தமிழக அரசியலில் 2026 சட்டமன்ற தேர்தலுக்கான வியூகங்களை வகுக்க, பாஜகவின் ‘சாணக்கியர்’ என்று அழைக்கப்படும் மத்திய உள்துறை அமைச்சர் அமித்ஷா நேரடியாக களமிறங்கவுள்ளார். இதற்காக சென்னை தி.நகர் பகுதியில் ஒரு வீட்டைத் தயார் செய்து, அங்கேயே தங்கி தேர்தல் பணிகளை ஒருங்கிணைக்க அவர் எடுத்துள்ள முடிவு அரசியல் வட்டாரங்களில் பெரும் அதிர்வலைகளை ஏற்படுத்தியுள்ளது.
பொதுவாகத் தேர்தல் காலங்களில் டெல்லியில் இருந்தே காய்களை நகர்த்தும் அமித்ஷா, இம்முறை தமிழகத்தை தனது முதன்மை இலக்காக தேர்ந்தெடுத்துள்ளார். இனி வரும் ஏப்ரல் மாதம் வரை அமித்ஷாவின் முழு கவனமும் தமிழகம் மற்றும் மேற்கு வங்கம் ஆகிய இரண்டு மாநிலங்களின் மீதுதான் இருக்கப் போகிறது. மேற்கு வங்கத்தில் ஏற்கனவே வலுவான எதிர்க்கட்சியாக இருக்கும் பாஜக, தமிழகத்தில் ஒரு மாற்று சக்தியாகத் தன்னை நிலைநிறுத்தி கொள்ள இந்த ‘டேரா’ உதவுமா? என்பதே அனைவரின் கேள்வியாக உள்ளது.
மேற்கு வங்கத்தை பொறுத்தவரை பாஜகவிற்கு ஒரு தெளிவான தளம் உள்ளது, ஆனால் தமிழகத்தில் நிலைமை முற்றிலும் மாறுபட்டது. இங்கு அமித்ஷா எதிர்கொள்ள வேண்டிய சவால்கள் மிகவும் சிக்கலானவை. திராவிட அரசியலின் கோட்டையாக விளங்கும் திமுகவை வீழ்த்துவது ஒருபுறம் இருக்க, புதிதாக தீவிர அரசியலில் குதித்துள்ள நடிகர் விஜய்யின் தமிழக வெற்றி கழகம் இளைஞர்கள் மத்தியில் ஏற்படுத்தியுள்ள தாக்கத்தையும் அவர் கவனிக்க வேண்டியுள்ளது.
திமுக மற்றும் தவெக ஆகிய இரண்டு துருவங்களையும் ஒரே நேரத்தில் சமாளித்து, பாஜகவிற்கான ஒரு வெற்றிகரமான கூட்டணியை உருவாக்குவதுதான் அமித்ஷாவின் தற்போதைய பிரதான நோக்கம். இதற்காகவே அவர் அடிமட்ட தொண்டர்கள் முதல் மாவட்த் தலைவர்கள் வரை நேரடியாக சந்தித்து ஆலோசனைகளை நடத்த திட்டமிட்டுள்ளார்.
கூட்டணி அமைப்பதில் அமித்ஷாவின் அணுகுமுறை இம்முறை மிகவும் நுணுக்கமாக இருக்கும் என எதிர்பார்க்கப்படுகிறது. குறிப்பாக, அதிமுகவுடனான உறவை மீண்டும் புதுப்பித்துள்ள நிலையில் அதிமுகவில் இருந்து பிரிந்து சென்றவர்களை சேர்க்க அவர் முயற்சி செய்யலாம். மேலும் சிறிய கட்சிகளை ஒன்றிணைத்து ஒரு மூன்றாவது அணியை உருவாக்க வேண்டிய கட்டாயத்தில் உள்ளார்.
பியூஷ் கோயல் மற்றும் அர்ஜுன் ராம் மேக்வால் போன்ற சீனியர் தலைவர்களை தமிழக தேர்தல் பொறுப்பாளர்களாக நியமித்தது, ஒரு வலுவான அடித்தளத்தை அமைப்பதற்கான முதற்படியே. எடப்பாடி பழனிசாமி மற்றும் ஓ.பன்னீர்செல்வம் இடையேயான மோதல், சீமானின் தனித்துவமான தமிழ் தேசிய அரசியல் என பல முனைகளில் சிதறி கிடக்கும் வாக்குகளை பாஜக பக்கம் திருப்புவது அமித்ஷாவிற்கு ஒரு மிகப்பெரிய சவாலாகவே இருக்கும்.
