2026 தமிழ்நாடு சட்டமன்ற தேர்தலில் எந்த கட்சி வெற்றிபெறும் என்பதை கணிப்பது என்பது தற்போதுள்ள நிலையில் மிக கடினமான ஒன்றாகும் என எந்த கட்சியையும் சாராத நடுநிலை அரசியல் விமர்சகர்கள் தெரிவித்து வருகின்றனர். ஏனெனில் தேர்தல் நடைபெறுவதற்கு இன்னும் 8 மாத காலம் உள்ளதாலும், அரசியல் சூழ்நிலைகள் மாறக்கூடியவை என்பதாலும், உறுதியான ஒரு முடிவை இப்போதே சொல்வது சாத்தியமில்லை என்றும், இருப்பினும், திமுக, அதிமுக மற்றும் புதிதாக களமிறங்கிய தமிழக வெற்றிக் கழகம் ஆகிய கட்சிகளின் தற்போதைய நிலவரம் மற்றும் வெற்றி வாய்ப்புகள் குறித்த சில கருத்துக்களை தெரிவித்து வருகின்றனர்.
தற்போதைய ஆளுங்கட்சியான திமுக, முதல்வர் மு.க. ஸ்டாலின் தலைமையில் செயல்பட்டு வருகிறது. அரசின் திட்டங்கள், செயல்பாடுகள், மக்கள் நலத்திட்டங்கள் ஆகியவை இவர்களுக்கு சாதகமான அம்சங்களாக இருக்கலாம். இருப்பினும், விலைவாசி உயர்வு, சட்டம்-ஒழுங்கு பிரச்சினைகள், நிதி பற்றாக்குறை போன்ற எதிர்மறை விமர்சனங்களையும் எதிர்கொண்டு வருகின்றனர். 2026 தேர்தலில், 200 தொகுதிகளுக்கு மேல் வெற்றி பெற திட்டமிட்டுள்ளதாகவும் தகவல்கள் வெளியாகியுள்ளன. கூட்டணி கட்சிகளை வலுவாக வைத்திருக்கவும், வேட்பாளர்களை முன்கூட்டியே தேர்வு செய்யவும் திமுக திட்டமிடுகிறது.
அதிமுகவை பொருத்தவரை அதன் பொதுச் செயலாளராக எடப்பாடி பழனிசாமி உட்கட்சிப் பூசல்கள் ஒருபுறம் இருந்தாலும், ஒற்றை தலைமைக்கு வந்துள்ளதால் கட்சிக்கு ஒரு ஸ்திரத்தன்மை கிடைத்துள்ளது. அண்மையில் அவர் மேற்கொண்டு வரும் ‘மக்களை காப்போம், தமிழகத்தை மீட்போம்’ சுற்றுப்பயணத்தில் திரளும் கூட்டம் அவருக்கு சாதகமாக பார்க்கப்படுகிறது. பாஜகவுடன் கூட்டணி தொடருமா என்பதில் சில சலசலப்புகள் இருந்தாலும், எடப்பாடி பழனிசாமி முதல்வர் வேட்பாளர் என்று பாஜக தரப்பிலிருந்து அண்மையில் அண்ணாமலை உறுதிப்படுத்தியிருப்பது அதிமுக தொண்டர்களிடையே உற்சாகத்தை ஏற்படுத்தியுள்ளது. தனிப் பெரும்பான்மையுடன் ஆட்சி அமைப்பதே தங்கள் நோக்கம் என்று எடப்பாடி பழனிசாமி கூறி வருகிறார்.
நடிகர் விஜய் தலைமையில் புதிதாக தொடங்கப்பட்டுள்ள தமிழக வெற்றிக் கழகம், இளைஞர்கள் மற்றும் விஜய் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. சீமானின் நாம் தமிழர் கட்சிக்கு கிடைத்த இளைஞர் வாக்குகளில் ஒரு பகுதி தவெக பக்கம் திரும்ப வாய்ப்புள்ளதாக அரசியல் விமர்சகர்கள் கருதுகின்றனர். நடிகர் விஜய் அரசியல் களத்தில் தனது நிலையை எப்படி உறுதிப்படுத்துவார், கட்சியை எவ்வாறு கட்டமைப்பார், என்ன மாதிரியான தேர்தல் வியூகங்களை வகுப்பார் என்பவை அடுத்தடுத்த நகர்வுகளின் மூலம் தெரிய வரும். இவரது வருகை, அதிமுக மற்றும் திமுக ஆகிய இரு பெரிய கட்சிகளுக்கும் சவாலாக இருக்கும் என்று எதிர்பார்க்கப்படுகிறது.
பொதுவான கருத்துகள் கூறுவது என்னவெனில் 2026 தேர்தலில் தமிழகத்தில் தொங்கு சட்டசபை அமைய வாய்ப்புள்ளதாக பல அரசியல் விமர்சகர்கள் கருதுகின்றனர். அப்படி ஒரு நிலை ஏற்பட்டால், விஜய் யாருக்கு ஆதரவு தருகிறாரோ அந்த கூட்டணிதான் ஆட்சி அமைக்க முடியும் என்ற நிலை உருவாகலாம்.
திமுக, அதிமுக மற்றும் தவெக ஆகிய மூன்று கட்சிகளும் கூட்டணி அமைத்து போட்டியிடும் நிலையில், கூட்டணியில் உள்ள கட்சிகளின் பலம், தொகுதிப் பங்கீடு, தேர்தல் வியூகம் ஆகியவை பொருத்து வெற்றி வாய்ப்பு அமையும். தேர்தல் நெருங்கும்போது மக்கள் மனநிலை, தலைவர்களின் பேச்சு, சமூக ஊடகங்களின் தாக்கம், தேர்தல் வாக்குறுதிகள் என பல காரணிகள் வெற்றி வாய்ப்பைக் கணிசமாக மாற்றக்கூடும்.
தற்போது வெளியாகும் கருத்துக்கணிப்புகள் அனைத்தும் முதற்கட்ட கணிப்புகளே. பல கருத்துக்கணிப்புகள் பொய்யாகியுள்ள நிலையில், இவை அனைத்தும் உறுதி செய்யப்படாத தகவல்களே.
மொத்தத்த்ல் 2026 தமிழ்நாடு சட்டமன்றத் தேர்தலில் எந்த கட்சி வெற்றி பெறும் என்பதை இப்போதே உறுதியாக கூறுவது இயலாத காரியம். அனைத்து கட்சிகளும் தங்கள் வியூகங்களை வகுத்து, தேர்தல் பணிகளை தொடங்கியுள்ளன. வரும் நாட்களில் அரசியல் களம் மேலும் சூடுபிடிக்கும். மக்கள் என்ன நினைக்கிறார்கள், யாரை ஆட்சி கட்டிலில் அமர வைக்கிறார்கள் என்பது தேர்தல் முடிவுகள் வெளியாகும் நாளில்தான் தெரியவரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
