அமெரிக்க அதிபர் டொனால்ட் ட்ரம்ப்பின் அதிகபட்ச வரி விதிப்பு தந்திரம், அமெரிக்காவுக்கு மிகப்பெரிய வருவாயை தரும், அமெரிக்கா கட்டுப்பாட்டில் உலக நாடுகள் என்று நினைத்திருந்த நிலையில், அவரே எதிர்பாராமல் இந்த விஷயம் அவருக்கு எதிராகவே திரும்பிவிட்டதாகவும், இதனால் பாதிக்கப்பட்டது அமெரிக்க அரசு மட்டுமின்றி அமெரிக்க மக்களும் தான் என்று சர்வதேச அரசியல் ஆய்வாளர்கள் கூறி வருவது பரபரப்பை ஏற்படுத்தியுள்ளது. குறிப்பாக சீனா மற்றும் இந்தியா ஆகிய இரண்டு முக்கிய நாடுகளை பொறுத்தவரை, இந்த வர்த்தக போர் எப்படி பரிணமித்துள்ளது, அது அமெரிக்க பொருளாதாரத்தை, குறிப்பாக விவசாயிகளை எப்படிப் பாதிக்கிறது, அதன் விளைவுகள் என்னென்ன என்பது குறித்து ஒரு விரிவான அலசலை பார்ப்போம்.
ட்ரம்ப் தனது முதல் ஆட்சிக்காலத்தில், சீனா மீது அதிரடியான வரிகளை விதித்தார். அதன் ஒரு பகுதியாக, சீனா அமெரிக்க சோயாபீன் இறக்குமதியை பெரிதும் நம்பியுள்ளது என்ற பலவீனத்தை பயன்படுத்தி, சோயாபீன் மீது கடுமையான வரிகளை விதித்து, சீனாவை பணிய வைக்க முயற்சித்தார். ஆனால், சீனா இந்த மிரட்டலுக்கு பணியவில்லை. மாறாக, அமெரிக்க விவசாயிகளுக்கு அதிர்ச்சி தரும் வகையில், மே 2025 முதல் அமெரிக்க சோயாபீன் இறக்குமதியை முழுமையாக நிறுத்தி வைத்தது.
அமெரிக்க சோயாபீன் இறக்குமதியை சீனா நிறுத்திய பிறகு, தனது தேவைகளை பிரேசில் மற்றும் அர்ஜென்டினா போன்ற தென் அமெரிக்க நாடுகளிலிருந்து பூர்த்தி செய்ய தொடங்கியது. இந்த திடீர் மாற்றம், இந்த நாடுகளுக்கு புதிய வர்த்தக வாய்ப்புகளை உருவாக்கி, மிகப்பெரிய ஜாக்பாட்டை பெற்று தந்தது. பொருளாதார வல்லுனர்களின் கூற்றுப்படி, இந்த மாற்றங்கள் நிரந்தரமாக இருக்கக்கூடும் என்றும் அதாவது, சீனா மீண்டும் அமெரிக்க விவசாயிகளிடமிருந்து சோயாபீன் வாங்க வாய்ப்பே இல்லாமல் போகலாம் என்றும் கூறப்படுகிறது.
சீனாவின் இந்த அதிரடி முடிவால் அமெரிக்காவின் மத்திய மேற்கு மாநிலங்களான அயோவா, இல்லினாய்ஸ் போன்ற சோயாபீன் அதிகம் விளையும் பகுதிகள் பெரும் பாதிப்பை சந்தித்துள்ளன. 2016-ல் சீனாவுக்கு ₹14 பில்லியன் மதிப்புள்ள சோயாபீன் ஏற்றுமதி செய்யப்பட்ட நிலையில், 2018-ல் அது ₹3.1 பில்லியனாக குறைந்தது. இப்போதும் அதேபோன்ற சரிவு ஏற்பட்டுள்ளது.
