அமெரிக்காவின் தலைநகர் வாஷிங்டன் டி.சி.யில், சில அமெரிக்க சட்டமியற்றுபவர்களே டொனால்ட் ட்ரம்ப்புக்கு ஒரு முக்கியமான செய்தியை அனுப்பியுள்ளனர்: “நீங்கள் இந்தியாவின் நட்புறவை சேதப்படுத்திவிட்டீர்கள். அதைச் சரிசெய்ய வேண்டிய நேரம் இது.” என கிட்டத்தட்ட எச்சரித்துள்ளனர்.
அக்டோபர் 8 ஆம் தேதி வெளியிடப்பட்ட ஒரு கடிதத்தில், 19 அமெரிக்க நாடாளுமன்ற உறுப்பினர்கள், அமெரிக்கா – இந்தியா உறவை சரிசெய்து மறுசீரமைக்க ட்ரம்ப்பை வலியுறுத்தியுள்ளனர்.
ட்ரம்ப் நிர்வாகத்தின் சமீபத்திய நடவடிக்கைகள், உலகின் மிகப்பெரிய ஜனநாயக நாடான இந்தியாவுடனான உறவில் விரிசலை ஏற்படுத்தி, இரு நாடுகளுக்கும் பாதகமான விளைவுகளை உருவாக்கியுள்ளதாக அந்த கடிதத்தில் குறிப்பிடப்பட்டுள்ளது.
இந்தியா அமெரிக்கா உறவில் ஏற்பட்டுள்ள பதற்றத்திற்குக் காரணம், ட்ரம்ப் நிர்வாகம் விதித்த அதிகப்படியான வரிகளே. முதலில், அமெரிக்கா இந்தியா மீது 25% வரிகளை விதித்தது. அதன் பிறகு, ரஷ்ய எண்ணெயை இந்தியா தொடர்ந்து சலுகை விலையில் வாங்குவதை குறிவைத்து, ஆகஸ்ட் மாதம் மேலும் 25% வரிகளை விதித்தது.
மொத்தமாக, பல இந்திய ஏற்றுமதிகள் அமெரிக்க சந்தையில் நுழையும்போது கிட்டத்தட்ட 50% வரிச்சுமைக்கு ஆளாகின. இது இந்தியாவுக்கு ஒரு பெரிய பொருளாதார அடியாக கருதப்படுகிறது. வர்த்தக நிபுணர்கள் இதை நியாயமான வர்த்தகத்திற்கான நடவடிக்கை அல்ல என்றும், எரிசக்தி கொள்கைக்காக இந்தியாவை அழுத்தம் கொடுக்கும் ஒரு தண்டனை நடவடிக்கை என்றும் விமர்சித்துள்ளனர்.
இந்த தண்டனை நடவடிக்கைகள் இந்திய உற்பத்தியாளர்களை பாதிப்பதுடன், அமெரிக்க நுகர்வோருக்கான விலையை உயர்த்தியுள்ளன என்றும், அமெரிக்க நிறுவனங்கள் நம்பியிருக்கும் விநியோக சங்கிலிகளை சேதப்படுத்தியுள்ளன என்றும் நாடாளுமன்ற உறுப்பினர்கள் தங்கள் கடிதத்தில் ட்ரம்புக்கு நினைவூட்டினர்.
அமெரிக்கா – இந்தியா இடையேயான வர்த்தக உறவு இரு நாடுகளிலும் லட்சக்கணக்கான வேலைவாய்ப்புகளை ஆதரிக்கிறது என்பதையும் அவர்கள் சுட்டிக்காட்டினர். அரசியல் ரீதியாக மேலும் முக்கியமான ஒரு கவலையையும் அந்த கடிதம் சுட்டிக்காட்டியுள்ளது: தொடர்ந்து வரி பதற்றம் அதிகரித்தால், அது இந்தியாவை சீனா மற்றும் ரஷ்யாவுடன் மேலும் நெருங்க செய்யும். இந்தோ-பசிபிக் பிராந்தியத்தில் வாஷிங்டன் தவிர்க்க விரும்பும் ஒரு சூழ்நிலை இது.
இந்த கடிதத்தில் கையெழுத்திட்ட 19 பேரும் ஜனநாயக கட்சியை சேர்ந்தவர்கள். இவர்களில் இந்திய-அமெரிக்கப் பிரதிநிதிகளான ரோ கன்னா, பிரமிளா ஜெயபால், ராஜா கிருஷ்ணமூர்த்தி ஆகியோர் அடங்குவர்.
இந்த உறவு மேம்படவில்லை என்றால் என்ன நடக்கும்? இந்தியா இப்போதே பதிலடி கொடுக்க ஆரம்பித்துள்ளது. புதுடெல்லி தனது வர்த்தகத்தை பல்வகைப்படுத்தும் வேகத்தை அதிகரித்து வருகிறது. ஐரோப்பா, ஆசியான், வளைகுடா நாடுகள் மற்றும் தற்போது EFTA கூட்டமைப்புடன் வர்த்தக ஒப்பந்தங்கள் மூலம் வலுவான உறவுகளை இந்தியா ஏற்படுத்தி வருகிறது.
உலக அரசியலில், கூட்டணியின் வலிமை என்பது நாடுகளுக்கு இடையேயான நம்பிக்கையை பொறுத்தே அமையும். எனவே, “இயற்கையான கூட்டாளிகள்” என்று வர்ணிக்கப்பட்ட அமெரிக்கா – இந்தியா உறவில் உள்ள இந்த விரிசலை சரிசெய்ய வேண்டியது இரு நாடுகளுக்கும் அவசியமானதாகும். அமெரிக்க அதிகார மையத்திற்குள் இருந்து வந்திருக்கும் இந்த கடிதம், உறவை சரிசெய்ய வேண்டும் என்ற கோரிக்கையாகவும் எச்சரிக்கையாகவும் பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
