அமெரிக்க அதிபர் டொனால்ட் டிரம்ப்புக்கு உள்நாட்டிலேயே அதிக எதிர்ப்பு இருப்பதால் அவர் பதவி இழக்கும் அபாயத்தை எதிர்கொள்கிறாரா என்ற கேள்வி எழுந்துள்ளது. நேபாளம், இலங்கை, வங்கதேசம் ஆகிய நாடுகளில் Gen Z போராட்டம் காரணமாக அந்த நாடுகளின் ஆட்சியாளர்கள் பதவி இழந்ததற்கு பின்னணியில் அமெரிக்கா இருப்பதாக கூறப்பட்டது. இப்போது அதே அமெரிக்கா Gen Z போராட்டத்தை எதிர்கொள்ள நேரிடுவது தன் வினை தன்னை சுடும் என்ற பழமொழியை ஞாபகப்படுத்துகிறது.
அதிபர் டொனால்ட் டிரம்ப், தனது ஆட்சி பொறுப்பை ஏற்றவுடன் இந்தியாவிலிருந்து அமெரிக்காவுக்கு ஏற்றுமதி செய்யப்படும் பொருட்களுக்குக் கூடுதல் வரி விதிப்பது, H1B விசா கட்டுப்பாடு மற்றும் அமெரிக்காவில் குடியேறிய இந்தியர்கள் குறித்த சில விமர்சனங்களை முன்வைத்தது பெரும் சர்ச்சையை ஏற்படுத்தியது. டிரம்பின் இந்த அணுகுமுறை, அமெரிக்க வாழ் இந்தியர்கள் மத்தியில் மட்டுமின்றி, அமெரிக்கர்களுக்கும் குறிப்பாக Gen Z தலைமுறையினர்களுக்கு பெரும் அதிருப்தியை ஏற்படுத்தியுள்ளது.
அமெரிக்காவில் உள்ள இளைஞர்கள் (Gen Z மற்றும் மில்லினியல்கள்), தங்கள் பாரம்பரிய வேர்களை பற்றிப் பெருமைப்படுபவர்கள். டிரம்ப் நிர்வாகத்தின் கொள்கைகள் இந்தியாவை இலக்கு வைத்ததாகவோ அல்லது பாரபட்சமாக இருந்ததாகவோ அவர்கள் உணர்கிறார்கள்.
சமூக ஊடகங்கள் மற்றும் டிஜிட்டல் தளங்களில் இந்த இளைஞர்கள் “டிரம்புக்கு எதிராக ஒரு மாபெரும் பிரசாரத்தை முன்னெடுத்துள்ளனர். இந்தியாவை குறிவைக்கும் எந்தவொரு தலைவரும் அமெரிக்காவில் ஆட்சிக்கு வர தகுதியற்றவர் என்ற கருத்தை அவர்கள் பரவலாக பரப்புகின்றனர்.
பொதுவாக, இந்த இளம் அமெரிக்கர்கள் அரசியல் ரீதியாகத் தீவிரமாக இல்லாவிட்டாலும், இப்போது அவர்கள் அதிக அளவில் அதிருப்தியை வெளிப்படுத்தி வருகின்றனர்.
மேலும் அமெரிக்க பொருளாதார வல்லுனர்கள் டிரம்பின் அணுகுமுறை, பழைய அரசியல் சமன்பாடுகளை அடிப்படையாக கொண்டது என்று விமர்சிக்கின்றனர். அதாவது, அவர் இந்தியாவுடனான உறவுகளை 2014-க்கு முன்னர் இருந்த இந்தியா போல, எளிதில் நெகிழும், பலவீனமான பொருளாதாரமாகவோ அல்லது மென்மையான ராஜதந்திர அணுகுமுறையிலோ கருதியிருக்கலாம். ஆனால், உலக அரங்கில் இந்திய பிரதமர் நரேந்திர மோடி தலைமையிலான அரசு கொண்டு வந்துள்ள மாற்றங்களை அவர் சரியாக புரிந்துகொள்ளவில்லை என்பதே முக்கிய விமர்சனமாக உள்ளது.
இந்தியா தற்போது உலக அரசியலில் ஒரு “முக்கியமான வல்லரசு” என்ற நிலையை நோக்கி நெருங்கிவிட்டது. பொருளாதார ரீதியாகவும், புவிசார் அரசியல் ரீதியாகவும் இந்தியாவை பகைத்து கொள்வது அமெரிக்காவுக்கு நல்லதல்ல என்ற புரிதல் பரவலாக உள்ளது.
மோடி அரசின் செல்வாக்கால், வெளிநாடுகளில் வாழும் இந்தியர்களின் தேசப்பற்று மற்றும் அரசியல் விழிப்புணர்வு அதிகரித்துள்ளது. தங்களின் சொந்த நாட்டின் மீது வைக்கப்படும் விமர்சனங்களை அவர்கள் தீவிரமான அரசியல் நிலைப்பாடாக மாற்றுகின்றனர்.
இந்தியாவைப்பகைத்துக் கொள்வது என்பது வெறும் வர்த்தக பிரச்சனை அல்ல. இது அமெரிக்காவின் நீண்ட கால ராணுவ, பொருளாதார மற்றும் ராஜதந்திர முதலீட்டை பாதிக்கும் என்று அமெரிக்க மக்கள் நம்ப தொடங்கியுள்ளனர்.
இந்திய சந்தை ஒரு பெரிய வாய்ப்பு. அமெரிக்க நிறுவனங்கள் இந்தியாவில் அதிக முதலீடு செய்ய துடிக்கும்போது, அரசாங்க மட்டத்தில் ஏற்படும் உரசல் வணிக வாய்ப்புகளை கெடுக்கும் என்று அரசியல் வல்லுனர்கள் கூறுகின்றனர்.
மொத்தத்தில் “இந்தியாவை நீ தொட்டிருக்க கூடாது டிரம்ப்” என்ற இளைஞர்களின் கோஷம், உணர்ச்சி ரீதியான தாக்கத்தை ஏற்படுத்தியுள்ளது. அமெரிக்காவின் இளம் இந்திய அமெரிக்கர்கள் மற்றும் பொதுவாக உள்ள அமெரிக்க மக்கள், இந்தியாவின் உலகளாவிய முக்கியத்துவத்தை உணர்ந்துள்ளனர். இந்த ஒரே ஒரு அரசியல் தவறு, டிரம்ப் தனது பதவி இழக்க காரணமாக அமையலாம் என்று எதிர்பார்க்கப்படுகிறது. ஏனெனில், இது அமெரிக்கா மீது உள்ள கோபம் அல்ல, டிரம்ப் என்ற தனிப்பட்ட மனிதர் மீது உள்ள கோபம் தான்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