சோயாபீன் விவசாயிகள் பெரும்பாலும் ட்ரம்ப்பின் ஆதரவாளர்கள். அவர்கள் இப்போது இந்த வர்த்தக போரால் தங்கள் வாழ்வாதாரம் பாதிக்கப்படுவதாக குற்றம் சாட்டுகின்றனர். இதனால் ட்ரம்ப் நிர்வாகம், விவசாயிகளுக்கு நிவாரணம் அளிக்க முன்வந்தாலும், அது வர்த்தக போரால் ஏற்படும் நிரந்தர பாதிப்புகளை சரிசெய்ய போதுமானதாக இருக்காது.
சீனா தனது தேவைகளுக்கு பிரேசில் மற்றும் அர்ஜென்டினாவை நாடியது போல, இந்தியாவும் தனது சொந்த வர்த்தப் போரை ட்ரம்ப் நிர்வாகத்துடன் எதிர்கொண்டது. ரஷ்யாவிடமிருந்து கச்சா எண்ணெய் வாங்கியதற்காகவும், H-1B விசா கொள்கைகளுக்காகவும் இந்தியா மீது அமெரிக்கா கடுமையான வரிகளை விதித்தது. இதற்கு பதிலடியாக, இந்தியா புத்திசாலித்தனமாக ஒரு நகர்வை மேற்கொண்டது.
இந்தியா உலகின் மிகப்பெரிய சமையல் எண்ணெய் இறக்குமதியாளர். அர்ஜென்டினா தனது சோயாபீன் ஏற்றுமதி வரிகளை ரத்து செய்தபோது, இந்திய இறக்குமதியாளர்கள் அதை தங்களுக்கு சாதகமாகப் பயன்படுத்திக்கொண்டனர். வெறும் இரண்டு நாட்களில், அர்ஜென்டினாவிலிருந்து 300,000 டன் சோயாபீன் எண்ணெயை இந்தியா இறக்குமதி செய்தது. இது வரலாற்றிலேயே ஒரே நேரத்தில் இந்தியா செய்த மிகப்பெரிய கொள்முதல்.
இந்த ஒப்பந்தம் ஒரு டன்னுக்கு $1,100 முதல் $1,120 வரை என்ற விலையில் கிடைத்தது. இது பாமாயிலின் விலையை விட குறைவு. இதனால் இந்தியாவுக்கு சமையல் எண்ணெய் விலைகளை கட்டுக்குள் வைக்க ஒரு வாய்ப்பு கிடைத்தது.
இந்த நகர்வு மூலம், இந்தியா ட்ரம்ப் நிர்வாகத்திற்கு ஒரு தெளிவான செய்தியை அனுப்பியுள்ளது. அமெரிக்காவின் கொள்கைகள் நிலையற்றதாக இருக்கும்போது, இந்தியாவால் அமெரிக்காவை நம்பியிருக்க முடியாது, மேலும் தனது தேவைகளை பூர்த்தி செய்ய மற்ற நாடுகளுடன் நீண்ட கால உறவுகளை உருவாக்க முடியும் என்பதை இந்தியா உணர்த்தியுள்ளது.
ட்ரம்ப்பின் வரி விதிப்பு கொள்கை, அமெரிக்காவின் இரண்டு முக்கிய வர்த்தக பங்காளிகளான சீனா மற்றும் இந்தியா ஆகிய இரு நாடுகளிலும் எதிர்மறையான விளைவுகளை ஏற்படுத்தியுள்ளது. சீனா அமெரிக்க விவசாயிகளைத் தங்கள் மிகப்பெரிய சந்தையிலிருந்து வெளியேற்றிவிட்டது. அதே நேரத்தில், இந்தியா அர்ஜென்டினா போன்ற நாடுகளுடன் வர்த்தக உறவுகளை பலப்படுத்தி, அமெரிக்காவை சார்ந்து இருப்பதை குறைத்துவிட்டது. இந்த மாற்றங்கள் ஒரு நிரந்தர வர்த்தக பின்னடைவாக மாறக்கூடும். எதிர்காலத்தில், வர்த்தக போர்கள் எந்தப் பக்கமும் நிரந்தரமான வெற்றியை தருவதில்லை, மாறாக, உலகளாவிய வர்த்தக உறவுகளை மாற்றி அமைக்கும் என்பதை இந்த சம்பவம் நமக்கு உணர்த்துகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
