கை நிலைநிறுத்த புதிய கூட்டணிக்கான முயற்சிகளில் ஈடுபடும். அதாவது அமமுக, ஓபிஎஸ் அணி, பாமக, தேமுதிக போன்ற கட்சிகளை இணைத்து ஒரு மெகா கூட்டணியை உருவாக்க பாஜக முயற்சிக்கும் என கூறப்படுகிறது. ஆனால், அரசியல் விமர்சகர்களின் கருத்துப்படி, இத்தகைய கூட்டணிக்கு சந்தையில் பெரிய அளவில் மதிப்பில்லாமல் போகலாம். இந்த கட்சிகள் ஒவ்வொன்றும் சுமாரான வாக்கு வங்கியை வைத்திருந்தாலும் மக்கள் மத்தியில் எடுபடாது என்றே கூறப்படுகிறது. இதனால், இந்த கூட்டணி டெபாசிட் பெறுவதே பெரும் சவாலாக இருக்கும் என எதிர்பார்க்கப்படுகிறது.
விஜய் வருகையால் ஏற்படும் தாக்கம்:
அரசியல் களத்தில் தற்போது பேசுபொருளாக இருப்பது, விஜய்யின் ‘தமிழக வெற்றிக் கழகம்’. அவர் எந்த கட்சியுடன் கூட்டணி அமைப்பார் என்பதுதான் முக்கியக் கேள்வி. குறிப்பாக, தவெக, அதிமுக கூட்டணியில் இணைந்தால், அது தமிழக அரசியல் களத்தை முழுவதுமாக புரட்டிப் போடும் என ஆய்வாளர்கள் கூறுகின்றனர். விஜய்யின் ரசிகர் பட்டாளம், முதல் தலைமுறை வாக்காளர்கள், இளைஞர்கள், பெண்கள் மற்றும் சிறுபான்மையினர் என அனைத்து தரப்பினரின் வாக்குகளையும் ஈர்க்கும் சக்தி தவெகவுக்கு உள்ளது. அதிமுகவின் பாரம்பரிய வாக்கு வங்கி மற்றும் விஜய் ஈர்க்கும் புதிய வாக்கு வங்கி ஆகிய இரண்டும் இணைந்தால், திமுகவுக்கு இது ஒரு பெரிய சவாலாக இருக்கும். இந்த சூழ்நிலையில், திமுகவுக்கு பெரும் பின்னடைவும், பாஜகவின் புதிய கூட்டணி முற்றிலும் ‘வாஷ் அவுட்’ ஆகவும் வாய்ப்புள்ளது.
மொத்தத்தில் விஜய்யின் வருகை, தமிழக அரசியலில் இதுவரை இல்லாத அளவுக்கு ஒரு பலமான மூன்றாவது சக்தியை உருவாக்கியுள்ளது. அடுத்த எட்டு மாதங்களில், கூட்டணி பேச்சுவார்த்தைகள் மற்றும் அரசியல் நகர்வுகளின் அடிப்படையில் 2026 தேர்தலின் இறுதிப் படம் எப்படி இருக்கும் என்பது தெளிவாகத் தெரியவரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