திமுகவின் ‘விடியல்’ முழக்கத்திற்கும், விஜய்யின் ‘தூய சக்தி’ அரசியலுக்கும் மாற்றாக பிரதமர் மோடியின் ‘வளர்ச்சி’ மற்றும் ‘தேசியவாதம்’ என்ற கொள்கையை அமித்ஷா முன்வைக்க உள்ளார். தமிழகத்தில் நிலவும் சட்ட ஒழுங்கு பிரச்சினைகள், போதைப்பொருள் புழக்கம் மற்றும் ஆளுங்கட்சி மீதான அதிருப்தி ஆகியவற்றை பாஜகவின் தேர்தல் ஆயுதங்களாக மாற்ற அவர் திட்டமிட்டுள்ளார்.
அமித்ஷா நேரடியாக சென்னையில் தங்கியிருந்து ஒவ்வொரு தொகுதியின் நிலவரத்தையும் ‘மைக்ரோ மேனேஜ்மென்ட்’ முறையில் கண்காணிக்க போவதால், இது திமுக கூட்டணிக்கு ஒரு நெருக்கடியை உருவாக்கும். மேலும் அதிகாரிகளுடனான ஆய்வுகள் மற்றும் கட்சி நிர்வாகிகளுடனான ரகசிய கூட்டங்கள் மூலம் தமிழக அரசியலில் ஒரு திடீர் திருப்பத்தை ஏற்படுத்த அவர் தயாராகி வருகிறார்.
விஜய்யின் தமிழக வெற்றி கழகம் எந்த பக்கம் சாயும் அல்லது யாருடைய வாக்குகளை பிரிக்கும் என்பதுதான் இப்போதைய மர்மமாக உள்ளது. அமித்ஷா தனது அரசியல் சதுரங்கத்தில் விஜய்யை ஒரு கருவியாக பயன்படுத்துவாரா அல்லது எதிரியாக கருதுவாரா என்பது வரும் நாட்களில் தெரியவரும். திமுகவின் வாக்கு வங்கியை சிதைக்க விஜய்யின் வருகை உதவும் என்று ஒரு தரப்பு நம்பினாலும், அது பாஜகவின் வளர்ச்சியை பாதித்துவிடக்கூடாது என்பதில் அமித்ஷா கவனமாக இருப்பார். அதேநேரத்தில், சமூக வலைதளங்களில் பாஜகவின் டிஜிட்டல் போர்வீரர்களை தயார்படுத்தி, இளைஞர்களிடையே ஒரு புதிய நேரேட்டிவை உருவாக்கும் பணிகளும் தி.நகர் முகாமில் இருந்தே தொடங்கப்பட உள்ளன.
ஒட்டுமொத்தத்தில், 2026 தேர்தல் என்பது ஒரு சாதாரண தேர்தலாக இருக்கப்போவதில்லை. அமித்ஷாவின் நேரடி கண்காணிப்பு, விஜய்யின் அதிரடி வருகை, திமுகவின் தற்காப்பு அரசியல் என தமிழகம் ஒரு மிகப்பெரிய அரசியல் யுத்தத்தை சந்திக்க போகிறது. ஏப்ரல் மாதம் வரை அமித்ஷா போடப்போகும் ‘டேரா’ பல வெற்றிகரமான கூட்டணிகளுக்கும், ஆச்சரியமான மாற்றங்களுக்கும் வித்திடும் என்பதில் சந்தேகமில்லை.
தமிழக அரசியல் களம் இனி பரபரப்பின் உச்சத்திற்கே செல்லும். திராவிட கட்சிகளின் கோட்டையை அமித்ஷா தனது தேசியவாத அரசியலால் தகர்ப்பாரா அல்லது தமிழக மண் மீண்டும் திராவிட அரசியலையே அரவணைக்குமா என்பதற்கான விடை இந்த தி.நகர் வியூகங்களில் ஒளிந்துள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
